Gidiyan Mi Kanka di Midyanait Dehn

Afta sohn taim, di Izrelaits mi ton weh fahn Jehoava agen an dehn staat tu wership faals gaadz. Fi sevn yaaz, di Midyanait dehn mi teef di Izrelait animalz ahn dischrai dehn kraps. Fi get weh fahn di Midyanait dehn, di Izrelaits mi haid eena kayv an eena di mongtin dehn. Dehn mi beg Jehoava fi sayv dehn. Soh Jehoava mi sen wahn aynjel fi taak tu wahn yong man weh naym Gidiyan. Di aynjel tel Gidiyan: ‘Jehoava chooz yoo fi bee wahn maiti soalja.ʼ Gidiyan aks ahn: ‘How Ah wahn sayv Izrel? Ai da noh wahn impoatant persn.ʼ

How Gidiyan mi wahn noa dat Jehoava chooz hihn? Hihn mi put wahn pees a wul pahn di grong an ih tel Jehoava: ‘If joo jrap onli pahn di wul bot di grong rong it jrai da maanin, den Ah wahn noa dat yu chooz mee fi sayv Izrel.ʼ Di neks day, di wul mi wet ahn di grong mi jrai! Bot di neks maanin, Gidiyan mi aks dat di wul stay jrai ahn dat di joo jrap pahn di grong rong it. Wen dat mi hapm, Gidiyan mi kanvins dat Jehoava mi chooz hihn. Soh hihn mi gyada ih soaljaz fi fait gens di Midyanait dehn.

Jehoava mi tel Gidiyan: ‘Ah wahn gi di Izrelaits vikchri. Bot bikaaz yu ga lata soalja, unu mait tink dat unu win di vikchri pahn unu oan. Tel enibadi weh frayd dat ih shuda goh bak hoam.ʼ Soh 22,000 gaahn hoam, ahn 10,000 a dehn mi stay. Den Jehoava tel ahn: ‘Yu stil ga tu moch soalja. Kehr dehn da di spring, ahn tel dehn fi jrink di waata. Kip onli dehn wan weh jrink op di waata fahn dehn han wail dehn di lukowt fi dehn enimi.ʼ Onli 300 a dehn mi deh pahn di lukowt wail dehn mi-di jrink waata. Jehoava mi pramis dat dehndeh lee bit a man mi wahn kanka di 135,000 Midyanait soaljaz.

Joorin da sayhn nait, Jehoava mi tel Gidiyan: ‘Now da di taim fi atak di Midyanait dehn!ʼ Gidiyan mi giv eech wan a ih soalja wahn haan ahn wahn big klay pat wid wahn taach eena it. Hihn mi tel dehn: ‘Wach mi ahn du egzakli weh Ai du.ʼ Gidiyan mi bloa ih haan, brok op ih klay pat, wayv ih taach, ahn hala: ‘Di soad da fi Jehoava ahn fi Gidiyan!ʼ Aala di 300 man mi du di saym ting. Di Midyanait dehn mi fraitn ahn kanfyooz, ahn dehn staat tu atak wan anada. Jehoava mi help di Izrelaits fi kanka dehn enimi agen.