How Yu Ku Ga Wahn Beta Laif?

DI WAY hyoomanz liv tudeh difrent fahn di way Gaad mi waahn dehn liv. Di ert shuda mi ful wid peepl weh rispek di Kriyayta roolaship, weh benifit fan ih gaidans, ahn weh kapi ih lov an ada byootiful kwalitiz. Gaad mi waahn hyoomanz bee hapi az dehn rayz dehn famili, az dehn fain owt nyoo tingz, an az dehn mek di ert wahn paradais.

GAAD PRAMIS WI DAT DI ERT WAHN BEE WAHN PARADAIS AGEN

• “Hihn wahn put wahn en tu aala di waar dehn eena di hoal ert.”​—Psalm 46:9.

• “Di taim now kohn fi dischrai dehn wan weh dischrai di werl.”​—Revilayshan 11:18.

• “Nobadi wahn seh: ‘Ah sik.ʼ”​—Isaiah 33:24.

• “Di werk weh fi mee peepl dehn du wid dehn oan han, dehn wahn get fi injai tu di maks.”​—Isaiah 65:22.

How dehnya prafesi wahn kohn chroo? Gaad apoint ih Son, Jeezas, az King a di perfek govament weh wahn rool fahn hevn oava di ert. Di Baibl kaal dis roolaship di Kingdom a Gaad. (Daniel 2:44) Weh di Baibl seh bowt Jeezas? Ih seh: “Gaad wahn gi ahn . . . Dayvid chroan.” Ahn den ih seh: “Ih wahn rool . . . fareva, ahn fi hihn kingdom wahn neva kohn tu wahn en.”—Look 1:32, 33.

Fi shoa dat laif wahn bee beta wen hihn rool az King, Jeezas mi du lata miraklz wen hihn mi deh pahn di ert.

JEEZAS MI SHOA DI GUD TINGZ WEH HIHN WAHN DU FI OBEEDYANT HYOOMANZ

• Hihn mi kyoar evri kaina siknis. Dis shoa how hihn wahn geh rid a aala di dizeez dehn fahn di ert.​—Machyu 9:35.

• Hihn mi kaam dong di see. Dis shoa how hihn wahn protek peepl kaaz hihn ga powa oava naycha.​—Maak 4:36-39.

• Hihn mi feed towznz a peepl. Dis shoa dat hihn wahn gi peepl evriting weh dehn need fi liv.​—Maak 6:41-44.

• Hihn mi ton waata intu wain da wahn wedn. Dis proov dat hihn wahn help peepl fi injai laif.​—Jan 2:7-11.

How yu ku injai di kaina laif weh Gaad waahn fi di peepl weh lov hihn? Dehn ga sohnting yu mos du. Di Baibl seh dat yu fi fain “di road [weh] naro weh di leed tu laif an onli wahn lee bit a peepl di fain it.”​—Machyu 7:14, NW.

DI ROAD WEH LEED TU LAIF

Wat da di road weh leed tu laif? Dis da weh Gaad seh: “Ai Jehoava, da yu Gaad, di Wan weh di teech yu fi yu oan gud, di Wan weh di gaid yu eena di way how yu shuda waak.” (Isaiah 48:17) If yu fala dis advais, yu laif wahn bee beta.

Jeezas mi seh: “Da mee da di way, da mee da di chroot, ahn da mee da di laif.” (Jan 14:6) If wi du weh Jeezas mi seh ahn kapi fi hihn egzampl, wi wahn jraa kloas tu Gaad ahn wi laif wahn bee beta.

How yu ku fain di road weh leed tu laif? Lata rilijan egzis, bot Jeezas mi waan wi seh: “Da noh evribadi weh stodi di kaal pahn mi ahn seh, ‘Laad, Laad,ʼ wahn geh fi bee paat a di kingdom a hevn, yu noh. Da onli dehn wan weh du weh mai Faada da hevn waahn dehn du.” (Machyu 7:21) Hihn mi aalso seh: “Yu wahn noa dehn bai weh dehn du.” (Machyu 7:16) Di Baibl ku help yu noa wich rilijan da di chroo rilijan.—Jan 17:17.

How yu ku waak eena di road weh leed tu laif? Yu wahn haftu laan bowt di Persn weh giv laif tu evribadi. Da hoo hihn? How ih naym? Weh kaina persn hihn? Weh hihn di du fi wee? Weh hihn ekspek fahn wee?a

Gaad waahn hyoomanz du moa dan jos werk, eet, play, ahn rayz wahn famili. Wee ku geh fi noa wi Kriyayta ahn bee ih fren. Wee ku shoa hihn dat wi lov ahn if wi du weh hihn waahn wi du. Jeezas mi seh: “Di onli way fi geh evalastin laif da fi geh fi noa yoo, di onli chroo Gaad.”—Jan 17:3.

DI FOS STEP PAHN DI ROAD WEH LEED TU LAIF

Wen wi laan weh Gaad ekspek fahn wi, wi fain owt dat wi haftu mek sohn chaynjiz eena wi laif. Ih mait luk laik wahn chalenj. Bot akchwali, wi laif wahn geh beta wans wi staat tu waak pahn di road weh leed tu laif. Fi help yu fain di ansaz tu kaman kweschanz bowt Gaad, Jehoava Witnisiz aafa free Baibl stodi da wahn plays ahn taim weh gud fi yoo. Yu ku kantak wi da wi websait da www.pr2711.com.