Jehoava Difen Jehoshafat

Jehoshafat da-mi wahn king a Jooda weh mi dischrai di Bayal alta an aidol dehn eena di konchri. Hihn mi waahn di peepl noa Jehoava laa dehn. Soh hihn mi sen di prins ahn di Leevait dehn aal oava Jooda fi teech di peepl Jehoava laa dehn.

Di nayshan dehn kloas bai mi frayd fi atak Jooda bikaaz dehn mi noa dat Jehoava mi deh wid ih peepl. Dehn mi eevn kehr gif fi King Jehoshafat. Bot den di Moawabait dehn, di Amonait dehn, ahn di peepl weh kohn fahn rong Seeyir gaahn fait gens Jooda. Jehoshafat mi noa dat hihn mi need Jehoava help. Hihn mi mek aala di man, di wuman, ahn di chiljren dehn gyada tugeda da Jeroosalem. Den fronta aala dehn ih pray: ‘Jehoava, wi kyaahn win widowt yu. Pleez tel wi weh fi du.ʼ

Jehoava mi ansa Jehoshafat pryaa: ‘Noh bee frayd. Ai wahn help unu. Jos stan op rait deh ahn wach how Ai wahn sayv unu.ʼ How yu tink Jehoava mi sayv dehn?

Di neks maanin, Jehoshafat mi pik sohn singaz an ih tel dehn fi maach fronta di aami. Dehn maach fahn Jeroosalem tu di plays weh dehn mi wahn fait, weh dehn kaal Tekoawa.

Di singaz mi-di prayz Jehoava wid wahn lowd vais, wail Jehoava mi-di fait fi ih peepl. Hihn mi mek di Amonait ahn di Moawabait dehn geh soh kanfyooz dat dehn staat tu atak eech ada, ahn nat wan a dehn mi servaiv. Bot Jehoava mi protek di peepl a Jooda, di soalja dehn, ahn di prees dehn. Aala di nayshan dehn kloas bai mi hyaa weh Jehoava mi du ahn dehn riyalaiz dat hihn stil mi-di difen ih peepl fahn dehn enimi. How Jehoava sayv ih peepl? Hihn sayv ih peepl eena lata difrent wayz. Hihn noh need help fahn hyoomanz.