WAHN WERL WEH FUL OP A PRABLEMZ

3 | Protek di Peepl Weh Yu Lov

WAI IH IMPOATANT?

Di prablemz eena di werl di kaaz moa ahn moa schres, ahn dis ku mek lata peepl jraa weh fahn di wan dehn weh dehn lov.

Peepl noh waahn spen taim wid dehn frenz.
Koplz noh chreet eech ada eena wahn kain way.
Payrents pay lee bit er no main tu di prablemz weh dehn pikni di goh chroo.

Impoatant Tingz Weh Yu Need fi Noa:

Espeshali joorin haad taimz, ih impoatant fi ga frenz bikaaz dehn help yu stay helti eena wahn fizikal an imoashanal way.
Di schres weh dis werl bring ku mek yu famili fays prablemz weh dehn neva mi-di ekspek.
Wen chiljren hyaa er wach di terabl tingz weh di hapm pahn di nyooz, dehn ku staat tu feel frayd, ahn dehn payrents mait nat eevn riyalaiz it.

Sohn Tingz Weh Yu Ku Du Now

Di Baibl seh: “Wahn chroo chroo fren shoa lov aala di taim; ih da wahn brada weh baan fi wen taimz haad.”—Proverbs 17:17.

Goh tu wahn fren weh ku help yu ahn gi yu gud advais. Dehndeh lovin frenz wahn help yu fi ga di schrent fi noh giv op wen yu di fays chalenjiz.

HOW FI DEEL WID DI PRABLEM—Sohn Tips Weh Ku Help Yu

Fala dehnya sojeshanz fi protek di peepl weh yu lov wen prablemz kom op

MEK YU MARIJ SCHRANGA

Mek yu marij schranga

Di Baibl seh: “Too beta dan wan . . . Kaaz if wan a dehn faal dong, di ada wan ku pik ahn op.” (Ecclesiastes 4:9, 10) Marid koplz shuda werk tugeda az wahn teem, noh gens eech ada.

Werk haad fi ga payshens wid eech ada. If yu di schres owt ahn yu di fays prablemz, noh tek it owt pahn yu marij mayt.
At lees wan taim fi di week, taak tu yu marij mayt bowt eni prablemz yu mait gat. Memba fi atak di prablem, noh eech ada.
Mek taim fi du tingz tugeda weh di too a unu injai fi du.
Tink bowt di gud taimz eena unu laif tugeda, maybi unu ku luk pahn pichaz a unu wedn er eni ada gud memriz weh unu ga tugeda.

“Wahn kopl mait noh gree pahn evriting, bot dat noh meenz dat dehn kyaahn werk tugeda az wahn teem. Wahn kopl ku mek wahn disizhan tugeda ahn den werk tugeda fi mek dehn disizhan ga sokses.”—David.

SPEN TAIM WID FRENZ

Spen taim wid yu frenz

Wi noh onli waahn geh help fahn wi frenz, bot wi waahn tink bowt wayz how wi ku giv dehn di help weh dehn need. Wen yu schrentn adaz, yu schrentn yuself.
Evri day chrai kantak som a yu frenz fi si how dehn di du.
Aks yu frenz how dehn mi deel wid di chalenjiz weh simila tu di wanz weh yoo di goh chroo.

“Prablemz eena laif da laik wahn big staam. Wen di rayn ahn breez mek it haad fi mek yu si, yu frenz dehdeh fi help yu noa wehpaat yu deh ahn wehpaat yu need fi goh, eevn if da jos fi rimain yu bowt tingz weh yu don noa aredi. Yu frenz kay bowt yu, ahn dehn noa dat yoo kay bowt dehn tu.”—Nicole.

HELP YU PIKNI

Help yu pikni

Di Baibl seh: “Wahn persn shuda aalwayz bee redi fi lisn, bot ih fi tek ih taim bifoa ih taak.” (Jaymz 1:19) At fers, yu pikni mait noh waahn ekspres how dehn feel, bot if yu payshent ahn lisn tu dehn, yu wahn help dehn fi taak bowt how dehn feel.

Mek yu chiljren feel komfatabl fi taak bowt how dehn feel. Dehn ga sertn taimz wen chiljren feel moa komfatabl fi taak. Fi egzampl, ih eeziya wen dehn di tek wahn waak er goh fi wahn raid. Dehn wuda prifaa fi du dat insteda sidong ahn taak fays-tu-fays wid dehn payrents.
Mek shoar dat yu chiljren noh di si er hyaa tu moch bad nyooz.
Mek yu chiljren noa weh aal yu don du fi help yu famili stay sayf.
Ga wahn plan fi wen wahn imerjensi wuda kom op, ahn praktis it wid yu chiljren.

“Taak tu yu chiljren, an alow dehn fi ekspres how dehn feel. Dehn mait di haid how dehn feel; dehn mait feel frayd, angshos, er beks. Bot mek dehn noa dat yoo schrogl wid dehndeh sayhn feelinz, ahn mek dehn noa how yoo mi deel wid dehn.”—Bethany.