Kerneelyos Geh Hoali Spirit

Eena Seezareeya, dehn mi ga wahn impoatant Roaman aami aafisa weh mi naym Kerneelyos. Eevn doa hihn da neva wahn Joo, di Jooz mi rispek ahn. Hihn da-mi wahn kain persn an ih wuda help poa peepl. Kerneelyos mi bileev eena Jehoava an ih mi aalwayz pray tu ahn. Wahn day, wahn aynjel mi apyaa tu Kerneelyos, an ih tel ahn: ‘Gaad lisn tu yu pryaaz. Now sen sohn man da Japa, wehpaat Peeta di stay, an aks ahn fi mek ih kohn si yu.ʼ Kwik-wan, Kerneelyos sen chree man da Japa, weh deh bowt 30 mailz tu di sowt.

Meenwail da Japa, Peeta mi ga wahn vizhan. Hihn mi si sohn animal weh di Jooz neva sopoas tu eet, an ih hyaa wahn vais di tel ahn fi eet it. Bot Peeta neva waahn, an ih seh: ‘Ai neva yet eet eni animal weh noh kleen.ʼ Den di vais tel ahn: ‘Stap seh dat dehnya animal noh kleen. Gaad don mek dehn kleen.ʼ Di vais aalso tel ahn: ‘Dehn ga chree man da yu doa. Goh wid dehn.ʼ Peeta gaahn da di doa an aks di man dehn wai dehn mi dehdeh. Dehn tel ahn: ‘Kerneelyos sen wi, hihn da wahn Roaman aami aafisa. Hihn waahn yu goh da ih hows da Seezareeya.ʼ Soh Peeta mi invait di man dehn fi stay oavanait da ih hows. Di neks day, ih gaahn wid dehn da Seezareeya, lang wid sohn bradaz fahn Japa.

Wen Kerneelyos fainali si Peeta, ih mi bow dong tu ahn. Bot Peeta tel ahn: ‘Get op! Ai da wahn man jos laik yoo. Gaad tel mi fi kohn da yu hows, eevn doa Jooz noh goh da peepl hows weh da fahn ada nayshanz. Now pleez tel mi wai yu mi sen fi mi.ʼ

Kerneelyos tel Peeta: ‘Foa dayz agoa, Ai mi-di pray tu Gaad ahn wahn aynjel tel mi fi sen fi yu. Pleez teech wi di tingz weh Jehoava seh.ʼ Peeta tel ahn: ‘Ah geh fi laan dat Gaad chreet evribadi di saym way, ahn dat hihn aksep enibadi weh waahn wership ahn.ʼ Soh Peeta mi teech dehn wahn lata tingz bowt Jeezas. Kerneelyos an ih famili mi geh hoali spirit an afta dat dehn mi geh baptaiz.