Yu Tink if Wi Da Wahn Gud Persn, Dat Inof fi Ga Wahn Beta Fyoocha?
Fi honjridz a yaaz, lata peepl feel dat if yu da wahn gud persn, dat wahn mek yu ga wahn beta fyoocha. Fi egzampl, lata peepl da Asia gree wid weh wahn faymos teecha weh naym Confucius seh. (551-479 B.C.E.) Hihn seh: “Weh yu noh waahn adaz du tu yu, noh du tu adaz.”a
WAHN LATA PEEPL CHRAI FI DU GUD TINGZ FI GA WAHN HAPI FYOOCHA
Lata peepl stil bileev dat if dehn bihayv gud, dehn wahn ga wahn beta fyoocha. Dehn chrai fi bee rispekful peepl, ga gud manaz, andastan dehn plays eena sosaiyati, ahn fi kip wahn gud kanshans. Linh, wahn uman fahn Vietnam, seh: “Ah mi aalwayz bileev dat if Ah mi aanis ahn sinsyaa, Ah mi wahn ga wahn gud laif.”
Sohn peepl chrai du gud bikaaz a dehn rilijos bileef. Wahn man weh naym Hsu-Yun, weh liv da Taiwan, seh: “Dehn mi teech mi dat if wahn persn du gud tingz, ih wahn bee hapi afta ih ded. Bot if ih du bad tingz, ih wahn sofa.”
DEHNDEH TEECHINZ REELI HELP PEEPL?
Da chroo, dehn ga lata benifits wen yu du gud tu adaz. Bot wahn lata peepl weh chrai du gud tu adaz riyalaiz dat dehn noh aalwayz geh chreet di saym way. Wahn uman weh naym Shiu Ping, weh liv da Hong Kong, seh: “Ah laan fahn mai ekspeeryens dat dehn wan weh du gud noh aalwayz geh chreet di saym way. Ai mi du mi bes fi tek kayr a mi famili ahn fi du gud, bot stilyet mi hozban mi abandan mee ahn mi son.”
Wahn lata peepl geh fi si dat noh aal rilijos peepl da gud peepl. Etsuko, wahn uman weh liv da Japan, seh: “Ah mi jain wahn rilijan an Ai mi aaganaiz di aktivitiz fi yong peepl. Ah mi shak fi si dat sohn peepl eena di rilijan mi liv wahn imoaral laif, dehn mi kompeet wid wan anada fi powa, ahn dehn neva yooz di cherch moni gud.”
“Ai mi du mi bes fi tek kayr a mi famili ahn fi du gud, bot stilyet mi hozban mi abandan mee ahn mi son.”—SHIU PING, HONG KONG
Sohn peepl weh veri rilijos ahn weh chrai fi du gud tingz geh disapointid wen bad tingz hapm tu dehn. Dat da how Van, wahn uman fahn Vietnam, mi feel. Shee seh: “Evri day Ai mi bai froots, flowaz, ahn food an Ah mi aafa dehn da di alta a mi ded ansesta dehn. Ah mi hoap dat wan day Ah wuda geh blesinz. Eevn doa Ah du aala dehn gud tingz ahn fala di rilijos chradishanz fi lata yaaz, mi hozban mi geh sik bad. Ahn wail mi daata mi-di stodi da wahn neks konchri, shee mi ded wen shee mi jos 20 yaaz oal.”
If ih noh inof fi mek wi bee wahn gud persn, den weh wahn mek wi ga wahn beta fyoocha? Fi ansa da kweschan, wi need wahn gaid weh ga infamayshan weh wi ku chros, weh ku ansa wi kweschanz, ahn weh ku shoa wi di way tu wahn beta fyoocha. Wehpaat wi ku fain da gaid?
a Fi moa infamayshan bowt weh Confucius mi teech, si chapta 7 a di buk weh naym Mankindʼs Search for God, paragraaf 31-35, weh Jehoava Witnisiz poblish an ih avaylabl onlain da www.pr2711.com.