Dehn Ares Jeezas

Da mi afta midnait ahn da mi ful moon. Jeezas an ih apasl dehn gaahn da di Mongt a Alivz ahn dehn paas chroo di Kijron Vali. Wen dehn reech da di gyaadn a Getsemani, Jeezas mi tel dehn: “Unu stay ya ahn kip wach wid mi.” Den Jeezas gaahn wahn lee wayz eena di gyaadn an ih neel dong. Ih haat mi hevi an ih pray tu Jehoava: “Mek yu wil tek plays.” Den Jehoava sen wahn aynjel fi inkorij Jeezas. Wen Jeezas gaahn bak tu ih apasl dehn, ih fain chree a dehn di sleep. Soh ih tel dehn: ‘Get op! Dis da noh taim fi sleep! Di taim don kohn fi mek dehn han mi oava tu mi enimi dehn.ʼ

Saym taim Joodas mi reech. Ih mi-di leed wahn big krowd weh mi ga soad ahn klob. Hihn mi noa wehpaat Jeezas mi deh kaaz dehn aalwayz yoostu goh da di gyaadn. Joodas mi tel di soaljaz dat hihn wahn shoa dehn hoo da Jeezas. Ih gaan op tu Jeezas ahn tel ahn: ‘Heloa, Teecha,ʼ ahn den ih kis ahn. Jeezas tel ahn: ‘Joodas, yoo di bichray mi wid wahn kis?ʼ

Jeezas mi step faawod an ih aks di krowd: “Da hoo unu di luk fa?” Dehn tel ahn: “Jeezas di Nazareen.” Den hihn tel dehn: “Ai da di wan weh unu di luk fa.” Di man dehn step bak ahn jrap tu di grong. Agen Jeezas mi aks di krowd: “Da hoo unu di luk fa?” An agen dehn seh: “Jeezas di Nazareen.” Jeezas ansa dehn: ‘Ah don tel unu aredi dat da mee. Mek mi disaipl dehn goh.ʼ

Wen Peeta noatis weh mi-di hapm, ih haal owt ih soad an ih chap aaf di rait ayz a Malkos, di slayv a di hai prees. Bot Jeezas mi toch di man ayz an ih heel ahn. Den Jeezas tel Peeta: ‘Put bak yu soad. If yu fait wid wahn soad, yu wahn ded bai wahn soad.ʼ Di soalja dehn grab Jeezas ahn tai op ih han dehn, ahn di apasl dehn ron weh. Den di krowd kehr ahn tu Anas, di cheef prees. Anas mi kweschan Jeezas an afta dat ih sen ahn da di hows a Kaiyafas di hai prees. Bot weh mi hapm tu di apasl dehn?