SEKSHAN 3
How fi Setl Marij Prablemz
“Unu fi lov wan anada wid chroo chroo lov, bikaaz lov kova oava lata sin.”—1 Peeta 4:8
Wen yoo ahn yu marij paadna staat unu laif tugeda, unu wahn fays difrent prablemz. Dis mait bee sayka weh unu noh tink ahn feel di sayhn way, er sayka di way how unu mi rayz op. Prablemz ku kom op fahn owtsaida unu marij, er eevn fahn tingz weh unu noh ekspek.
Sohntaim ih eeziya fi ak laik no prablem deh, bot di Baibl inkorij wi fi deel wid wi prablem dehn. (Machyu 5:23, 24) Yu wahn fain owt dat di bes way fi setl prablemz da fi aplai di prinsipl dehn fahn di Baibl.
1 TAAK BOWT DI PRABLEM
WEH DI BAIBL SEH: “Wahn . . . taim deh fi taak.” (Ecclesiastes 3:1, 7) Mek shoar dat yu tek taim fi taak bowt di prablem. Bee aanis wen yu di tel yu hozban er waif how yu feel er weh yu tink bowt wahn sertn prablem. Aalwayz “tel di chroot” tu yu marij paadna. (Ifeezhanz 4:25) Eevn wen yu fain it haad fi kip yu feelinz anda kanchroal, noh geh beks. Wen yu ansa eena wahn kaam way, ih wahn help kip di sichuwayshan anda kanchroal soh ih noh ton intu wahn big aagyument.—Proverbs 15:4; 26:20.
Eevn if yu noh gree pahn sohnting, yu ku stil bee kain ahn lovin tu yu hozban er waif ahn shoa ahn rispek. (Koloashanz 4:6) Chrai fiks di prablem dehn az soon az pasabl, ahn noh stap taak tu wan anada.—Ifeezhanz 4:26.
WEH YU KU DU:
Set wahn gud taim fi taak bowt di prablem
Wen da yu tern fi lisn, chrai haad noh fi intarop. Yu wahn geh yu tern fi taak
2 LISN AHN ANDASTAN
WEH DI BAIBL SEH: “Unu fi lov wan anada . . . ahn unu fi bee hapi fi aana unu bradaz ahn sistaz moa dan how unu aana unuself.” (Roamanz 12:10) Di way how yu lisn impoatant. Chrai fi andastan how yu marij paadna tink, ahn bee “kain ahn hombl.” (1 Peeta 3:8; Jaymz 1:19) Noh jos ak laik yu di lisn. Wen ih pasabl, stap wateva yu di du ahn gi aala yu atenshan tu yu hozban er waif. If dat noh pasabl, aks ahn if unu ku taak bowt it laytaraan. If yu tink bowt yu marij paadna az yu fren insteda yu enimi, yu “noh wahn eezi fi geh beks.”—Ecclesiastes 7:9.
WEH YU KU DU:
Bee wilin fi lisn, eevn if yu noh laik weh yu di hyaa
Noatis di way how yu marij paadna di ak ahn how ih di taak tu yu fi help yu andastan weh ih reeli di seh
3 DU WEH UNU DISAID FI DU
WEH DI BAIBL SEH: “Gud kohn fahn evri kaina haad werk, bot loan werdz wahn mek yu en op wid notn.” (Proverbs 14:23) Unu hafu mek shoar dat unu du weh unu mi disaid fi du, noh jos seh unu wahn du it. Dis mait tek lata haad werk, bot ih wert it. (Proverbs 10:4) If unu werk tugeda az wahn teem, unu wahn “hav wahn gud riwaad” fi unu haad werk.—Ecclesiastes 4:9.
WEH YU KU DU:
Disaid weh eech wan a unu wahn du fi help fiks di prablem
Evri now an agen, chek pahn how unu di du