Jehoava Mi Payshent Wid Joana

Dehn mi ga wahn big siti da Asiriya weh naym Niniveh, ahn di peepl fahn deh mi wikid. Jehoava mi tel ih prafit Joana fi goh da Niniveh ahn waan di peepl fi chaynj dehn wikid wayz. Bot Joana ron gaahn di opozit dairekshan. Ih gaan eena wahn boat weh mi-di goh tu Tarshish.

Wail di boat mi deh da see, wahn schrang staam staat op, ahn di sayla dehn mi fraitn. Dehn staat tu pray tu dehn gaadz an aks: ‘Wai dis di hapm tu wi?ʼ Den Joana tel dehn: ‘Aala dis da sayka mee. Ai di ron weh fahn du weh Jehoava tel mi fi du. Dash mi eena di see, ahn di see wahn kaam dong.ʼ Di sayla dehn neva waahn dash ahn eena di waata, bot hihn insis fi mek dehn du it. Dehn pik ahn op ahn chroa ahn eena di waata, den di staam mi stap.

Joana mi tink dat ih mi wahn ded. Soh hihn mi pray tu Jehoava az ih mi-di sink deepa ahn deepa eena di see. Den Jehoava mi sen wahn big fish fi swala Joana, bot ih neva kil ahn. Wail Joana mi deh eena di fish beli, ih pray tu Jehoava: ‘Ah pramis fi aalwayz obay yu.ʼ Jehoava mi kip di protek Joana wail ih mi deh eena di fish beli fi chree dayz, den ih mek di fish vamit ahn owt pahn jrai lan.

Sins Jehoava mi sayv Joana, yu tink dis mi meen dat hihn neva haftu goh da Niniveh aftaraal? No. Jehoava mi tel ahn agen fi goh da Niniveh. Ahn dis taim Joana mi obay. Hihn gaan an ih tel di wikid peepl: ‘Eena 40 dayz, Niniveh wahn geh dischrai.ʼ Den sohnting weh Joana neva mi-di ekspek mi hapm—di peepl fahn Niniveh mi lisn ahn chaynj dehn wayz. Di king a Niniveh mi tel ih peepl: ‘Unu pray tu Gaad, ahn ripent. Den praabli ih noh wahn dischrai wi.ʼ Wen Jehoava mi si dat di peepl mi ripent, ih neva dischrai Niniveh.

Joana mi beks dat di siti neva geh dischrai. Jos tink bowt dis: Jehoava mi ga lata payshens ahn mersi fi Joana, bot Joana neva ga no mersi fi di peepl da Niniveh. Insted, hihn mi ga ih fays mek op wail ih mi-di sidong owtsaida di siti anda di shayd a wahn vain. Den di plaant mi ded, ahn Joana mi geh beks. Soh Jehoava tel ahn: ‘Yoo kay moa bowt disya plaant dan di peepl weh liv da Niniveh. Dehn mi servaiv bikaaz Ai mi shoa dehn mersi.ʼ Weh Jehoava mi-di chrai teech Joana? Dat di peepl fahn Niniveh mi moa impoatant dan eni plaant.