Hoo Da-Mi Joab?

Joab da-mi wahn man weh mi wership Jehoava, ahn hihn mi liv da wahn plays weh naym Oz. Hihn mi ga wahn big famili an ih mi rich. Hihn da-mi wahn kain persn. Ih mi help poa peepl, di laydi weh dehn hozban mi ded, ahn chiljren weh neva ga no ma ahn pa. Joab mi aalwayz du weh rait, bot yu tink dat bikaaz a dat ih neva ga prablemz?

Joab neva noa, bot Saytan mi-di wach ahn. Jehoava mi tel Saytan: ‘Yu si mi servant Joab? Dehn noh ga nobadi laik hihn pahn ert. Hihn lisn tu mi ahn du weh rait.ʼ Saytan ansa ahn: ‘Af koars Joab obay yu. Yoo protek ahn, an bles ahn. Yoo giv ahn lan an animal. Bot tek weh evriting weh ih gat, ahn yu wahn si how ih wahn stap wership yu.ʼ Jehoava mi seh: ‘Yu ku du eniting tu Joab. Bot yu noh fi kil ahn.ʼ Wai Jehoava mi seh dat? Hihn mi noa dat Joab neva mi wahn stap obay ahn.

Saytan mi tes Joab wid wan ting afta di ada. Fers, hihn mi sen sohn peepl weh dehn kaal di Sabeeyanz fi teef Joab kow ahn dongki dehn. Den, wahn faiya kil aala Joab sheep. Neks, wahn nada groop a peepl, di Kaldeeyanz, mi teef ih kyamil dehn. Ahn dehndeh saym peepl mi kil ih servants weh mi-di luk afta ih animalz. Bot sohnting wers mi hapm afta dat. Aala Joab chiljren mi ded wen di hows wehpaat dehn mi deh eena mi jrap pahn dehn. Joab mi veri sad, bot hihn neva stap wership Jehoava.

Saytan mi waahn Joab sofa eevn moa, soh ih mek Joab geh sohn terabl bail aal oava ih badi. Bikaaz a dat, hihn mi deh eena lata payn. Hihn neva noa wai dehndeh ting mi-di hapm tu ahn, bot hihn mi kantinyu wership Jehoava. Wen Gaad mi si how Joab mi deel wid di sichuwayshan, Hihn mi hapi.

Den Saytan mi sen chree man fi tes Joab. Dehn tel ahn: ‘Yoo mosi mi sin gens Gaad ahn yu di chrai haid it. Now Gaad di ponish yu.ʼ Joab mi seh: ‘Ai neva du notn rang.ʼ Bot den hihn mi staat tu tink dat Jehoava mi-di kaaz dehndeh prablemz. An ih seh dat Gaad neva fyaa wid ahn.

Wahn yong man weh naym Ilaihoo mi kwaiyet az ih mi-di lisn tu di kanvasayshan. Den ih taak op ahn seh: ‘Aal weh unu seh rang. Wee kuda neva andastan humoch powa Jehoava gat. Hihn kuda neva du sohnting bad. Hihn si evriting an ih help peepl wid dehn prablemz.ʼ

Den Jehoava mi taak tu Joab. Ih seh: ‘Wehpaat yu mi deh wen Ai mek di hevn ahn di ert? Wai yu seh dat Ai noh fyaa? Yu taak widowt yu eevn noa wai tingz hapm.ʼ Joab mi admit ih mistayk an ih seh: ‘Ai mi rang. Ah mi hyaa bowt yu, bot now Ah reeli noa yu. Notn ku stap yu fahn du eniting. Ah rigret weh Ah seh.ʼ

Wen evriting mi oava, Jehoava mi mek Joab helti agen, an ih giv ahn moch moa dan weh ih mi ga bifoa. Joab mi liv wahn lang ahn hapi laif. Jehoava mi bles Joab kaaz ih mi lisn tu ahn eevn wen ih neva eezi fi du. Yoo wahn bee laik Joab ahn kantinyu wership Jehoava, noh mata weh hapm?