WAHN WERL WEH FUL OP A PRABLEMZ

1 | Protek Yu Helt

WAI IH IMPOATANT?

Wen prablemz kom op er wen wahn dizaasta hapm, ih ku afek wi helt eena lata difrent wayz.

Wen terabl tingz hapm, peepl ku feel schres owt. Ahn peepl yoozhwali geh sik wahn lat wen dehn deh anda soh moch schres fi wahn lang taim.
Wen prablemz kom op er wahn dizaasta hapm, wahn lata peepl ku geh sik sayhn taim ahn dat ku bee haad fi di haaspital dehn. Dehn mait nat eevn ga inof medisn fi evribadi.
Wen dehnya bad tingz hapm ih afek peepl, soh dehn fain it haad fi pay fi di tingz weh dehn reeli need laik food ahn medisn.

Impoatant Tingz Weh Yu Need fi Noa:

Wen yu ga seeryos helt prablemz ahn lata schres, ih ku afek di disizhanz weh yu mek, an ih ku stap yu fahn du tingz weh gud fi yu helt. Ahn dat ku mek yu geh eevn moa sik.
If yu noh tek kayr a yu helt prablemz, dehn ku geh wers an eevn kil yu.
If yu stay helti, ih ku help yu mek gud disizhanz eevn wen prablemz kom op.
Noh mata if yu rich er poa, yu ku stil du tingz fi tek kayr a yu helt.

Sohn Tingz Weh Yu Ku Du Now

Weneva pasabl, wahn waiz persn si di daynjaz ahn du aal weh ih kud fi avoid dehn. Wen ih kohn tu wi helt, wi waahn kip wiself ahn wi hows kleen fi protek wiself fahn daynjaz laik dizeez. Ih beta fi bee sayf dan sari.

“Wen wi kip wiself ahn wi hows kleen, wi sayv di moni weh wi wuda spen da dakta er pahn medisn.”—Andreas.a

a Som a di naym dehn chaynj eena dis magazeen.

HOW FI DEEL WID DI PRABLEM—Sohn Tips Weh Ku Help Yu

Wen prablemz kom op er wahn dizaasta hapm, fala dehnya sojeshanz fi tek kayr a yu helt

KIP YUSELF AHN YU HOWS KLEEN

Kip yuself ahn yu hows kleen

Di Baibl seh: “Di waiz persn si di daynja ahn haid ihself.” (Proverbs 22:3) Tink bowt eni daynja weh ku afek yu helt ahn chrai avoid dehn.

Kip di wash yu han wid soap ahn waata, espeshali bifoa yu toch eniting weh da fi eet er afta yu yooz di baachroom.
Kleen ahn sanitaiz yu hows regyula, espeshali di ting dehn weh yu toch wahn lat.
Az moch az pasabl, chrai yu bes fi avoid goh kloas tu peepl weh ga wahn dizeez weh eezi fi spred.

EET HELTI FOOD

Eet helti food

Di Baibl seh: “No man eva hayt ih oan badi, bot ih feed it ahn cherish it.” (Ifeezhanz 5:29) Wi shoa dat wi lov wi badi wen wi:

Jrink inof waata.
Eet difrent kaina froots ahn vejitablz.
Noh eet tingz weh gat een lata fat, saalt, ahn shuga.
Noh yooz tubaako er abyooz alkohol er eni kaina jrogz.

“Wi chrai wi bes fi noh geh sik, soh wi chrai eet helti food; if wi noh du dat, wi wuda spen di lee bit a moni weh wi mek pahn dakta ahn medisn. Wi rada spen wi moni di bai helti food.”—Carlos.

GET INOF SLEEP AN EKSASAIZ

Eksasaiz

Di Baibl seh: “Ih beta fi get inof res dan fi werk ekschra haad ahn di chays afta loan breez.” (Ecclesiastes 4:6) Wi need fi werk, bot wi aalso need fi geh inof sleep.

Mek shoar fi eksasaiz. Wan way yu ku staat du dat da fi goh fi wahn waak evri day. Wen yu stay fizikali aktiv, ih ku help yu feel beta eevn if yu oalda, if yu ga wahn disabiliti, er if yu ga wahn seeryos helt prablem.
Get inof sleep

Get inof sleep. If yu noh geh inof sleep, dis ku mek yu feel schres owt an ih ku eevn afek yu kansenchrayshan. Eena di langa ron, ih ku mek yu ga seeryos helt prablemz.
Set wahn taim fi goh sleep weh gud fi yu, ahn stik tu it. Chrai goh sleep ahn wayk op di sayhn taim evri day.
Chrai noh wach TV er yooz wahn ilekchranik divais wen yu deh eena bed ahn yu redi fi goh sleep.
Bifoa yu goh sleep chrai noh eet wahn lat, noh jrink tingz weh gat een kaafeen, ahn noh jrink alkohol.

“Ai noatis dat di amonk a sleep Ah get veri impoatant fi mi helt. If Ah noh sleep inof, sohntaim ih wuda mek Ah ga hedayk ahn mi badi wuda feel laik ih deh eena payn. Bot wen Ah doo sleep inof, Ah feel gud an Ah ga di enerji fi du aal weh Ah need fi du! Pahn tap a dat, Ah noh geh sik aafn.”—Justin.