Di Disaipl Dehn Geh Hoali Spirit

Ten dayz afta Jeezas mi gaahn bak da hevn, ih disaipl dehn geh hoali spirit. Da mi Pentikaas 33 C.E., ahn dehn mi ga peepl fahn difrent plays weh mi kohn da Jeroosalem fi selibrayt di Paasoava. Dehn mi ga 120 a Jeezas disaipl weh mi-di meet tugeda eena wahn opstayz room. Den aal af a sodn, wahn amayzin ting mi hapm. Sohnting laik wahn flaym a faiya mi apyaa pahn eech a di disaipl dehn hed. An aala dehn mi staat tu taak difrent langwij. Ahn dehn mi hyaa wahn lowd naiz laik wahn schrang breez eena di hows.

Peepl weh mi-di vizit fahn difrent plays weh mi kohn da Jeroosalem mi hyaa di naiz ahn dehn ron gaahn da di hows fi si weh hapm. Dehn mi sopraiz fi hyaa di disaipl dehn di taak ada langwij. Dehn seh: ‘Bot dehnya peepl da fahn Gyalilee. How komz dehn ku taak fi wee langwij?ʼ

Den Peeta ahn di ada apasl dehn mi stan op fronta di krowd. Soh Peeta tel di peepl how Jeezas geh kil ahn dat Jehoava mi rayz ahn op bak fahn di ded. Peeta seh: ‘Now Jeezas deh da hevn da di rait han said a Gaad, an ih giv ih hoali spirit tu wee. Dat da wai unu di si ahn hyaa aala dehnya miraklz.ʼ

Weh Peeta mi seh mi toch di peepl dehn haat, soh dehn aks ahn: “Da weh wi need fi du now?” Peeta tel dehn: ‘Ripent fahn unu sin dehn ahn geh baptaiz eena Jeezas naym. An unu wahn geh di gif a hoali spirit.ʼ Pahn da day, bowt 3,000 peepl geh baptaiz. Afta dat di nomba a disaiplz da Jeroosalem staat tu groa kwik-wan. Wid di help a di hoali spirit, di apasl dehn mi staat op nyoo kangrigayshanz ahn dehn kuda mi teech di disaipl dehn evriting weh Jeezas mi koman dehn fi du.