WAHN WERL WEH FUL OP A PRABLEMZ

2 | Protek Yu Moni ahn di Tingz Weh Yu Oan

WAI IH IMPOATANT?

Wahn lata peepl schrogl evri day fi geh di tingz weh dehn reeli need. Bot sad fi seh, di prablemz eena dis werl mek it eevn haada. Wai wi seh dat?

Wen dehn ga prablemz eena wahn ayrya, tingz laik food ahn wahn plays fi liv ku geh moa ekspensiv.
Wen prablemz kom op er wahn nachral dizaasta hapm, peepl ku looz dehn jab er dehn mait eevn haftu werk fi les moni.
Wen wahn dizaasta hapm, ih ku dischrai peepl bizniz, dehn hows, er ada tingz weh dehn oan. Dis mek wahn lata peepl en op poa.

Impoatant Tingz Weh Yu Need fi Noa:

If yu yooz yu moni eena wahn waiz way, ih pasabl dat yu wahn ku deel wid eni prablem weh wuda kom op er wen wahn dizaasta hapm.
Memba dat di moni weh yu mek, yu sayvinz, ahn di tingz weh yu oan, ku looz dehn valyu.
Dehn ga tingz weh moni kyaahn bai, laik hapinis ahn wahn yoonaitid famili.

Sohn Tingz Weh Yu Ku Du Now

Di Baibl seh: “Az lang az wi ga food fi eet ahn kloaz fi wayr wi wahn bee kantentid.”—1 Timoti 6:8.

Wen yu kantentid, ih meenz dat yu noh wahn aalwayz chrai geh weh yu waahnt, ahn dat yu wahn hapi wen yu ga di tingz weh yu need. Dis impoatant espeshali wen yu ga lee bit a moni.

Fi bee kantentid, yu haftu laan fi spen les moni. If yu spen moa moni dan weh yu mek, yu wahn en op wid moa moni prablemz.

HOW FI DEEL WID DI PRABLEM—Sohn Tips Weh Ku Help Yu

Wen prablemz kom op er wahn dizaasta hapm, fala dehnya sojeshanz fi protek yu moni ahn di tingz weh yu oan

SPEN LES MONI

Ga wahn bojet

Noh spen moni pahn tingz anles yu reeli need it. Aks yuself: ‘Ai reeli need wahn kaar? Insteda bai froots ahn vejitablz, Ah ku plaant mi oan eena mi gyaadn?ʼ
Bifoa yu bai sohnting, aks yuself: ‘Ai reeli need dis? Ai ku afoad dis?ʼ
Mek yoos a di help weh di govament er eni ada aaganaizayshan aafa.

“Wi mi sidong az wahn famili ahn wi luk pahn how wi mi-di spen moni. Wi kot dong pahn di amonk a moni wi spen pahn entataynment, ahn wi staat tu kuk food weh noh ekspensiv.”—Gift.

GA WAHN BOJET

Spen les moni

Di Baibl seh: “Wahn persn weh werk haad mek planz, an ih wahn ga sokses, bot aal hoo haysti wahn bee poa.” (Proverbs 21:5) Wahn bojet wahn help yu mek shoar dat yu noh spen moa moni dan weh yu mek.

Fers, rait dong humoch moni yu tink yu wahn mek fi di mont.
Neks, mek wahn lis a di mayn ekspens dehn laik food, lait bil, ahn rent. Si if unu ku mek sohn chaynjiz ahn spen les moni.
Den, mek shoar yu ga inof moni fi di tingz weh yu need. If yu noatis dat yu noh gat inof moni, den kot dong er tek owt tingz fahn yu lis weh yu noh reeli need.

“Eech mont, wi rait dong humoch moni wi mek ahn humoch wi spen. Mee ahn mi waif chrai kip wahn lee moni wan said in kays eni imerjensi wuda kom op, ahn fi tingz weh wi noa wi mait haftu bai eena di fyoocha. Bikaaz a dis, wi ga les schres kaaz wi noa heda taim how wi wahn yooz di moni weh wi mek.”—Carlos.

CHRAI NOH OA MONI / GA SOHN SAYVINZ

Chrai noh oa moni / ga sohn sayvinz

If yu oa moni, chrai mek wahn plan fi pay it aaf. If ih pasabl, chrai noh geh wahn loan, oa, er baro moni non ataal. Insted, chrai sayv op fi bai weh yu need.
Sayv sohn moni eech mont fi eni ekspens weh ku kom op eena di fyoocha.

WERK HAAD / HOAL AAN TU YU JAB

Di Baibl seh: “Gud kohn fahn evri kaina haad werk.”—Proverbs 14:23.

Werk haad / hoal aan tu yu jab

Bee tankful fi di jab weh yu ga. Eevn if da noh di jab weh yu mi wish fi ga, ih help yu fi put bred pahn di taybl.
Werk haad ahn mek peepl chros yu. Dis ku help yu kip yu jab er, eevn if yu en op di looz yu jab, ih ku help yu fain wahn nada wan.

“Wans da wahn jab weh Ah ku du, Ah tek wateva jab avaylabl, eevn if Ah noh laik it er if dehn pay lee bit. Ah aalwayz chrai mek peepl chros mi an Ah du gud werk. Ah gi mi bes laik if Ah di werk fi miself.”—Dmitriy.

Weh yu ku du if yu di luk fi wahn jab?

Tek di fers step. Kaal di difrent bizniz dehn weh mait ga wahn jab weh yu ku du, eevn if dehn noh ga no pozishan oapm. Mek yu frenz ahn famili noa dat yu di luk fi wahn jab.
Noh bee piki. Yu mait noh fain yu jreem jab.