Di Waal Dehn da Jeroosalem

Joorin Ezra taim, dehn mi ga wahn Izrelait weh naym Nehimaiya hoo da-mi wan a King Artazerkseez servant. Hihn mi liv da Shooshan, weh da-mi wahn siti da Perzha. Wahn day, Nehimaiya breda mi kohn fahn Jooda wid dis bad nyooz: ‘Di Izrelaits weh gaahn bak da Jeroosalem noh sayf. Di waal rong di siti ahn di gayt dehn weh di Babiloanyanz mi dischrai neva geh bil bak.ʼ Nehimaiya mi veri sad. Hihn mi waahn goh help, soh ih mi pray dat di king wuda mek ih goh.

Sohn taim layta, di king mi noatis dat Nehimaiya mi luk sad. Ih tel ahn: ‘Ah neva yet si yu laik dis. Weh hapm?ʼ Nehimaiya mi tel ahn: ‘Ah sad bikaaz mi siti, Jeroosalem, deh eena rooinz.ʼ Di king aks ahn: ‘Weh Ah ku du fi help yu?ʼ Rait away, Nehimaiya mi seh wahn sailent pryaa tu Jehoava. Den ih tel di king: ‘Pleez mek Ah goh da Jeroosalem fi bil bak di waal dehn.ʼ Di king mi giv ahn permishan fi goh. An ih giv ahn di help weh ih mi need fi bee sayf eena ih lang jerni. Ih aalso mek ih bee govna a Jooda an ih giv ahn wud fi mek di siti gayt dehn.

Wen Nehimaiya mi reech Jeroosalem, ih mi inspek di siti waal dehn. Den ih gyada di prees ahn roola dehn, an ih tel dehn: ‘Dis da wahn terabl sichuwayshan. Mek wi get op ahn staat tu werk.ʼ Di peepl mi agree ahn dehn staat tu bil bak di waal dehn.

Bot som a di Izrelait enimiz mi mek fon a dehn, ahn dehn seh: ‘Wan lee faks kuda nak dong di waal weh unu di bil.ʼ Bot di werkaz mi ignoar dehn ahn dehn kip aan di bil di waal. Di waal mi-di geh haiya ahn schranga.

Som a dehn enimi fahn difrent reejan mi teem op fi atak Jeroosalem sodn-wan. Wen di Jooz mi hyaa bowt di plan, dehn mi frayd. Bot Nehimaiya tel dehn: ‘Noh frayd fi dehn. Jehoava deh wid wi.ʼ Hihn mi put sohn gyaad fi protek di werkaz, ahn dehn enimi kudn atak dehn.

Eena jos 52 dayz, dehn mi finish bil di waal ahn gayt dehn. Nehimaiya mi bring aala di Leevait dehn da Jeroosalem soh dat dehn kuda selibrayt ahn rijais, laik how dehn mi finish bil bak di waal. Hihn mi aaganaiz dehn eena too groop a singaz. Dehn gaan op pahn di waal, an eech groop maach opozit dairekshan rong di siti. Dehn rijais ahn sing tu Jehoava ahn play myoozik pahn simbal, haap, an ada inschrument. Ezra gaahn wid wan groop, ahn Nehimaiya gaahn wid di ada groop, til dehn meet op da di templ. Aala di peepl, fahn man tu pikni, mi aafa sakrifais tu Jehoava ahn dehn mi-di selibrayt. Dehn mi-di mek soh moch naiz dat peepl kuda mi hyaa dehn fahn faar.