Root ahn Nayomi

Wen Izrel mi-di goh chroo wahn famin, wahn Izrelait laydi weh naym Nayomi, ih hozban, an ih too son gaahn liv da Moawab. Sohn taim layta, Nayomi hozban mi ded. Ih son dehn marid tu too laydi fahn Moawab, Root an Orpa. Sad fi seh, sohn taim afta dat, Nayomi son dehn ded tu.

Wen Nayomi mi hyaa dat di famin mi oava, shee mi disaid fi goh bak hoam da Izrel. Root an Orpa gaahn wid ahn, bot wail dehn mi-di waak pahn di road, Nayomi tel dehn: ‘Unu da-mi sohn gud waif tu mi son dehn, an unu mi chreet mi gud. Ai waahn too a unu geh marid agen. Goh bak hoam da Moawab.ʼ Dehn tel Nayomi: ‘Wee lov yu! Wi noh wahn lef yu.ʼ Bot Nayomi mi kip di tel dehn fi goh. Orpa en op di gaahn bak hoam, bot Root mi stay. Nayomi tel Root: ‘Orpa di goh bak tu ih peepl ahn tu ih gaad dehn. Wai yu noh goh wid ahn? Goh liv da yu ma hows.ʼ Bot Root tel ahn: ‘Ai noh wahn lef yu bai yuself. Fi yoo peepl wahn bee mai peepl, ahn fi yoo Gaad wahn bee mai Gaad.ʼ How yu tink Nayomi mi feel wen Root tel ahn dat?

Root ahn Nayomi reech Izrel rait wen di baarli haavis mi staat. Wahn day, Root gaahn pik op lefoava grayn eena Boawaz faam. Hihn da-mi Rayhab son. Hihn mi hyaa dat Root da-mi fahn Moawab ahn dat ih mi stay wid Nayomi noh mata wat. Hihn mi tel ih werkaz fi lef sohn grayn eena di lan soh dat Root ku pik it op.

Da sayhn eevnin, Nayomi aks Root: ‘Fahn fi hoo faam yu mi pik op grayn tudeh?ʼ Root tel ahn: ‘Fahn wahn man weh naym Boawaz.ʼ Nayomi tel ahn: ‘Boawaz da mai hozban faamli. Kip di werk wid di ada yong laydi dehn weh werk fi hihn. Nobadi wahn bada yu deh.ʼ

Root mi kantinyu fi werk eena Boawaz faam til di haavis mi don. Boawaz mi noatis dat Root da-mi wahn amayzin wuman ahn dat ih werk haad. Eena dehndeh dayz, if wahn man ded an ih neva ga no son, fi hihn relitiv wuda geh marid tu ih waif. Soh Boawaz mi marid Root. Ahn dehn mi ga wahn son weh naym Oabed, hoo en op di bee King Dayvid grampa. Nayomi fren dehn mi soh hapi. Dehn seh: ‘Fers, Jehoava gi yu wahn gud daata-in-laa, Root, ahn now hihn bles yu wid wahn granson. Mek Jehoava geh aala di prayz.ʼ