Paal ahn Timoti

Timoti da-mi wahn yong brada eena di kangrigayshan da Lischra. Fi hihn pa da-mi Greek, an ih ma da-mi Joo. Ih ma Yoonis an ih grani Lois, mi teech Timoti bowt Jehoava fan ih smaal.

Wen Paal mi gaahn preech da Lischra fi di sekant taim, ih noatis dat Timoti mi reeli lov di bradaz an ih mi waahn help dehn. Soh Paal invait Timoti fi goh wid ahn fi preech da sohn ada plays. Afta sohn taim, Paal chrayn Timoti fi bee wahn gud preecha ahn teecha a di gud nyooz.

Hoali spirit mi gaid Paal ahn Timoti eniway wehpaat dehn goh preech. Wahn nait, Paal mi si wahn vizhan wehpaat wahn man mi-di tel ahn fi kohn da Masidoanya ahn help dehn. Soh Paal, Timoti, Sailas, ahn Look mi gaahn deh fi preech ahn staat op nyoo kangrigayshanz.

Wen dehn mi reech Tesalonaika wahn siti da Masidoanya, wahn lata man ahn wuman ton Kristyan. Bot som a di Jooz mi jelos Paal an ih frenz. Dehn gyada tugeda sohn wikid man ahn jreg di bradaz tu di roolaz a di siti. Dehn hala: ‘Dehnya man da enimiz a di Roaman govament!ʼ Paal ahn Timoti laif mi deh eena daynja, soh dehn ron gaahn da Bereeya da nait.

Di peepl eena Bereeya mi eega fi laan di gud nyooz, ahn peepl fahn deh weh da-mi Greek ahn Joo mi staat tu serv Gaad. Bot wen sohn Jooz mi kohn fahn Tesalonaika fi staat op chrobl, Paal gaahn da Atenz. Bot Timoti ahn Sailas mi stay da Bereeya fi schrentn di bradaz. Afta wahn wail, Paal sen Timoti bak da Tesalonaika fi help di bradaz bayr op wid di persikyooshan dehn mi-di fays. Laytaraan, Paal sen Timoti fi goh vizit ada kangrigayshanz an inkorij dehn.

Paal tel Timoti: ‘Enibadi weh waahn serv Jehoava wahn fays persikyooshan.ʼ Dehn mi persikyoot Timoti ahn chroa ahn eena jayl bikaaz a ih fayt. Bot Timoti mi hapi dat ih geh di chaans fi shoa ih laayalti tu Jehoava.

Paal tel di Filipiyanz: ‘Ah di sen Timoti tu unu. Hihn wahn teech unu weh ih meenz fi waak eena di chroot, an ih wahn chrayn unu fi du di preechin werk.ʼ Paal mi noa dat hihn kuda mi pen pahn Timoti. Dehn mi werk tugeda di serv Jehoava fi wahn lang taim ahn dehn da-mi gud frenz.