Ezra Teech Gaad Laa

Da mi don 70 yaaz sins moas a di Izrelaits gaahn bak da Jeroosalem, bot som a dehn stil mi-di liv eena difrent paats a di Perzhan Empaiya. Wan a dehndeh Izrelait da-mi wahn prees weh naym Ezra. Hihn mi teech Jehoava Laa. Ezra mi fain owt dat di peepl da Jeroosalem neva mi-di obay di Laa, ahn hihn mi waahn goh help dehn. Di king a Perzha weh naym Artazerkseez mi tel ahn: ‘Gaad gi yu wizdom soh dat yu ku teech ih Laa. Kehr enibadi weh wilin fi goh wid yu.ʼ Ezra mi meet op wid evribadi weh waahn goh bak da Jeroosalem. Dehn pray tu Jehoava fi protek dehn az dehn chravl bak. Afta dat, dehn staat dehn jerni.

Foa monts layta, dehn reech Jeroosalem. Di leeda dehn mi tel Ezra: ‘Di Izrelait dehn noh di obay Jehoava ahn dehn di marid laydi fahn ada nayshanz weh wership faals gaadz.ʼ Weh Ezra mi du? Ezra neel dong fronta di peepl ahn pray: ‘Jehoava, yu don du soh moch fi wi, bot wi stil sin gens yu.ʼ Di peepl mi ripent, bot dehn neva mi-di du weh rait. Ezra mi chooz eldaz ahn jojiz fi luk intu di mata. Oava di neks chree monts, dehn sen weh di peepl monks dehn weh neva waahn wership Jehoava.

Joorin di neks 12 yaaz, di waal dehn da Jeroosalem mi geh bil op bak. Soh Ezra mi gyada di peepl da di poblik ayrya fi reed Gaad Laa tu dehn. Wen Ezra mi oapm di buk a di Laa, evribadi stan op. Hihn mi prayz Jehoava, ahn di peepl mi rayz dehn han fi shoa dat dehn agree wid ahn. Den Ezra mi reed an eksplayn di Laa gud, ahn di peepl mi pay atenshan. Dehn mi admit dat dehn schray weh fahn Jehoava agen, ahn dehn staat tu krai. Di neks day, Ezra mi reed moa fahn di buk a di Laa tu di peepl. Dehn mi andastan dat dehn mi soon need fi selibrayt di Tach Shed Festival. Soh rait away, dehn staat tu pripyaa fi di festival.

Fi di sevn dayz a di festival, di peepl mi rijais ahn tank Jehoava fi di gud tingz weh di lan projoos. Dehn neva ga wahn Tach Shed Festival laik dat sins di taim a Jashwa. Afta di festival, di peepl dehn kohn tugeda ahn pray: ‘Jehoava, yu sayv wi fahn slayvri, yu feed wi eena di dezert, ahn yu gi wi dis byootiful lan. Bot lata taim wi neva obay yu. Yu sen prafits fi waan wi, bot wi neva lisn. Yu mi payshent wid wi. Ahn yu kip yu pramis tu Aybraham. Now wi pramis dat wi wahn obay yu.ʼ Di leeda dehn, di Leevait dehn, ahn di prees dehn rait dong dehn pramis ahn stamp it wid dehn seel.