LIV YU LAIF AZ WAHN KRISTYAN
Eech Yaa di Kanvenshan Dehn Gi Wi Wahn Apachooniti fi Shoa Lov
Wai wee injai wi anwal kanvenshan dehn soh moch? Jos laik eena di taim a di Izrelait dehn, di kanvenshan dehn tudeh gi wi di apachooniti fi wership Jehoava wid honjridz er eevn towznz a wi bradaz ahn sistaz. Wi lov aala di infamayshan weh wi geh weh help wi fi stay kloas tu Jehoava. Wi aalso injai di taim weh wi spen wid wi frenz ahn famili. Wi apreeshiayt di kanvenshan dehn soh moch dat wi goh da di chree dayz a di kanvenshan dehn.
Wen wi geh di apachooniti fi meet tugeda, wi noh onli fi tink bowt weh wi ku geh fi wiself, bot wi ku aalso tink bowt how wi ku shoa lov tu adaz. (Ga 6:10; Hee 10:24, 25) Wen wi hoal wahn doa oapm fi wahn brada er wahn sista, er wen wi sayv di seet dehn weh wi onli wahn need, wi shoa dat wi di luk owt fi di inchres a wi bradaz ahn sistaz. (Fil 2:3, 4) Di kanvenshan dehn gi wi di apachooniti fi mek nyoo frenz. Bifoa di proagram ahn joorin di lonch brayk, wi ku mek it wi goal fi taak tu peepl weh wi noh noa. (2Ko 6:13) Di frenship dehn weh wi divelop da di kanvenshan dehn ku laas fareva. Moa dan eniting els, wen ada peepl si wi di shoa chroo lov tu wan anada, dehn mait waahn staat serv Jehoava tu.—Jan 13:35.
WACH DI VEEDYO DI ‘LOV LAAS FAREVA’! INTANASHANAL KANVENSHAN DEHN AHN DEN ANSA DEHNYA KWESCHAN:
How di bradaz ahn sistaz fahn ada konchriz mi feel di lov da di 2019 intanashanal kanvenshan dehn?
Wai di yooniti ahn lov weh Jehoava peepl ga soh amayzin?
Wat da som a di wayz fi shoa lov weh di membaz a di Govanin Badi mi taak bowt?
How yu ku shoa lov da wi kanvenshan dehn?
How lov mi help di bradaz ahn sistaz da Germany ahn South Korea fi stay yoonaitid?
Weh wi shuda chrai wi bes fi du?