Wahn Wikid Kween Geh Ponish

Fahn di windo a ih palis da Jezriyel, King Ayhab kuda mi si wahn aachad weh mi bilangz tu wahn man weh naym Naybot. Ayhab mi waahn ih aachad, an ih mi chrai bai it fan ahn. Bot Naybot neva waahn sel ahn di lan kaaz Jehoava Laa mi seh dat yu kyaahn sel wahn lan weh yu inherit. Yu tink Ayhab mi rispek Naybot fi du di rait ting? No. Hihn mi geh beks insted. Hihn mi soh beks dat ih neva waahn kom owta ih room an ih neva waahn eet notn.

Ayhab waif, weh da-mi wikid Kween Jezibel, mi tel ahn: ‘Yoo da di king a Izrel. Yu ku geh eniting weh yu waahnt. Ai wahn geh da lan fi yu.ʼ Soh shee rait sohn letaz tu di eldaz a di siti. Eena dehndeh letaz, shee mi koman dehn fi akyooz Naybot fi taak gens Gaad. Den ih tel dehn fi stoan ahn tu det. Di eldaz mi du evriting weh Jezibel mi koman dehn fi du. Den shee tel Ayhab: ‘Naybot don ded. Di aachad da fi yoo.ʼ

Naybot da neva di onli inosent persn weh Jezibel mi kil. Shee mi kil lata peepl weh mi lov Jehoava. Shee mi wership aidol an ih mi du ada bad tingz. Bot Jehoava mi si aala di badnis weh shee mi du. Weh yu tink Jehoava mi wahn du wid Jezibel?

Ayhab mi ded, ahn laytaraan ih son Jehoaram mi staat tu rool. Den Jehoava mi sen wahn man weh naym Jeehoo fi ponish Jezibel an ih famili.

Jeehoo gaahn pan ih chariyat da Jezriyel, wehpaat Jezibel mi liv. Ahn Jehoaram gaahn pan ih chariyat fi meet Jeehoo. Jehoaram aks ahn: ‘Yoo deh ya fi kaaz chrobl?ʼ Jeehoo tel ahn: ‘Wi kyaahn ga pees if yu ma kip di du wikid tingz.ʼ Jehoaram ton ih chariyat fi get weh. Bot Jeehoo shoot Jehoaram wid wahn aro an ih mi ded.

Den Jeehoo gaahn da Jezibel palis. Wen shee hyaa dat Jeehoo di kohn, shee put aan maykop, fiks ih hyaa, an ih wayt opstayz bai ih windo. Wen Jeehoo reech, shee mi welkom ahn eena wahn rood way. Soh Jeehoo mi showt tu ih servant dehn weh mi deh saida shee: “Chroa ahn dong ya!” Dehn chroa Jezibel chroo di windo. Shee mi jrap pahn di grong an ih mi ded.

Afta dat, Jeehoo mi kil Ayhab 70 son dehn, an ih mek di hoal konchri stap wership Bayal. Yu si how Jehoava noh di sleep? Hihn noa evriting, ahn da di rait taim, ih ponish peepl weh du bad tingz.