Luk! “Wahn Big Big Krowd”

1. Weh di apasl Jan laif mi stan laik rong di yaa 95 C.E.?

RONG di yaa 95 C.E., di apasl Jan mi deh eena wahn veri tof sichuwayshan. Hihn mi oal, ih mi kyaahn lef di ailan a Patmos, ahn hihn da-mi praabli di onli apasl weh mi stil livin. (Rev. 1:9) Hihn mi noa dat apastayts mi-di teech faals tingz ahn mi-di kaaz divizhan monks Kristyanz. Ih maita mi luk laik soon nohmoh chroo Kristyanz mi wahn deh.—Jood 4; Rev. 2:15, 20; 3:1, 17.

2. Akaadn tu Revilayshan 7:9-14, weh eksaitin vizhan Jan mi geh? (Koment pahn di picha pahn di kova.)

² Wail Jan mi deh eena dis tof sichuwayshan, Gaad mi gi ahn wahn eksaitin vizhan bowt di fyoocha. Eena da vizhan, wahn aynjel tel foa ada aynjel fi hoal bak di foa breez a di grayt chribyulayshan til dehn don put wahn seel pahn di farid a dehn wan weh di serv Gaad. (Rev. 7:1-3) Dehn wan weh wahn geh da seel mek op a 144,000 peepl hoo wahn rool wid Jeezas da hevn. (Look 12:32; Rev. 7:4) Den Jan menshan wahn nada groop, da groop mi soh big dat Jan seh: “Ah luk ahn den Ah si wahn big big krowd. Da mi soh moch peepl dat nobadi kuda mi konk aala dehn. Dehn mi kohn fahn owta evri nayshan eena di werl, fahn owta evri chraib ahn evri langwij eena di werl. Dehn mi-di stan op fronta di chroan ahn fronta di Lam.” (Reed Revilayshan 7:9-14.) Jos imajin how hapi Jan mosi mi feel fi laan dat eena di fyoocha dehn wahn ga lata peepl hoo wership Gaad eena di rait way!

3. (a) Wai di vizhan weh Jan mi geh shuda schrentn wi fayt? (b) Weh wi wahn laan eena dis aatikl?

³ Wi ku bee shoar dat da vizhan mi schrentn Jan fayt. Ahn ih shuda schrentn fi wee fayt eevn moa bikaaz ih ga fi du wid di taim weh wee di liv eena rait now; di laas dayz! Eena fi wee taim, milyanz a peepl don di wership Jehoava ahn dehn di hoap fi servaiv di grayt chribyulayshan ahn fi liv fareva pahn ert. Eena dis aatikl, wi wahn laan how Jehoava mek ih peepl dehn noa hoo da di big big krowd moa dan 80 yaaz agoa. Den, wi wahn diskos too tingz bowt da krowd: (1) di saiz a di krowd ahn (2) hoo aal ku bee paat a it. Dehnya too tingz shuda schrentn di fayt a aal hoo hoap fi bee paat a da krowd.

WEHPAAT DI BIG BIG KROWD WAHN LIV?

4. Weh chroot fahn di Baibl faals rilijan noh andastan, ahn how di Baibl Styoodents mi difrent eena dis kays?

⁴ Moas a di taim, faals rilijan noh teech di chroot dat wan day obeedyant hyoomanz wahn liv pahn di ert fareva. (2 Kor. 4:3, 4) Tudeh, moas a faals rilijan teech dat aal gud peepl goh da hevn wen dehn ded. Bot ih mi difrent wid di smaal groop a Baibl Styoodentsb weh mi-di poblish di Watch Tower eena di layt 1800ʼs. Dehn mi andastan dat Gaad mi wahn mek di ert wahn Paradais agen, ahn dat milyanz a peepl weh obeedyant tu hihn wahn liv rait ya pahn ert—noh da hevn. Bot, ih mi tek taim fi mek dehn reeli andastan hoo dehn obeedyant peepl mi wahn bee.—Mach. 6:10.

5. Weh di Baibl Styoodents mi bileev bowt di 144,000?

⁵ Af koars, di Baibl Styoodents mi aalso andastan fahn di Baibl dat wahn groop a peepl wuda mi geh pik “fahn owta di werl weh Krais mi pay fa wid ih blod” fi rool wid hihn da hevn. (Rev. 14:3) Da groop wahn mek op a 144,000 faytful Kristyanz hoo mi serv Gaad wid zeel ahn dedikayshan wail dehn mi deh pahn ert. How bowt di big big krowd?

6. Weh di Baibl Styoodents mi bileev bowt di big big krowd?

⁶ Eena di vizhan weh Jan mi geh, hihn mi si da krowd di “stan op fronta di chroan ahn fronta di Lam.” (Rev. 7:9) Dehndeh werdz mi kaaz di Baibl Styoodents fi bileev dat di big big krowd wahn liv da hevn jos laik di 144,000. Soh if di 144,000 ahn di big big krowd mi fi liv da hevn, den weh mi wahn mek dehn difrent fahn eech ada? Di Baibl Styoodents mi tink dat maybi di big big krowd mi mek op a Kristyanz weh neva reeli obeedyant tu Gaad wail dehn mi deh pahn ert. Aldoa dehn mi fala di Baibl moaral standadz ahn liv wahn kleen laif, maybi som a dehn mi kantinyu fi bee paat a faals rilijan. Di Baibl Styoodents mi aalso bileev dat dehn wan weh mi mek op dis big big krowd mi ga lov fi Gaad bot noh inof lov fi rool lang wid Jeezas. Ahn bikaaz dehn lov neva schrang inof, di big big krowd wuda onli kwalifai fi goh da hevn fi stan op fronta di chroan bot noh kwalifai inof fi sidong pahn di chroan dehn.

7. Akaadn tu di Baibl Styoodents, hoo mi fi liv pahn di ert joorin di Towzn-Yaa Rool, ahn weh di Baibl Styoodents mi bileev bowt faytful wanz weh mi ded bifoa Krais?

⁷ Hoo wuda mi liv pahn ert? Di Baibl Styoodents mi bileev dat di 144,000 ahn di big big krowd mi gwehn da hevn, ahn milyanz a ada peepl mi wahn geh di privilij fi liv pahn ert fi injai di benifits a Krais Towzn-Yaa Rool. Di Baibl Styoodents neva bileev dat dehn milyanz a peepl mi wahn serv Jehoava bifoa di Towzn-Yaa Rool. Raada, dehn mi bileev dat dis groop mi wahn laan bowt Jehoava joorin di Towzn-Yaa Rool. Den afta dat, peepl weh obay Jehoava standadz wuda mi geh bles wid evalastin laif pahn ert, ahn peepl weh neva obay mi wahn geh dischrai. Di Baibl Styoodents mi bileev dat som hoo wahn serv az “prins” pahn ert joorin da taim, wahn geh di riwaad fi liv da hevn afta di Towzn-Yaa Rool. Dehn mi aalso bileev dat som a di faytful wanz weh mi ded bifoa Krais, weh wahn geh rezorek, wahn bee “prins” tu.—Ps. 45:16.

8. Weh chree groop mi luk laik dehn mi ga wahn plays eena Gaad perpos?

⁸ Soh, di Baibl Styoodents mi feel laik dehn mi ga chree groop: (1) di 144,000, hoo wahn rool wid Jeezas da hevn; (2) di big big krowd weh neva ga az moch zeel, hoo wahn stan op fronta di chroan a Jeezas Krais; ahn (3) milyanz a peepl hoo wahn laan bowt Jehoava standadz pahn ert joorin Krais Towzn-Yaa Rool.c Bot laytaraan, Jehoava mi help dehn fi andastan dis sobjek beta.—Prov. 4:18.

DI LAIT A CHROOT GEH BRAITA

9. (a) Eena weh way di big big krowd ku “stan op fronta di chroan ahn fronta di Lam” pahn ert? (b) Wai dis andastandin a Revilayshan 7:9 mek sens?

⁹ Eena 1935, Jehoava Witnisiz mi andastan klyaa-wan hoo da-mi di big big krowd weh Jan mi si eena ih vizhan. Di Witnisiz mi riyalaiz dat di big big krowd noh haftu akchwali deh da hevn fi “stan op fronta di chroan ahn fronta di Lam.” Eevn doa dehn wahn liv pahn di ert, di big big krowd ku “stan op fronta di chroan” wen dehn aksep Jehoava az di Roola a di yoonivers ahn wen dehn obay hihn. (Isa. 66:1) Dehn ku “stan op fronta di Lam” if dehn put fayt eena Jeezas ransom sakrifais. Jos laik dat, da Machyu 25:31, 32, ih seh dat “aala di nayshan dehn”—inkloodin di wikid—“wahn gyada fronta” Jeezas weh deh pan ih chroan. Ih klyaa fi si dat aala dehnya nayshanz noh deh da hevn, bot pahn ert. Dis nyoo andastandin weh Jehoava Witnisiz mi get eena 1935 mek wahn lata sens. Ih eksplayn wai di Baibl noh seh dat di big big krowd gwehn da hevn. Di Baibl onli pramis evalastin laif da hevn tu wan groop a peepl—di 144,000, hoo wahn “rool az king oava di ert” wid Jeezas.—Rev. 5:10, NW.

10. Wai ih nesiseri fi mek di big big krowd laan bowt Jehoava wayz bifoa di Towzn-Yaa Rool?

¹⁰ Sins 1935, Jehoava Witnisiz andastan dat di big big krowd da wahn groop a faytful Kristyanz weh ga di hoap fi liv fareva pahn di ert. Fi mek dehn servaiv di grayt chribyulayshan, di big big krowd wahn need fi laan bowt Jehoava ahn staat tu wership hihn bifoa di Towzn-Yaa Rool. Dehn wahn need fi shoa schrang fayt fi mek dehn “goh chroo aala dehn ting weh wahn hapm” bifoa Krais Towzn-Yaa Rool.—Look 21:34-36.

11. Wai sohn Baibl Styoodents maita mi tink dat maybi som a dehn mi gwehn da hevn afta di Towzn-Yaa Rool?

¹¹ How bowt di aidyaa dat som peepl weh reeli mi liv wahn laif weh pleez Gaad mi gwehn da hevn afta di Towzn-Yaa Rool? Da aidyaa mi kom op eena di Febiweri 15, 1913, ishu a The Watch Tower. Peepl kuda mi wanda, ‘Wai faytful servants a Gaad weh mi ded bifoa Krais ahn weh wahn geh rezorek mi wahn onli alow fi liv pahn ert, wen Kristyanz weh neva az faytful mi wahn geh di privilij fi liv eena hevn?ʼ Af koars, dehn mi tink dis way bikaaz dehn mi ga di rang andastandin: (1) dat di big big krowd mi wahn liv da hevn, ahn (2) dat di big big krowd mek op a Kristyanz weh neva az faytful.

12-13. Weh di anointid ahn di big big krowd noa bowt dehn riwaad?

¹² Laik weh wi don si, sins 1935, Jehoava Witnisiz andastan klyaa-wan dat di peepl weh servaiv Armagedon da di big big krowd fahn Jan vizhan. Dehn wahn ‘kohn owta di grayt chribyulayshanʼ rait ya pahn ert, ahn dehn wahn “hala owt haad seh, ‘Fi wee Gaad, weh sidong pahn di chroan, ahn di Lam, da dehn sayv wee.ʼ” (Rev. 7:10, 14) Pahn tap a dat, di Baibl teech dat dehn wan weh geh rezorek fi liv da hevn waahn geh “beta tingz” dan di faytful wanz weh mi ded bifoa Krais. (Heeb. 11:40) Soh, wi bradaz ahn sistaz mi eega fi staat invait peepl fi serv Jehoava wid di hoap fi liv pahn ert fareva.

¹³ Di big krowd rijais eena dehn hoap. Dehn andastan dat da Jehoava chooz wehpaat ih faytful servants wahn serv hihn, weda da hevn er pahn ert. Di anointid ahn di big big krowd rekonaiz dat dehn neva dizerv dehn riwaad bot ih pasabl onli bikaaz Jehoava mi provaid di ransom sakrifais a Jeezas Krais.—Roam. 3:24.

BIG EENA WEH SENS?

14. Afta 1935, wai wahn lata peepl mi-di wanda how di prafesi bowt di big big krowd mi wahn geh fulfil?

¹⁴ Afta Jehoava peepl mi geh wahn nyoo andastandin eena 1935, wahn lata dehn mi stil wanda how di krowd a peepl hoo mi hoap fi liv pahn ert mi wahn geh “big.” Fi egzampl, Ronald Parkin mi 12 yaaz oal wen di bradaz mi geh fi noa hoo da di big big krowd. Hihn seh: “Rong da taim, dehn onli mi ga bowt 56,000 poblishaz werlwaid ahn moas a dehn mi anointid. Soh di big big krowd neva luk aal dat big tu mee.”

15. How di big big krowd mi kantinyu fi groa?

¹⁵ Sohn yaaz layta, doh, di aaganaizayshan mi sen mishineriz eena lata difrent konchri, ahn di amonk a Jehoava Witnisiz mi kantinyu fi groa. Den, eena 1968, wahn Baibl stodi proagram mi staat wid di buk The Truth That Leads to Eternal Life. Da buk mi eksplayn Baibl chroot eena wahn way weh mi eezi fi andastan. An ih mi jraa moa peepl tu Jehoava dan eva bifoa. Eena jos foa yaaz, moa dan haaf a milyan nyoo disaiplz mi geh baptaiz. Di Kyaatlik Cherch mi staat tu looz ih powa eena Latin America an ada konchriz. Ahn wi werk mi no langa deh anda ban da Eastern Europe ahn sohn paats a Africa. Aala dis mi mek it pasabl fi milyanz moa geh baptaiz. (Isa. 60:22) Laytli, Jehoava aaganaizayshan di mek wahn lata ada toolz fi help peepl laan weh di Baibl teech. Ih klyaa fi si dat Jehoava di gyada wahn big big krowd a peepl. Now, da krowd mek op a moa dan 8 milyan peepl.

WAHN BIG BIG KROWD FAHN AAL OAVA DI WERL

16. Fahn wehpaat di big big krowd di geh gyada?

¹⁶ Wen Jan mi rait dong bowt di vizhan weh ih mi geh, ih mi rait dat di big big krowd wahn “kohn fahn owta evri nayshan eena di werl, fahn owta evri chraib ahn evri langwij eena di werl.” Erliya, di prafit Zekaraiya mi rait bowt sohnting simila. Hihn mi rait: “Eena dehn dayz ten man owta aala di langwij a di nayshan dehn wahn hoal aan tait, yes, dehn wahn hoal aan tait tu di roab a wahn Joo, di seh: ‘Wee waahn goh wid unu peepl, bikaa wi don hyaa dat Gaad deh wid unu peepl.ʼ”—Zech. 8:23.

17. Weh di geh don fi help peepl fahn aal nayshanz ahn langwij?

¹⁷ Jehoava Witnisiz riyalaiz dat di gud nyooz need fi geh preech eena lata difrent langwij soh dat peepl fahn aal oava di werl ku kohn tugeda. Wee di du chranslayshan a Baibl-bays poblikayshanz fi oava 130 yaaz, bot now wi di chranslayt moa dan eva bifoa eena honjridz a difrent langwij. Ih klyaa fi si dat Jehoava di perfaam wahn mirakl tudeh—fi gyada wahn big big krowd fahn owta aala di nayshan dehn. Bikaaz di Baibl ahn Baibl-bays poblikayshanz avaylabl eena soh moch langwij, dis krowd wership Jehoava eena yooniti, eevn if dehn kohn fahn aal oava di werl. Ahn Jehoava peepl faymos fi di lov dehn shoa ahn fi dehn lov fi di minischri. Dat reeli schrentn wi fayt!—Mach. 24:14; Jan 13:35.

WEH DI VIZHAN MEEN FI WEE?

18. (a) Akaadn tu Isaiah 46:10, 11, wai wi noh sopraiz dat Jehoava fulfil di prafesi bowt di big big krowd? (b) Wai peepl hoo hoap fi liv pahn di ert noh feel lef owt?

¹⁸ Wee veri eksaitid bowt di prafesi a wahn big big krowd! Wee noh sopraiz dat Jehoava fulfil da prafesi eena soch a wandaful way. (Reed Isaiah 46:10, 11.)d Peepl weh da paat a di big big krowd graytful fi di hoap weh Jehoava gi dehn. Dehn noh feel lef owt kaaz dehn noh anointid fi serv da hevn wid Jeezas. Aal chroo di Baibl, wi reed bowt faytful man an uman hoo mi geh gaidans fahn Jehoava hoali spirit; stilyet, dehn da noh paat a di 144,000. Wan egzampl da Jan di Baptis. (Mach. 11:11) Wahn nada egzampl da Dayvid. (Aks 2:34) Dehnya faytful wanz, lang wid lat moa, wahn geh rezorek pahn wahn paradais ert. Aala dehn—lang wid di big big krowd—wahn geh di apachooniti fi shoa dat dehn laayal tu Jehoava ahn fi hihn roolaship.

19. If wi andastan di meenin a Jan vizhan bowt di big big krowd, weh wi wahn du?

¹⁹ Dis da di fos taim Gaad gyada milyanz a peepl tugeda fahn aal nayshanz fi wership hihn. Weda wi ga di hoap fi liv da hevn er fi liv pahn ert, wi need fi help az moch peepl az pasabl fi bee paat a di big big krowd a ada sheep. (Jan 10:16) Soon, Jehoava wahn bring di grayt chribyulayshan weh wahn dischrai di govament dehn ahn di rilijan dehn weh di kaaz wahn lata sofarin tu hyoomanz. Aal membaz a di big big krowd ga wahn wandaful apachooniti. Dehn wahn bee aybl fi serv Jehoava pahn di ert fareva!—Rev. 7:14.