Gaad Mek di Fers Man ahn Wuman

Jehoava mi mek wahn gyaadn da Eedn. Di gyaadn mi ga lata flowaz, chreez, an animalz. Den Jehoava mek di fers man, Adam. Ih mi yooz dos fahn di grong fi mek di man badi, ahn wen ih bloa eena ih noaz, di man kom tu laif. Jehoava mi mek Adam tek kayr a di gyaadn, an ih tel ahn fi naym aala di animal dehn.

Jehoava mi giv Adam wahn impoatant koman. Ih tel ahn: ‘Yu ku eet fahn aala di chree dehn, bot noh eet fahn wan speshal chree. If yu eet fahn da chree, yu wahn ded.ʼ

Laytaraan, Jehoava mi seh: ‘Ah wahn mek sohnbadi weh ku help ahn.ʼ Soh ih mi mek Adam jrap asleep, den ih tek wahn rib fahn owta Adam an ih mek wahn waif far ahn. Fi shee naym da-mi Eev. Adam ahn Eev da-mi di fers famili pahn ert. How Adam mi feel wen ih si ih waif? Hihn mi soh hapi dat ih seh: ‘Luk weh Jehoava mek owta mai rib! Ah fainali ga sohnbadi weh da laik mee!ʼ

Jehoava mi tel Adam ahn Eev fi ga chiljren ahn ful op di ert wid peepl. Jehoava mi waahn dehn injai werk tugeda ahn mek di hoal ert bee wahn paradais. Hihn mi waahn ih bee jos laik di gyaadn da Eedn. Bot dat neva hapm. Wai? Mek wi fain owt eena di neks lesn.