How fi Shoa Lov tu Wi Nayba Dehn

Aala wi da Adam chiljren, soh wi da wan famili. Eevn doa eech memba a wahn famili shuda shoa lov ahn rispek wan anada, ih haad fi fain da kaina lov nowadayz. Dis da noh weh wi lovin Gaad waahnt.

WEH DI BAIBL SEH BOWT LOV

“Yu fi lov yu nayba jos laik how yu lov yuself.”—LEVITICUS 19:18.

“Kantinyu fi lov unu enimi dehn.” —MACHYU 5:44.

WEH IH MEEN FI LOV WI NAYBA

Noatis how Gaad diskraib lov eena ih Werd di Baibl da 1 Korintyanz 13:4-7:

“Lov payshent ahn kain.”

Tink bowt dis: How yoo feel wen adaz payshent ahn kain wid yu ahn noh geh beks wid yu wen yu mek wahn mistayk?

“Lov noh jelos.”

Tink bowt dis: How yoo feel wen adaz shoa dat dehn noh chros yu er jelos yu?

Lov “noh tink onli bowt ih oanself.”

Tink bowt dis: How yoo feel wen adaz rispek yu opinyan ahn noh aalwayz waahn du tingz fi dehn way?

Lov “noh hoal malis.”

Tink bowt dis: Gaad wilin fi fergiv peepl weh sin gens hihn ahn weh feel sari fi weh dehn du. “Hihn noh aalwayz fain faalt, ner stay opset fareva.” (Psalms 103:9) Wi apreeshiayt it wen sombadi weh wi ofen fergiv wi. Soh wi shuda bee wilin fi fergiv adaz wen dehn ofen wi.—Psalms 86:5.

“Lov noh rijais oava notn weh noh raichos.”

Tink bowt dis: Wen sohnting bad hapm tu wi, wi noh laik it wen adaz rijais oava weh mi hapm tu wi. Soh wi noh rijais wen adaz sofa, eevn if dehn mi chreet wi bad.

If wi waahn Gaad bles wi, wi need fi lov adaz di way hihn seh, noh mata hoo dehn. Wan way wi ku shoa lov da fi du tingz fi peepl weh need help.