How Yu Ku Geh Kloas tu Gaad?

1. Yu tink Gaad lisn tu evribadi pryaaz?

Gaad invait aal kaina peepl fi geh kloas tu hihn chroo pryaa. (1 Jan 5:14) Bot, hihn noh lisn tu, er aksep, evribadi pryaaz. Fi egzampl, if wahn man chreet ih waif bad, Gaad noh wahn lisn tu ih pryaaz. (1 Peeta 3:7) Wen di Izrelait dehn mi kantinyu du wikidnis, Gaad neva waahn hyaa dehn pryaaz needa. Noh mek no mistayk bowt dis, da wahn privilij fi pray. Stilyet, Gaad wahn aksep pryaaz fahn peepl weh ripent, eevn if dehn yoostu sin bad.​—Reed Isaiah 1:15; 55:7.

Wach di veedyo Yu Tink Gaad Lisn tu Aal Pryaaz?

2. How wi sopoas tu pray?

Wi shuda pray onli tu Jehoava, fi wee Kriyayta, bikaaz pryaa da paat a fi wee wership. (Machyu 4:10; 6:9) Bikaaz wi noh perfek, wi fi pray chroo Jeezas naym kaa hihn ded fi fi wee sin dehn. (Jan 14:6) Jehoava noh waahn wi jos ratl aaf wahn hoal lata ting oava ahn oava er yooz wahn pryaa buk. Gaad waahn wi pray tu ahn fahn wi haat.​—Reed Machyu 6:7; Filipiyanz 4:6, 7.

Eevn if wi pray eena wi main, fi wee Kriyayta stil ku hyaa wi. (1 Samuel 1:12, 13) Hihn invait wi fi pray tu ahn enitaim, laik wen wi wayk op da maanin ahn bifoa wi goh sleep da nait, wen wi eet, ahn wen wi goh chroo prablemz.​—Reed Machyu 15:36; 1 Peeta 5:7.

3. Wai Kristyanz meet tugeda?

Ih noh eezi fi geh kloas tu Gaad bikaaz wi liv rong peepl weh noh ga lata fayt. Dehn tek Gaad pramis bowt pees pahn di ert mek papishoh. (2 Timoti 3:1, 4; 2 Peeta 3:3, 13) Wi need fi deh rong wi Kristyan bradaz ahn sistaz soh dehn ku inkorij wi, ahn wee ku inkorij dehn tu.​—Reed Heebrooz 10:24, 25.

Wen wi spen taim wid peepl weh lov Gaad, ih help wi fi geh kloas tu Gaad. Di meetin dehn weh eech kangrigayshan a Jehoava Witnisiz ga, gi wi di apachooniti fi inkorij wan anada.​—Reed Roamanz 1:11, 12.

4. How yu ku geh kloas tu Gaad?

If yu waahn geh kloas tu Jehoava, yu hafu tek di taim fi goh oava ahn oava di tingz weh yu laan fahn di Baibl. Put aala yu haat intu weh yu di laan bowt hihn, ih advais, ih pramis dehn, ahn evriting weh ih du. If wi reeli kansida aala dehnya tingz eena wi pryaaz, wi wahn geh fi andastan wai Gaad lov ahn wizdom soh impoatant.​—Reed 1 Timoti 4:15,16.

Onli if yu ga fayt eena Gaad, yu ku geh kloas tu hihn. Bot fayt da laik wahn plaant weh need waata ahn son fi mek ih groa. Yu fayt wahn groa wen yu kip di goh oava di reezn wai yu bileev aal weh yu bileev.​—Reed Machyu 4:4; Heebrooz 11:1, 6.

5. How yu wahn benifit if yu kantinyu geh kloasa tu Gaad?

Jehoava tek kayr a dehn wan weh lov ahn. Hihn ku protek dehn fahn eniting weh ku mes op dehn fayt, ahn fahn eniting weh ku mek dehn looz owt pan di hoap fi liv fareva. (Psalm 91:1, 2, 7-10) Hihn gi wi wahn waanin fi noh liv wahn kaina laif weh ku afek wi helt, ahn weh ku mek wi looz wi hapinis. Jehoava teech wi how fi liv di bes way pasabl.​—Reed Jaymz 1:25; 4:4, 8.