Jeezas Heel Sohnbadi Pahn di Sabat

Di Farisee dehn mi hayt Jeezas ahn dehn mi waahn fain wahn reezn fi ares ahn. Dehn mi seh dat ih shudn heel sik peepl pahn di Sabat. Wahn Sabat day, Jeezas mi fain wahn man weh mi baan blain di beg pahn di schreet. Ih tel ih disaipl dehn: ‘Si how Gaad powa wahn help dis man.ʼ Jeezas spit pahn di grong ahn miks it wid dert, den ih put it pahn di man aiy dehn. Jeezas tel ahn: ‘Goh wash yu aiy dehn eena di pool a Siloawam.ʼ Di man mi du weh ih seh, ahn fi di fers taim eena ih laif, ih kuda mi si.

Di peepl mi shak. Dehn seh: ‘Dis da noh di saym man weh yoostu sidong di beg, er da sohnbadi weh luk laik hihn?ʼ Di man tel dehn: ‘Yes, da mee. Ai da di wan weh mi baan blain!ʼ Di peepl aks ahn: ‘How komz yoo noh blain nohmoh?ʼ Wen hihn tel dehn weh mi hapm, dehn kehr ahn da di Farisee dehn.

Di man tel di Farisee dehn: ‘Jeezas miks sohn mod an ih put it pahn mi aiy dehn, den ih tel mi fi goh wash it aaf. Ah mi du dat, ahn now Ah ku si.ʼ Di Farisee dehn seh: ‘If Jeezas di heel peepl pahn di Sabat, ih powa kyaahn bee fahn Gaad.ʼ Bot ada peepl mi-di seh: ‘If ih powa da neva fahn Gaad, den ih mi wahn kyaahn heel nobadi.ʼ

Di Farisee dehn mi sen fi di man payrents an aks dehn: ‘How komz yu son ku si now?ʼ Di man payrents mi frayd bikaaz di Farisee dehn mi seh dat if enibadi put fayt eena Jeezas dehn wuda mi kik dehn owta di sinagag. Soh dehn seh: ‘Wee noh noa. Unu aks ahn.ʼ Di Farisee aks di man moa kweschanz til ih seh: ‘Ah don tel unu evriting Ah noa. Wai unu kip di aks mi?ʼ Di Farisee dehn mi beks bad, ahn dehn chroa ahn owta di sinagag.

Jeezas gaahn luk fi di man, an ih aks ahn: ‘Yoo ga fayt eena di Mesaiya?ʼ Di man tel ahn: ‘Ah wud if Ai wuda mi noa da hoo hihn.ʼ Jeezas tel ahn: ‘Ai da di Mesaiya.ʼ Jeezas mi soh kain, noh chroo? Ih neva onli heel di man, bot ih mi aalso help ahn fi ga fayt.