Di Grayt Flod—Hoo Mi Lisn? Hoo Neva Lisn?

Moas a di peepl dehn eena Noawa dayz mi-di du weh bad. Genesis 6:5

Di ert geh ful a peepl bikaaz Adam ahn Eev mi had pikni. Az taim gaan aan, sohn ada aynjel gaahn gayntz Gaad, jos laik Saytan.

Dehn mi waahn marid tu di uman dehn, soh dehn kohn tu di ert ahn chaynj dehnself intu man. Di uman dehn baan sohn big pikni, weh mi schrang ahn kruwil.

Di werl mi ful a peepl weh bad. Di Baibl seh: “Di wikidnis a man mi-di tek oava di ert, ahn evriting weh ih tink bowt ahn evriting weh ih haat dizaiya, da-mi loan badnis aal di taim.”

Noawa mi lisn tu Gaad ahn bil di aak. Genesis 6:13, 14, 18, 19, 22; Heebrooz 11:7

Noawa da-mi wahn gud man. Jehoava mi tel Noawa dat ih wahn dischrai aala di wikid peepl wid wahn grayt flod.

Den, Gaad tel Noawa fi bil wahn aak, weh da laik wahn big boat. Noawa mi fi kehr ih famili ahn aal kaina animal een deh bifoa di Flod kohn.

Noawa mi waan peepl bowt di Flod weh mi fi kohn, bot dehn neva lisn. Som a dehn laaf aata Noawa ahn som a dehn get fi hayt ahn.

Wen Noawa don bil di aak, ih kehr aala di animal dehn eensaid.