Ga Lov fi Gaad ahn fi Nayba—How Wi Ku Du Dis

Eevn doa Kristyanz tudeh noh liv akaadn tu di Laa a Moaziz, too a di moas impoatant komanment fahn da Laa—fi lov Gaad ahn fi lov wi nayba—stil som op weh Jehoava waahn wi du. (Mach 22:37-39) Bikaaz wi noh baan wid da kaina lov, wi haftu werk haad fi get it. How soh? Wahn impoatant way da fi reed di Baibl evri day. Wen wi tink bowt weh aal di Baibl seh bowt Gaad persnaliti, wi geh fi si dat Jehoava soh wandaful. (Ps 27:4) Sayka dat, wi lov fi hihn groa ahn wi staat tu tink moa ahn moa laik hihn. Dis moov wi fi waahn du weh hihn koman wi fi du, eevn fi obay di koman fi lov ada peepl noh mata wat. (Jan 13:34, 35; 1Jan 5:3) Dehnya da chree tingz weh wi ku du fi injai wi Baibl reedin:

• Picha di seen eena yu main, ahn yooz yu sens dehn. Imajin dat yoo dehdeh. Weh yu wuda si, hyaa, ahn smel? How dehn wan weh yu di reed bowt mosi feel?

  

• Chrai difrent wayz fi stodi. Dehnya da sohn aidyaa: Reed owt lowd, er fala lang wail yu di lisn tu wahn aadyo rikaadn. Reed bowt wahn spesifik Baibl karakta er tapik insted a reed di chapta dehn eena aada. Fi egzampl, yooz di Apendiks A7-A, B, C, D, E, F, G ahn H er B12-A ahn B eena di New World Translation of the Holy Scriptures fi reed bowt Jeezas. Reed di hoal chapta fahn weh di dayli teks kohn fram. Reed di buk dehn a di Baibl eena aada; akaadn tu wen dehn mi geh rait.

  

• Reed fi andastan. Fi andastan ahn meditayt pahn eevn wan chapta a day beta dan jos di reed fi reed sayk. Tink bowt wehpaat di akonk tek plays ahn reeli tink bowt di deetayl dehn. Mek shoar yu yooz di map dehn. Wahn nada gud tool da di refrens dehn weh eena di maajin. Du risaach pahn at lees wan point weh yu neva andastan. If ih pasabl, spen di sayhn amonk a taim ih tek yu fi reed, fi meditayt.