Jehoava Mi Mek Samson Schrang

Lata di Izrelaits gaahn bak gaahn wership aidolz. Soh Jehoava mi mek di Filisteen dehn tek kanchroal oava di Izrelaits. Bot dehn mi ga sohn Izrelaits weh mi lov Jehoava. Wan a dehn da-mi wahn man weh naym Manoawa. Hihn an ih waif neva ga no chiljren. Wahn day, Jehoava mi sen wahn aynjel tu Manoawa waif. Di aynjel mi tel ahn: ‘Yu wahn ga wahn son. Hihn wahn bee di wan fi sayv Izrel fahn di Filisteen dehn. Hihn wahn bee wahn Nazarait.ʼ Yoo noa hoo da-mi di Nazarait dehn? Dehn mi serv Jehoava eena wahn speshal way. Dehn neva mi sopoas tu kot dehn hyaa.

Afta sohn taim, Manoawa son mi baan, an ih naym ahn Samson. Wen Samson mi groa op, Jehoava giv ahn lata schrent. Hihn mi kil wahn laiyan wid onli ih han. Ahn wahn taim, Samson mi kil 30 Filisteenz pan ih oan. Di Filisteen dehn mi hayt ahn, an dehn mi chrai fain wayz how fi kil ahn. Wahn nait, wail Samson mi-di sleep da Gaza, di Filisteen dehn gaahn da di siti gayt ahn wayt deh soh dat dehn ku kil ahn da maanin. Bot midl a di nait, Samson get op, gaahn da di siti gayt, ahn tayr aaf di gayt fahn di waal. Den ih bak it pan ih shoalda an ih kehr it way tap a wahn mongtin kloas tu Hebron!

Layta, di Filisteen dehn gaahn taak tu Dilaila, hoo da-mi Samson gyalfren, ahn dehn tel ahn: ‘Eech wan a wi wahn pay yu 1,100 pees a silva if yu fain owt wai Samson soh schrang. Wi waahn kech ahn, an put ahn eena prizn.ʼ Dilaila mi waahn di moni, soh shee aksep di aafa. At fers, Samson neva waahn tel ahn wai hihn soh schrang. Bot shee mi kip di presha ahn til hihn kudn tek it nohmoh an ih fainali tel ahn ih seekrit. Hihn mi tel ahn: ‘Sins Ai da wahn Nazarait, Ah neva yet kot mi hyaa. If Ah kot it, Ah wahn looz mi schrent.ʼ Hihn mek wahn big mistayk fi tel shee dat, noh chroo?

Kwik-wan, Dilaila mi tel di Filisteenz: ‘Ai noa ih seekrit!ʼ Shee mi mek Samson jrap asleep pan ih lap, ahn den ih kaal sohnbadi fi kot aaf ih hyaa. Dilaila mi hala: ‘Samson, di Filisteen dehn deh ya!ʼ Wen Samson wayk op, ih neva ga no schrent. Di Filisteen dehn grab ahn, lef ahn blain, ahn put ahn eena prizn.

Wahn day, towznz a Filisteenz mi gyada da di templ a dehn gaad Daygon, ahn dehn hala: ‘Fi wee gaad mek wi kanka Samson! Bring ahn owt! Mek ih entatayn wi.ʼ Dehn mek ih stan op bitween too kolom ahn dehn teez ahn. Samson hala: ‘Oa Jehoava, pleez gi mi bak mi schrent jos wan moa taim.ʼ Bai da taim, Samson hyaa mi don lang agen. Hihn push di kolom dehn fahn di templ wid ih hoal schrent. Di bildin jrap an evribadi eena di templ mi ded, inkloodin Samson.