Sopoat Jehoava Moaral Standadz

Jehoava set moaral standadz fi hyoomanz. Wahn egzampl a dis da wen ih seh dat marij fi bee bitween wahn man ahn wahn uman, an ih fi laas wahn laiftaim. (Mach 19:4-6, 9) Hihn hayt eni kaina sin weh ga fi du wid seks. (1Kor 6:9, 10) Hihn eevn gi wi sohn prinsiplz bowt how fi jres ahn how fi fiks op wiself soh peepl ku si dat wi difrent.—De 22:5; 1Tim 2:9, 10.

Eena di werl tudeh, lata peepl rijek Jehoava standadz. (Roam 1:18-32) Dehn mek ada peepl tel dehn how fi jres, how dehn shuda luk, ahn how fi ak. Wahn lat boasi bowt di badnis weh dehn du ahn kritisaiz dehn wan weh liv bai wahn difrent standad.—1Pee 4:3, 4.

Wee weh da Jehoava Witnisiz need fi ga di korij fi sopoat Gaad moaral standadz. (Roam 12:9) Wi ku du dis wen wi tel peepl eena wahn kain way bowt di ting dehn weh pleez Gaad, ahn sayhn taim kip wahn hai standad eena wi oan laif. Az wahn egzampl, wen wi di pik owt weh fi wayr ahn how wi wahn fiks op, wi ku aks wiself: ‘Ai laik weh Jehoava laik, er weh di werl laik? Di kloaz weh Ah wayr ahn how Ah fiks op miself di shoa dat Ai da wahn Kristyan weh rispek Gaad?’ Er wen wi di pik wahn proagram er moovi fi wach, wi mait aks wiself: ‘Jehoava wuda laik dis moovi? Da fi hoo standadz dis di inkorij? Ah wanda if weh Ah wach wahn mek it eezi fi Ah du weh rang? (Ps 101:3) Ada peepl wuda geh ofendid if dehn si weh Ah di luk pan?’—1Kor 10:31-33.

Da wai ih impoatant fi mek wi sopoat Jehoava moaral standadz? Da kaaz Jeezas Krais wahn soon dischrai di nayshan dehn lang wid evriting weh wikid. (Eze 9:4-7) Onli dehn wan weh di du di wil a Gaad wahn geh sayv. (1Jan 2:15-17) Soh den, mek wi stan op fi Jehoava moaral standadz soh dat peepl weh si wi gud kandok wahn prayz Gaad.—1Pee 2:11, 12.

WACH DI VEEDYO MEK FREN WID JEHOAVA—WAN MAN, WAN UMAN, DEN ANSA DEHNYA KWESCHAN:

• Da wai ih gud fi liv bai Jehoava standadz?

• Wai payrents shuda staat teech dehn pikni bowt Jehoava moaral standadz fahn dehn smaal?

• How aala wi ku help peepl fi benifit fahn Gaad gudnis?