“Wehpaat Gaad Mi deh?”
“DIS KWESCHAN AALWAYZ KOM OP: WEHPAAT GAAD MI DEH?”—Poap Benedict XVI, wen ih mi-di vizit di plays weh yoostu bee wahn kansenchrayshan kyamp da Auschwitz, Poland.
WEN BAD TINGZ HAPM, YU EVA WANDA, ‘WEHPAAT GAAD MI DEH?ʼ ER ENITING BAD EVA HAPM TU YU WEH MEK YU KWESCHAN WEDA ER NAT GAAD KAY BOWT YOO?
Sheila liv da di United States, ahn shee kohn fahn wahn veri rilijos famili. Shee seh: “Fan Ah smaal, Ah mi inchrestid eena Gaad bikaaz hihn da wi Kriyayta. Bot Ah neva did feel kloas tu ahn. Ah mi tink hihn di wach mi, bot Ah feel ih mi deh faar fahn mi. Ah neva feel laik Gaad hayt mi, bot Ah neva feel laik ih kay bowt mi needa. Maybi yoo feel di saym way laik Sheila sohntaim. Wai Sheila mi ga dowts? Shee seh: “Mai famili mi sofa chroo wan ting afta di neks. Ih jos neva luk laik Gaad mi-di help wi ataal.”
Laik Sheila, yoo mait reeli bileev dat Almaiti Gaad egzis, bot yu stil mait wanda fi ih reeli kay bowt yoo. Di raichos man Joab mi ga simila dowts eevn doa ih mi ga fayt eena di powa ahn wizdom a di Kriyayta. (Job 2:3; 9:4) Afta Joab mi sofa chroo wan ting afta di neks, an ih mi feel laik ih noh ga no hoap, ih aks Gaad: “Wai yu ton weh yu fays fahn mi, ahn wai yu tink Ai da yu enimi?”—Job 13:24.
Weh di Baibl seh? Da Gaad kaaz bad tingz fi hapm tu wi? Dehn ga eni proof weh shoa dat Gaad kay bowt evribadi ahn dat ih kay bowt eech wan a wi persnali? Yu tink eni wan a wee ku reeli noa if Gaad noatis wi, andastan wi, feel fi wi, er help wi wid wi prablemz?
Eena di neks fyoo aatikl, wi wahn luk pahn how kriyayshan teech wi dat Gaad kay fi wi. (Roamanz 1:20) Den, wi wahn luk pahn weh di Baibl tel wi bowt how Gaad kay fi wi. Di moa yu luk pahn fi hihn kriyayshan ahn fi hihn Werd, di moa yu wahn “noa hihn.” Ahn di moa yu noa ahn, di moa shoar yu wahn bee dat ‘hihn kay bowt yoo.ʼ—1 Jan 2:3; 1 Peeta 5:7.