How Teknalaji Afek Yu Frenship Wid Adaz?
Tanks tu teks mesij, eemayl, veedyo kaal, ahn soashal meedya, peepl ku kamyoonikayt eezi-wan, eevn if dehn liv faar fahn eech ada. Dehn yooz teknalaji eena wahn gud way.
Bot, sohn peepl onli yooz teknalaji fi kamyoonikayt wid dehn frenz. Dehnya da som a di prablemz weh dehn ku fays:
Dehn noh andastan dehn frenz feelinz.
Dehn feel loanli ahn dipres.
Dehn tink moa bowt dehnself insteda dehn frenz.
WEH YU SHUDA NOA
ANDASTAN ADA PEEPL FEELINZ
If wi waahn andastan wi fren feelinz, wi need fi tek di taim fi tink bowt ahn. Dis reeli haad fi du if wi di spen wahn lata taim di sen teks mesij an deh pahn soashal meedya.
If yu geh wahn lata mesij, ih wahn bee haad fi rispan tu wahn mesij weh wahn fren sen yu. Yu mait feel soh loadid dong dat yu mait waahn hori rispan tu aala di mesij dehn, noh kay if dehn impoatant er nat, ahn yu mait noh riyalaiz dat wan a yu frenz reeli need yu help.
TINK BOWT DIS: Wen yu di yooz teknalaji fi kamyoonikayt wid yu frenz, how yu ku shoa dat yu reeli kay bowt dehn?—1 PEETA 3:8.
SOASHAL MEEDYA KU MEK PEEPL FEEL LOANLI AHN DIPRES
Wahn stodi shoa dat wahn lata peepl mi feel wers afta dehn spen taim pahn soashal meedya. Di stodi mi aalso shoa dat wen peepl luk pahn ada peepl pichaz ahn pahn weh aal dehn di du, ih ku mek dehn “feel laik dehn ways dehn taim.”
Aalso, wen peepl poas dehn bes pichaz, ih ku mek adaz weh luk pahn dehn feel laik if fi dehn laif noh az inchrestin er speshal. Dat da bikaaz soashal meedya mek ih luk laik if ada peepl aalwayz di ga fon, bot wee mait feel laik fi wee laif boarin.
TINK BOWT DIS: Wen yoo di yooz soashal meedya, weh yu ku du fi noh kompyaa yuself wid adaz?—GALAYSHANZ 6:4.
WEN YU ONLI TINK BOWT YUSELF
Wahn teecha mi seh dat som a ih styoodents selfish ahn dehn onli tink bowt dehnself. Dehn onli waahn frenz weh wuda du tingz fi dehn ahn weh wuda ga dehn bak. Wahn persn laik dat mait tink dat ih frenz da laik wahn ap pahn wahn divais. Dehn yooz it wen dehn need it ahn kloaz it wen dehn noh need it.
TINK BOWT DIS: Di tingz weh yu poas onlain shoa dat yu laik kompeet er dat yu onli di tink bowt yuself? —GALAYSHANZ 5:26.
WEH YU KU DU
HUMOCH TAIM YU SPEN PAHN TEKNALAJI?
Wen da yoo di kanchroal teknalaji, ih wahn help yu fi kamyoonikayt wid yu frenz an unu frenship ku geh eevn schranga.
BAIBL PRINSIPL: “Lov . . . noh tink onli bowt ih oanself.”—1 KORINTYANZ 13:4, 5.
Pik di sojeshanz weh yu wuda waahn chrai, er rait dong yu oan aidyaaz.
Chrai taak tu peepl insteda jos teks dehn er sen dehn wahn eemayl
Put yu foan sohnweh wehpaat ih noh wahn dischrak yu wen yu di taak tu sohnbadi er put it pahn sailent
Noh spen tu moch taim pahn soashal meedya di luk pahn weh ada peepl poas
Lisn gud wen sohnbadi di taak
Kantak wahn fren weh di goh chroo wahn haad taim