Ih Pasabl fi Bee Hapi Tudeh

DI TAIM wahn kohn wen nobadi wahn geh sik, geh oal er ded nohmoh. Yoo ku ga da kaina laif tu! Bot rait now evribadi ga lata prablemz. Weh ku help yu fi ga wahn hapi laif tudeh? Di Baibl ku help yu fi ga wahn gud ahn hapi laif eevn now. Kansida som a di chalenjiz eena laif ahn how di Baibl ku help.

HOW FI FAIN SATISFAKSHAN

Weh di Baibl seh: “Noh di lov moni; satisfai wid weh [yu] ga.”—Heebrooz 13:5.

Peepl nowadayz tink wi need wahn lata tingz eena laif. Bot yet, di Baibl seh dat wi fi “satisfai wid weh [wi] ga.” How wi ku du dat?

‘Noh lov moni.ʼ Peepl wahn du eniting fi moni, kaaz dehn ‘lov it.ʼ (1 Timoti 6:10) Dehn noh kay if dehn damij dehn helt, dehn rilayshanship wid dehn famili ahn frenz, dehn moaralz, er eevn dehn praid. Bot ih noh wert it, kaaz di persn weh lov richiz “wahn neva ga inof.”—Ecclesiastes 5:10.

Lov peepl, noh tingz. Da chroo, mateeryal tingz yoosful. Bot dehn kyaahn lov wi bak er shoa dat dehn tankful; onli peepl ku du dat. Wen wi ga wahn “chroo chroo fren,” dat mek wi hapi.—Proverbs 17:17.

WI KU BEE HAPI TUDEH IF WI FALA DI GAIDANS FAHN DI BAIBL

HOW FI KOAP WID SIKNIS

Weh di Baibl seh: “Wahn haat weh ful a jai da gud medisn.”—Proverbs 17:22.

Jos laik “gud medisn,” wen wi ga jai wi ku koap wid siknis. Bot how wi ku ga jai wen wi sik?

Bee tankful. If wi onli tink bowt wi prablemz, evri day wahn luk laik da wahn bad day. (Proverbs 15:15) Insted, di Baibl seh dat “[wi] fi bee tankful.” (Koloashanz 3:15, NW) Laan fi bee tankful fi di gud tingz eena laif, noh mata how smaal dehn smaal. Tingz laik wahn byootiful sonset, di nais breez, wahn smail fahn sombadi wi lov—dehnya lee tingz ku mek wi hapi.

Du tingz fi ada peepl. Eevn if wi di sofa wid sohn kaina siknis, wi fi memba dat ‘Gaad bles wi moa wen wi gi dan wen wi get.ʼ (Aks 20:35) Wen adaz tank wi fi weh wi du fi dehn, wi wahn bee hapiya ahn wi noh wahn tink tu moch bowt wi prablemz. Wi ku ga wahn hapiya laif wen wi du tingz fi adaz weh wahn mek dehn laif beta.

SCHRENTN YU MARIJ

Weh di Baibl seh: “Mek shoar a di moa impoatant tingz.”—Filipiyanz 1:10, NW.

Koplz weh spen lee bit a taim tugeda ku damij dehn rilayshanship. Eech hozban ahn waif fi vyoo dehn marij az wan a di moas impoatant tingz eena dehn laif.

Du tingz tugeda. Mek planz fi du tingz tugeda. Di Baibl seh: “Too beta dan wan.” (Ecclesiastes 4:9) Tugeda, unu ku kuk, play wahn taybl gaym er du eniting els.

Shoa eech ada lov. Di Baibl inkorij wahn hozban ahn wahn waif fi lov ahn rispek wan anada. (Ifeezhanz 5:28, 33) Wahn nais smail, wahn lee hog, er wahn smaal gif da gud wayz how yu ku mek yu marij schranga. Af koars, peepl weh marid fi stay laayal tu dehn paadna ahn noh cheet pahn dehn.—Heebrooz 13:4.

“FAINALI, MI LAIF GA MEENIN!”

—Di stoari a Ryoko Miyamoto, Japan.

Laif neva eezi ataal. Mi hozban yoostu jrink wahn lat ahn nobadi mi waahn gi ahn wahn jab. Hihn neva oan op tu ih rispansabiliti az wahn pa. Eevn doa Ah mi chrai mi bes, ih neva mek tingz eni beta. Ah mi eevn wanda if da-mi mi destini, er if Ah mi-di pay fi aal weh Ah mi du eena di paas.

Den, wan a Jehoava Witnisiz mi vizit mi. Shee mi ga wahn nais smail pan ih fays wen ih mi-di taak tu mi bowt Gaad Kingdom an evalastin laif. Shee mi aafa fi stodi di Baibl wid mi. Pahn da stodi, Ah mi laan dat Gaad doo egzis ahn dat hihn waiz, fyaa, ahn lovin. Ah mi aalso laan bowt weh hapm tu wi wen wi ded ahn dat weh Ai mi-di goh chroo da neva destini.

Ah mi aalso riyalaiz dat di onli way fi bee hapi da if wi ga wahn kloas rilayshanship wid Gaad. Di chroot fahn di Baibl mek Ah feel inkorij, ih mek Ah feel free, an ih mek Ah feel laik Ah ku deel wid eni prablem. Fainali, mi laif ga meenin!