Dayvid ahn Saal

Afta Dayvid mi kil Golaiyat, King Saal mi put ahn in chaaj a ih aami. Dayvid mi win lata waar, ahn lata peepl mi noa ahn. Weneva Dayvid mi kohn bak fahn waar, di wuman dehn wuda kom owt di daans ahn sing: ‘Saal kil towznz, ahn Dayvid kil tenz a towznz!ʼ Dat mi mek Saal geh jelos a Dayvid an ih mi waahn kil ahn.

Dayvid kuda mi play di haap gud. Wahn day wail Dayvid mi-di play di haap fi Saal, di king mi chroa ih spyaa aata ahn. Dayvid mi moov kwik-wan, ahn di spyaa mi geh stok eena di waal. Afta dat, Saal mi chrai fi kil Dayvid lata taim. Afta wahn wail, Dayvid mi ron weh ahn gaahn haid eena di dezert.

Saal mi gyada 3,000 soalja an ih gaahn luk fi Dayvid. Hihn mi waak eena wahn kayv wehpaat Dayvid an ih soalja dehn mi deh. Dayvid soalja dehn mi wispa tu ahn: ‘Dis da yu chaans fi kil Saal.ʼ Dayvid gaahn tuwaadz Saal ahn kot aaf di ej a ih sleevles koat. Saal neva did noatis. Afta dat, Dayvid mi feel veri bad fi weh ih du tu di king weh Jehoava chooz. Ahn hihn neva alow ih soalja dehn fi atak Saal. Hihn mi eevn hala aata Saal ahn tel ahn dat hihn kuda mi kil ahn wen dehn mi deh eena di kayv. Yu tink Saal mi chreet Dayvid beta?

No. Saal mi kip di chays afta Dayvid. Wahn nait, Dayvid an ih nefyu Abishai mi sneek eena Saal kyamp. Eevn Abner, weh da-mi Saal badigyaad, mi-di sleep. Abishai seh: ‘Dis da wi chaans! Mek Ah kil ahn!ʼ Dayvid tel ahn: ‘Jehoava wahn deel wid Saal. Mek wi jos tek ih spyaa an ih waata batl, ahn mek wi goh.ʼ

Dayvid klaim op pahn wahn mongtin weh mi deh kloas bai, an ih kuda mi si Saal hoal kyamp. Den ih hala: ‘Abner, wai yu neva protek yu king? Wehpaat Saal waata batl ahn spyaa deh?ʼ Saal mi rekonaiz Dayvid vais ahn seh: ‘Yu kuda mi kil mi, bot yu neva du it. Ai noa dat yoo wahn bee di neks king a Izrel.ʼ Saal gaahn bak da ih palis. Bot noh evribadi fahn Saal famili mi hayt Dayvid.