Weh Kaina Frenz Yu Ga Pahn di Intanet?

Di meenin a di werd fren da “sombadi weh kloas tu wahn nada persn bikaaz ih kay bowt ahn er bikaaz ih mek ahn hapi.” Fi egzampl, Janatan ahn Dayvid mi staat tu bee kloas frenz afta Dayvid mi kil Golaiyat. (1Sa 18:1) Janatan mi ga kwalitiz weh Dayvid mi laik ahn Dayvid mi ga kwalitiz weh Janatan mi laik. Soh if yu waahn ga wahn schrang frenship wid sombadi, yu haftu geh fi noa dehn reeli gud. Ih tek wahn lata taim an efoat fi geh fi noa wahn nada persn. Bot wen yu yooz soashal meedya, ih eeziya fi bee “frenz” wid sombadi bikaaz yu jos haftu pres wahn botn fi aksep di persn az yu fren. Ih eezi fi mek wahn persn haid hoo dehn pahn di Intanet, bikaaz dehn ku plan owt weh dehn wahn seh ahn priten fi bee sombadi els jos fi mek adaz laik dehn. Dats wai ih gud fi mek wi tink bowt weh kaina peepl wi waahn aksep az wi fren. If sohnbadi weh yu noh noa aks yu fi bee ih fren pahn soashal meedya, noh bee frayd fi ignoar er rijek ih rikwes eevn if yu tink dat yu mait hert ih feelinz. Bikaaz sohn peepl si di daynjaz weh ku hapm pahn soashal meedya, dehn chooz fi noh yooz it ataal. Bot, if yu chooz fi yooz soashal meedya, weh aal yu shuda tink bowt?

WACH DI VEEDYO WEH NAYM BEE SMAAT WID HOW YU YOOZ SOASHAL MEEDYA, AHN DEN ANSA DEHNYA KWESCHAN:

• 

  Weh yu shuda tink bowt bifoa yu poas wahn koment er wahn picha pahn soashal meedya?

• 

  Wai yu need fi bee kyaaful wen yu di chooz yu frenz pahn soashal meedya?

• 

  Wai yu shuda set wahn limit pahn di amonk a taim weh yu spen pahn soashal meedya?—Ifee 5:15, 16