Yu Tink Peepl Mi Chaynj di Mesij Fahn di Baibl?

Som peepl wanda if di mesij fahn di Baibl mi chaynj oava di yaaz. Di prafit Aizaiya mi seh dat Gaad werd “wahn laas fareva.” (Isaiah 40:8) How wi ku bee shoar dat di pramis dehn fahn di Baibl noh chaynj?

Gaad ga di powa fi mek di Baibl kantinyu fi egzis ahn fi stap enibadi fahn chaynj di mesij eena it. Hischri shoa wi dat wen sohn man mi mek kapiz a di Baibl, dehn mi konk evri leta eena di teks soh dat dehn noh ad aan, chaynj er lef owt eniting. Bot hyoomanz noh perfek; soh wen som a dehndeh man mi mek kapiz a di Baibl, dehn mi mek sohn smaal lee mistayk.

HOW WI KU BEE SHOAR DAT DI MESIJ FAHN DI BAIBL NOH CHAYNJ?

Towznz a kapiz a di orijinal teks fahn di Baibl stil egzis tudeh. Soh eevn if wan a di kapiz ga wahn smaal lee difrens, wi ku stil noa di chroot wen wi kompyaa it tu di res. (Fi laan moa bowt dis, goh pahn jw.org/bzj ahn fain di aatikl “Yu Tink di Mesij a di Baibl Geh Chaynj?”)

Fi egzampl, tink bowt di oal manyuskrip dehn weh naym di Ded See Skroalz, weh di bedouins peepl mi fain eena wahn kayv weh deh kloas tu di Ded See eena 1947. Dehnya oal manyuskrip gat een sohn paats a di Baibl weh mi geh rait dong moa dan too towznz yaaz agoa. Ahn sohn peepl weh stodi Baibl manyuskrip mi kompyaa dehndeh oal manyuskrip wid di Baibl weh wi ga tudeh. Soh da weh dehn mi fain owt?

Sohn peepl weh stodi Baibl manyuskrip mi fain owt dat di mesij fahn di Baibl weh wi ga tudeh da di saym az di oal Baibl manyuskrip dehn.a Ahn dis proov dat wen wi di reed di Baibl, wi di reed Gaad orijinal mesij. Wi ku bee shoar dat Gaad protek di mesij a di Baibl fi wee tudeh.

Soh den, wen wi reed di Baibl, wi ku bee kanfident dat di mesij fahn di Baibl karek. Now dat wi don diskos aala dat, mek wi si weh wi ku laan bowt Gaad fan ih prafit dehn.