Adam ahn Eev Neva Obay Gaad

Wahn day, wahn snayk mi staat taak tu Eev wen shee mi deh bai ihself. Ih mi aks ahn: ‘Da chroo Gaad seh yu noh fi eet fahn aala di chree dehn?ʼ Eev ansa: ‘Wi ku eet fahn aala di chree dehn, bot wi noh fi eet fahn wan speshal chree. If wi eet fan it, wi wahn ded.ʼ Di snayk tel ahn: ‘Dat da noh chroo! Yu noh wahn ded. Gaad noa dat if yu eet fan it, yu wahn bee jos laik hihn.ʼ Yu tink di snayk mi-di seh di chroot? No, da mi wahn big lai. Bot Eev mi bileev it. Di langa shee mi-di luk pahn di froot, di moa shee mi waahnt it. Soh shee bait pees a di froot ahn gi som a it tu Adam. Hihn mi noa dat dehn mi wahn ded if dehn neva obay Gaad. Bot hihn neva kay, hihn stil gaahn hed an eet it.

Layta da sayhn day, Jehoava mi taak tu Adam ahn Eev. Hihn aks dehn wai dehn neva obay ahn. Eev staat aaf di blaym di snayk, an Adam blaym Eev. Dehn neva lisn tu Jehoava, soh hihn tek dehn owta di gyaadn. Da di enchrans a di gyaadn, hihn put too aynjel ahn wahn soad weh ga faiya fi mek shoar den kyaahn goh bak een.

Jehoava mi seh dat hihn wahn aalso ponish di wan weh mi chrik Eev. Da neva reeli di snayk weh mi-di taak tu Eev. Wen Jehoava mi mek di snayk dehn, hihn neva mek dehn fi taak. Di bad aynjel weh dehn kaal Saytan di Devl mi du dat fi chrik Eev. Bot soon, Jehoava wahn dischrai Saytan soh dat hihn kyaahn chrik nobadi els fi du bad tingz.