Wahn Nyoo Leeda ahn Too Brayv Wuman

Jashwa mi leed Jehoava peepl fi lata yaaz, hihn mi ded wen ih mi 110 yaaz oal. Wail hihn mi stil alaiv, di Izrelait dehn mi wership Jehoava. Bot afta Jashwa mi ded, dehn mi staat tu wership aidolz, laik weh di peepl fahn Kaynan mi du. Bikaaz di Izrelaits mi stap fala Jehoava, hihn mi mek di king fahn Kaynan, weh naym Jaybin, mek laif haad fi dehn. Di peepl beg Jehoava fi help dehn. Soh Jehoava mi gi dehn wahn nyoo leeda. Ih naym da-mi Bayrak. Hihn mi help di peepl staat tu wership Jehoava agen.

Debora, hoo da-mi wahn prafit, mi sen fi Bayrak. Shee mi ga wahn mesij fi hihn fahn Jehoava: ‘Kehr 10,000 man, ahn goh meet Jaybin an ih aami da Kaishon Schreem. Rait dehsoh yu wahn ga vikchri oava Sisera, weh da Jaybin aami cheef.ʼ Bayrak tel Debora: ‘Ah gwehn if yoo goh wid mi.ʼ Shee tel ahn: ‘Ai gwehn wid yu. Bot yu noh wahn bee di wan fi kil Sisera, bikaaz Jehoava wahn yooz wahn wuman fi kil ahn.ʼ

Debora gaahn wid Bayrak an ih aami op da Mongt Taybor fi pripyaa fi waar. Az soon az Sisera mi hyaa bowt dat, hihn gyada tugeda aala ih waar chariyat ahn soalja dehn ahn chravl tu di batam a di vali da Kaishon Schreem. Debora tel Bayrak: ‘Tudeh da di day Jehoava wahn gi yu vikchri.ʼ Bayrak ahn di 10,000 man gaahn dong di mongtin fi atak Sisera powaful aami.

Jehoava mek Kaishon Schreem staat tu flod. Den Sisera waar chariyat dehn geh stok eena di mod. Soh hihn lef ih chariyat deh ahn staat tu ron. Bayrak an ih soalja dehn mi kil Sisera hoal aami, bot Sisera mi eskayp! Hihn ron gaahn haid eena wahn laydi tent. Shee mi naym Jayel. Shee mi giv ahn milk fi jrink ahn den hihn jrap asleep ahn shee kova ahn wid wahn blankit. Den Jayel sneek op tu ahn, an den ih hama wahn tent pin chroo ih hed. Den Sisera mi ded.

Bayrak mi-di luk fi Sisera, ahn Jayel step owta ih tent ahn tel ahn: ‘Kom een. Mek Ah shoa yu di man weh yu di luk fa.ʼ Bayrak gaan eena di tent an ih mi si Sisera pahn di grong ded. Bayrak ahn Debora mi prayz Jehoava wid wahn sang bikaaz Ih mi gi dehn vikchri oava dehn enimi. Di peepl fahn Izrel mi liv eena pees fi di neks 40 yaaz.