Peepl Fahn Difrent Nayshan Ton Kristyanz

Di apasl dehn mi obay Jeezas koman fi spred di gud nyooz aal oava di ert. Eena 47 C.E., di bradaz da Antiyak mi sen Paal ahn Baarnabas fi goh preech da wahn lata difrent plays. Dehnya too bradaz mi ga lata zeel ahn dehn chravl aal oava Aysha Maina, laik Derbi, Lischra, an Aikoanyom.

Paal ahn Baarnabas mi preech tu evribadi, noh mata if dehn mi yong er oal, rich er poa. Wahn lata peepl mi aksep di chroot bowt Jeezas. Wen Paal ahn Baarnabas mi preech tu Serjyos Paalos, hoo da di govna a Saipros, wahn oabyaman mi chrai stap dehn. Paal tel di oabyaman: ‘Jehoava wahn ponish yu.ʼ Rait away, di oabyaman mi geh blain. Wen Govna Paalos mi si weh hapm, ih staat tu bileev eena Jeezas.

Paal ahn Baarnabas mi preech evriway. Dehn mi gaahn fahn hows tu hows, da di maakit dehn, pahn di road, an eena di sinagag dehn. Wen dehn mi deh da Lischra, dehn heel wahn man weh kudn waak. Ahn wen di peepl mi si weh hapm, dehn staat tu wership dehn bikaaz dehn mi tink dat dehn da gaadz. Bot Paal ahn Baarnabas mi stap dehn, ahn dehn tel di peepl: ‘Unu fi wership onli Gaad! Wee da hyoomanz jos laik unu.ʼ Den sohn Jooz mi kohn ahn dehn ton di krowd gens Paal. Soh di krowd mi stoan ahn, jreg ahn owtsaida di siti ahn lef ahn deh fi mek ih ded. Bot Paal mi stil alaiv! Rait away, di bradaz kohn fi help ahn, an dehn kehr ahn bak eena di siti. Laytaraan, Paal mi gaahn bak da Antiyak.

Eena 49 C.E., Paal mi chravl agen fi goh preech. Afta ih gaahn bak fi si di bradaz da Aysha Maina, ih kehr di gud nyooz way da Yoorop. Ih mi gaahn da Atenz, Efisos, Filipai, Tesalonaika, ahn sohn ada plays. Sailas, Look, ahn wahn yong man weh naym Timoti mi jain Paal pan ih chrip. Dehn mi werk tugeda fi staat op nyoo kangrigayshanz ahn help dehn geh schrang. Paal stay da Korint fi wahn yaa an a haaf fi schrentn di bradaz deh. Hihn mi preech, teech, ahn rait letaz tu wahn lata kangrigayshanz. Ih mi aalso mek tent fi sopoat ihself. Laytaraan, Paal mi gaahn bak da Antiyak.

Den eena 52 C.E., Paal mi gaahn chravl fi preech fi wahn terd taim, an ih staat fahn Aysha Maina. Ih chravl way op naat a Filipai ahn den dong tu Korint. Paal spen wahn lata yaaz da Efisos, di teech, di heel peepl ahn di help di kangrigayshan. Ih mi aalso gi sohn poblik taak evriday da wahn skool. Wahn lata peepl lisn ahn chaynj dehn laif. Fainali, afta Paal mi preech di gud nyooz eena wahn lata difrent plays, ih gaahn da Jeroosalem.