Jehoava Hombl Servants Preshos tu Hihn

1. How Jehoava feel bowt hombl peepl? Pleez eksplayn yu ansa.

JEHOAVA lov hombl peepl. Onli peepl weh reeli hombl ku ga wahn lovin ahn kloas rilayshanship wid hihn. Pahn di ada han, “ih kip faar fahn dehn wan weh prowd.” (Ps. 138:6) Aala wi waahn pleez Jehoava ahn wi waahn hihn fi bee kloas tu wi, soh wi ga gud reezn fi laan fi bee hombl.

2. Weh wi wahn diskos eena dis aatikl?

² Eena dis aatikl, wi wahn diskos di ansaz tu chree kweschanz: (1) Weh ih meenz fi bee hombl? (2) Wai wi need fi laan fi bee hombl? (3) Ahn wat da sohn sichuwayshan weh ku tes wi hyoomiliti? Az wi wahn si, wen wi laan fi bee hombl, wi mek Jehoava hapi ahn wi benifit wiself tu.—Prov. 27:11; Isa. 48:17.

WEH IH MEENZ FI BEE HOMBL?

3. Weh ih meenz fi bee hombl?

³ Wahn hombl persn noh tink dat ih moa impoatant dan adaz; ih noh prowd. Di Baibl shoa dat sombadi weh hombl andastan dat Jehoava faar moa grayta dan dehn. Dehn aalso andastan dat adaz beta dan dehn eena wan way er di ada.—Fil. 2:3, 4.

4-5. Wai sombadi weh noh hombl mait luk laik dehn hombl?

⁴ Sohn peepl onli luk laik dehn hombl. Dehn mait bee kwaiyet er ga wahn shai persnaliti. Er, dehn mait ga rispek fi adaz jos bikaaz dat da weh dehn payrents mi teech dehn fi du. Bot deep dong, dehn mait akchwali veri prowd. Soona er layta, doh, dehn wahn shoa weh reeli deh eena dehn haat.—Look 6:45.

⁵ Pahn di ada han, yu ga adaz weh mait luk kanfident ahn seh tingz playn ahn schrayt, bot dat noh meenz dat dehn prowd. (Jan 1:46, 47) Stilyet, peepl weh noh shai haftu bee kyaaful noh fi pen pahn dehn oanself. Soh weda wi shai er nat, aala wi need fi werk haad fi bee hombl.

6. Akaadn tu 1 Korintyanz 15:10, weh wi ku laan fahn di apasl Paal egzampl?

⁶ Kansida di egzampl a di apasl Paal. Jehoava mi yooz hihn wahn lat fi staat nyoo kangrigayshanz eena lata difrent konchri. Hihn maita mi eevn du moa eena di minischri dan eni a di ada apasl dehn. Stilyet, Paal neva tink dat hihn mi moa impoatant dan ih bradaz. Bikaaz hihn mi hombl, hihn mi seh: “Ai da di lees a aal di ada apasl dehn. Ai noh eevn fit fi mek dehn kaal mee wahn apasl, kaa Ai mi mek di peepl a Gaad sofa.” (1 Kor. 15:9) Den, Paal mi seh dat hihn mi ga wahn gud rilayshanship wid Jehoava, noh bikaaz hihn mi speshal er bikaaz hihn mi du wahn lat fi Gaad, bot bikaaz Jehoava mi shoa hihn lov ahn kainis weh ih neva dizerv. (Reed 1 Korintyanz 15:10.) Paal da-mi wahn gud egzampl a wahn hombl persn. Wen hihn mi rait ih leta tu di Kristyanz da Korint, hihn neva boas bowt ihself, eevn doa som eena di Kangrigayshan mi-di taak bad bowt ahn!—2 Kor. 10:10.

7. How wahn brada weh lata peepl noa mi shoa dat hihn mi hombl? Yooz di egzampl eena di paragraaf.

⁷ Di laif stoari a Brada Karl F. Klein, hoo mi serv az wahn memba a di Govanin Badi, mi inkorij wahn lata wi bradaz ahn sistaz. Eena ih laif stoari, Brada Klein mi taak bowt wahn lata ih persnal chalenjiz weh ih mi-di schrogl wid. Fi egzampl, hihn mi chrai fi preech fahn hows tu hows fi di fos taim eena 1922. Bot hihn mi fain it soh haad dat ih neva preech fahn hows tu hows agen til too yaaz layta. Laytaraan, wen ih mi-di serv da Betel, wahn brada mi haftu giv ahn kongsl ahn Brada Klein mi hoal malis gens da brada fi wahn wail. Aalso, Brada Klein mi gaahn chroo wahn lata schres weh mi-di afek ahn imoashanali, bot ih mi geh beta afta sohn taim. Stilyet, hihn mi aalso injai wahn lata eksaitin an impoatant asainments. Eevn doa wahn lata peepl mi noa Brada Klein, hihn mi stil taak bowt fi hihn persnal chalenjiz weh ih mi schrogl wid, ahn dat mi shoa dat hihn mi reeli hombl! Wahn lata bradaz ahn sistaz memba Brada Klein an ih aanis ahn byootiful laif stoari.b

WAI WI NEED FI LAAN FI BEE HOMBL?

8. How 1 Peeta 5:6 help wi fi si dat wi mek Jehoava hapi wen wi hombl?

⁸ Di apasl Peeta mi mek it klyaa dat di moas impoatant reezn wai wi need fi bee hombl da bikaaz ih mek Jehoava hapi. (Reed 1 Peeta 5:6.) Di buk “Come Be My Follower” diskos weh Peeta mi seh. Ih seh: “Praid da laik paizn. Ih ku afek wi eena wahn terabl way. Eevn if wahn persn ga lata talent, ih yoosles tu Jehoava if ih prowd. Pahn di ada han, eevn if sombadi onli ga wahn lee bit a talent, ih ku bee reeli yoosful tu Jehoava if ih hombl. Jehoava wahn bee reeli hapi fi riwaad yu if yu hombl.”c Di bes ting weh wee kuda eva du da fi mek Jehoava hapi.—Prov. 23:15.

9. Wai ada peepl wahn waahn deh kloas tu wi if wi hombl?

⁹ Wi noh onli pleez Jehoava wen wi laan fi bee hombl, bot wi aalso geh wahn lata ada benifits. If wi hombl, ada peepl wahn waahn geh kloas tu wi. Fi andastan dis, tink bowt weh kaina peepl yoo laik fi deh rong. (Mach. 7:12) Wi noh naamali laik fi deh rong peepl weh aalwayz waahn ga dehn oan way ahn noh lisn tu enibadi els sojeshanz. Bot wi reeli injai fi deh wid wi bradaz ahn sistaz wen dehn “kansaan fi wan anada, . . . lov wan anada laik breda ahn sista, ahn . . . kain ahn hombl tu wan anada.” (1 Peet. 3:8) Dat da how wi feel tuwaadz hombl peepl, ahn dehn wahn aalso feel di saym way tuwaadz wee if wi hombl.

10. How wi laif ku geh eeziya if wi hombl?

¹⁰ If wi hombl, wi laif ku geh eeziya. Sohntaim, eena laif, wi mait ekspeeryens tingz weh wi mait tink noh fyaa. King Salaman da-mi wahn waiz man. Hihn mi seh: “Ai mi si servants di raid haas, bot di prins dehn di waak jos laik servants.” (Eccl. 10:7) Sohntaim peepl weh reeli talentid noh geh di aana weh dehn dizerv. Ahn sohntaim peepl weh noh aal dat talentid geh moa aana. Eevn soh, Salaman mi riyalaiz dat ih waiz fi mek wi fays laif di way how ih deh raada dan fi geh beks bowt negativ tingz weh di hapm. (Eccl. 6:9) If wi hombl, ih wahn bee eeziya fi mek wi aksep tingz eena laif weh wi noh laik.

WAT DA SOHN SICHUWAYSHAN WEH KU TES WI HYOOMILITI?

11. Weh wi shuda du wen wi geh kongsl?

¹¹ Evri day, wi ga di apachooniti fi shoa dat wi hombl. Mek wi luk pahn sohn sichuwayshan. Wen wi geh kongsl. Wi need fi memba dat if sombadi tek di taim fi kongsl wi, dat meenz dat wi mi praabli mek wahn biga mistayk dan wi mi tink wi mek. Di fos ting weh wi mait ten fi du da fi rijek kongsl wen sombadi kongsl wi. Wi mait eevn fain faalt wid di persn hoo gi wi di kongsl er di way ih mi gi di kongsl. Bot if wi hombl, wi wahn chrai fi shoa di rait atichood.

12. Akaadn tu Proverbs 27:5, 6, wai wi shuda bee graytful wen sombadi gi wi kongsl? Yooz di iloschrayshan eena di paragraaf.

¹² Wahn hombl persn apreeshiayt kongsl. Fi egzampl: Imajin dat yu deh da wahn Kristyan meetin. Afta yu taak tu sevral peepl, wan a dehn kaal yu wan said ahn tel yu dat yu ga beenz pahn yu teet. How yoo wuda feel? Shaym noh chroo? Bot yu wuda aalso apreeshiayt dat da persn tel yu bowt it. Az a mata a fak, yu wuda mi wish dat sombadi els mi tel yu bowt it erliya! Sayhn way soh, wi shuda bee hombl an apreeshiayt wen wan a wi bradaz er sistaz gi wi kongsl wen wi need it. Wi fi vyoo da persn az wi fren ahn noh az wi enimi.—Reed Proverbs 27:5, 6;d Gal. 4:16.

13. How wee ku shoa dat wi hombl wen adaz geh wahn privilij eena di kangrigayshan?

¹³ Wen adaz geh wahn privilij eena di kangrigayshan. Wahn elda weh naym Jason seh: “Wen Ai si adaz geh wahn privilij eena di kangrigayshan, sohntaimz Ah wanda wai dehn neva chooz mee.” Yoo eva feel laik dat? Akchwali, ih gud if wi waahn du moa fi Jehoava. (1 Tim. 3:1) Bot, wi need fi bee kyaaful a weh wi tink bowt. If wi noh kyaaful, wi ku alow praid fi groa eena wi haat. Fi egzampl, wahn brada ku staat tu tink dat hihn moa kwalifai dan aala di ada bradaz wen ih kohn tu wahn sertn rispansabiliti eena di kangrigayshan. Er wahn brada waif ku staat tu seh tu ihself, ‘Mai hozban faar moa kwalifai fi da asainment dan brada man!ʼ Bot, if wi reeli ahn chrooli hombl, wi noh wahn tink dis way.

14. Weh wi ku laan fahn di way Moaziz mi rispan wen adaz mi geh wahn asainment?

¹⁴ Wi ku laan wahn lat fahn di way Moaziz mi rispan wen adaz mi geh wahn asainment. Moaziz mi apreeshiayt fi hihn asainment fi leed di nayshan a Izrel. Bot Jehoava mi gi adaz di abiliti fi du som a di werk weh Moaziz mi-di du. How Moaziz mi rispan? Hihn neva jelos. (Num. 11:24-29) Hihn mi hombl an ih mi alow adaz fi help ahn joj di Izrelait dehn. (Ex. 18:13-24) Now di Izrelait dehn neva mi wahn need fi wayt az lang fi mek Moaziz handl dehn kays kaaz hihn mi ga moa help. Dis shoa wi dat Moaziz mi kay moa bowt di peepl dan bowt wahn asainment er privilij. Dat da wahn gud egzampl fi aala wi! Wi need fi memba dat if wi waahn bee yoosful tu Jehoava, ih moa impoatant fi bee hombl dan fi ga wahn lata talent. “Aldoa Jehoava da di Moas Hai, hihn stil noatis di wan dehn weh hombl.”—Ps. 138:6.

15. How wahn lata bradaz ahn sistaz sichuwayshan eena laif mi chaynj?

¹⁵ Wen wi sichuwayshan eena laif chaynj. Sohn yaaz agoa, wahn lata wi bradaz ahn sistaz weh di serv Jehoava fi yaaz mi geh wahn chaynj a asainment. Fi egzampl, bak eena 2014, di aaganaizayshan mi seh dat dehn noh wahn ga dischrik oavaseeyaz nohmoh, soh dehn bradaz ahn dehn waif mi geh ada asainments. Den eena da sayhn yaa, di aaganaizayshan mi seh dat wen wahn brada reech 70, ih wahn kyaahn serv az wahn serkit oavaseeya nohmoh. Ahn bradaz weh 80 an oalda, wahn kyaahn serv az di koardinayta a di badi a eldaz eena dehn kangrigayshan. Aalso, wahn lata Betelaits geh wahn nyoo asainment fi bee painyaaz agen. Adaz haftu lef dehn speshal ful-taim servis bikaaz a helt prablemz, famili rispansabilitiz, er fi sohn ada reezn.

16. How wi bradaz ahn sistaz shoa dat dehn hombl wen dehn di ajos tu dehn nyoo sichuwayshan eena laif?

¹⁶ Fi wahn lata bradaz ahn sistaz, ih mi reeli haad fi mek dehnya chaynjiz. Wahn lata dehn weh geh wahn nyoo asainment mi reeli lov di asainment weh dehn mi ga fi yaaz. Som mi gaahn chroo wahn reeli sad taim az dehn mi ajos tu dehn nyoo sichuwayshan eena laif. Bot afta wahn wail, dehn mi aybl fi ajos. Wai dehn mi aybl fi du dis? Bikaaz di mayn ting weh mi help dehn da-mi dehn lov fi Jehoava. Dehn neva pramis fi serv Jehoava onli if dehn mi ga wahn sertn werk er asainment. (Kol. 3:23) Bikaaz dehn hombl, dehn hapi fi serv Jehoava eena eni asainment. Dehn “chroa aala [dehn] woriz ahn kyaa pahn Gaad,” kaaz dehn noa dat hihn kay fi dehn.—1 Peet. 5:6, 7.

17. Wai wi graytful dat Gaad Werd inkorij wi fi bee hombl?

¹⁷ Wi reeli graytful dat di Baibl inkorij wi fi bee hombl. Wen wi hombl, adaz injai fi deh rong wi, ahn wee benifit tu. Ih help wi fi deel wid di chalenjiz eena laif beta. Bot moas impoatant, wi geh kloasa tu wi hevnli Faada. Wi soh hapi fi noa dat eevn doa hihn da “di Haiyis Wan,” hihn lov ih hombl servants, ahn dehn preshos tu hihn!—Isa. 57:15.