Di Prikl Bush Mi Deh Pahn Faiya

Moaziz mi liv da Midiyan fi 40 yaaz. Joorin da taim, hihn mi geh marid an ih mi ga chiljren. Wahn day wen hihn mi-di tek kayr a ih sheep kloas tu Mongt Sainai, ih mi si sohnting amayzin. Wahn prikl bush mi deh pahn faiya, bot ih neva mi-di bon. Wen Moaziz gaahn kloasa fi chek it owt, ih hyaa wahn vais eensaida di bush weh tel ahn: ‘Moaziz! Noh kohn kloasa. Tek aaf yu sandalz bikaaz yu di stan op pahn hoali grong.ʼ Da Jehoava weh mi seh dat, bot hihn mi yooz wahn aynjel fi taak tu Moaziz.

Moaziz mi frayd, soh ih kova ih fays. Di vais tel ahn: ‘Ah si humoch di Izrelait dehn di sofa. Ah wahn reskyu dehn fahn di Ijipshanz an Ah wahn kehr dehn tu wahn gud lan. Yoo wahn bee di wan hoo wahn tek owt mi peepl fahn Eejip.ʼ Yu tink Moaziz mi sopraiz fi hyaa dat?

Moaziz mi aks: ‘Weh Ah fi tel dehn if dehn aks hoo sen mi?ʼ Gaad ansa ahn: ‘Tel dehn dat da Jehoava, di Gaad a Aybraham, di Gaad a Aizak, ahn di Gaad a Jaykob sen yu.ʼ Den Moaziz mi tel ahn: ‘Wat if dehn noh lisn tu mi?ʼ Soh Jehoava gi Moaziz proof dat Hihn mi wahn help ahn. Moaziz mi ga wahn stik eena ih han, ahn Jehoava mi tel ahn fi chroa it pahn di grong. Den di stik mi ton intu wahn snayk! Wen Moaziz mi grab di snayk fan ih tayl, di snayk mi ton bak intu wahn stik. Jehoava tel ahn: ‘Wen yu du dis mirakl, ih wahn proov dat Ai sen yu.ʼ

Moaziz tel ahn: ‘Ai kyaahn taak gud.ʼ Jehoava mi pramis ahn: ‘Ai wahn tel yu weh fi seh, an Ah wahn sen yu breda Ayron fi help yu.ʼ Sins Moaziz mi noa dat Jehoava mi wahn help ahn, ih kehr ih waif an ih son dehn wid ahn bak da Eejip.