Jehoava Sen Jerimaiya fi Goh Preech

Jehoava mi chooz Jerimaiya fi bee wahn prafit fi di peepl a Jooda. Hihn mi tel ahn fi preech tu di peepl ahn waan dehn dat dehn need fi stap du bad tingz. Jerimaiya mi tel Jehoava: ‘Bot Jehoava, Ai da jos wahn lee bwai. Ah noh noa how fi taak fronta peepl.ʼ Jehoava tel ahn: ‘Noh bee frayd. Ai wahn help yu an Ah wahn tel yu weh fi seh.ʼ

Jehoava mi tel Jerimaiya fi gyada aala di eldaz a di nayshan, brok wahn klay jaar fronta dehn, ahn seh: ‘Dis da di sayhn ting weh wahn hapm tu Jeroosalem.ʼ Wen Jerimaiya mi du weh Jehoava tel ahn, di eldaz mi geh beks bad. Wahn prees weh mi naym Pasher mi beet op Jerimaiya an ih put ahn bitween sohn hevi blak a wud. Jerimaiya kudn moov aal nait. Pasher mi let ahn goh til di neks maanin. Jerimaiya mi seh: ‘Ai kyaahn tek dis nohmoh. Ah wahn stap preech.ʼ Bot yu tink hihn mi reeli giv op? No. Wen Jerimaiya mi tink bowt it gud, ih mi seh: ‘Jehoava mesij da laik wahn faiya weh di bon deep eensaida mi. Ai kyaahn stap preech.ʼ Soh Jerimaiya mi kantinyu waan di peepl.

Afta sohn yaaz, Jooda mi ga wahn nyoo king. Di prees ahn di faals prafit dehn mi hayt Jerimaiya mesij. Dat da wai dehn mi tel di prins dehn: ‘Dis man dizerv fi ded.ʼ Jerimaiya mi seh: ‘If yu kil mi, yu wahn di kil wahn inosent man. Di tingz weh Ah seh noh kohn fahn mee, bot fahn Jehoava.ʼ Wen di prins dehn hyaa dat, dehn seh: ‘Dis man noh dizerv fi ded.ʼ

Jerimaiya mi kip aan di preech, ahn di prins dehn geh beks. Dehn mi aks di king fi kil Jerimaiya. Di king mi tel dehn dat dehn ku du wateva dehn waahn wid Jerimaiya. Soh dehn kehr Jerimaiya ahn chroa ahn eena wahn deep, modi wel fi mek ih ded deh. Lee bit bai lee bit, Jerimaiya mi staat tu sink eena di mod.

Den wahn koat ofishal weh naym Eebed-melek mi tel di king: ‘Di prins dehn chroa Jerimaiya eena wahn wel! If wi lef ahn deh, ih wahn ded.ʼ Di king mi koman Eebed-melek fi kehr 30 man wid ahn, an pul Jerimaiya owta di wel. Jerimaiya reeli neva alow notn fi stap ahn fahn preech. Yu noh tink wee shuda bee laik hihn?