Weh Gif Wee Ku Gi Jehoava?

WAN taim Jeezas mi seh: “Gaad bles yu moa wen yu gi dahn wen yu geh.” (Aks 20:35) Da baysik chroot aplai tu wi rilayshanship wid Jehoava. How soh? Jehoava gi wi lata gif weh mek wi hapi, bot wi ku bee eevn moa hapi if wee giv wahn gif tu Jehoava. Weh gif wee ku gi Jehoava? Proverbs 3:9 seh: “Aana Jehoava wid yu tingz weh ga valyu.” Wi “tingz weh ga valyu” inklood wi taim, wi skilz, ahn wi schrent. Ih aalso inklood di moni, prapati, er ada invesment weh wi gat. Wen wi yooz weh wi ga fi promoat chroo wership, wi di giv Jehoava wahn gif, ahn wi wahn hapi wen wi du dat.

How wi ku mek shoar dat wi noh faget fi gi dehnya gif tu Jehoava? Di apasl Paal mi tel di bradaz weh mi liv da Korint fi “put sohn moni wan said” fi mek wahn kanchribyooshan. (1 Kor. 16:2) Weh yoo ku du if yu waahn fain owt how yu ku mek wahn doanayshan weh yoo liv? Pleez si di baks anda dis aatikl.

Di opshan fi mek wahn doanayshan noh avaylabl eena sertn konchriz. Bot, yu ku fain infamayshan pahn ada wayz how fi doanayt pahn di doanayshan web payj. Eena som konchriz, da payj ga wahn dakyument weh ansa sohn kaman kweschanz weh peepl aks bowt doanayshanz.