Yoo Ku Disaid Weh Yu Fyoocha Wahn Bee Laik

Sohn 3,500 yaaz agoa, Jehoava Gaad mi tel ih peepl weh wership ahn weh dehn need fi du fi ga wahn beta fyoocha. Hihn mi seh: “Ai put laif ahn det fronta unu, wahn blesin ahn wahn kers, an unu fi chooz laif soh dat unu ku liv, unu an unu disendant dehn.”—Deuteronomy 30:19.

Fi ga wahn beta fyoocha, Gaad peepl mi haftu mek di rait disizhan. Tudeh day, wi ga da sayhn disizhan fi mek. Di Baibl tel wi how wi ku chooz wahn beta fyoocha. Ih seh: ‘Wen yu kip di lov Jehoava yu Gaad, ahn wen yu lisn tu fi hihn vais.ʼ—Deuteronomy 30:20.

HOW WI KU LOV JEHOAVA AHN LISN TU FI HIHN VAIS?

LAAN FAHN DI BAIBL: Fi lov Jehoava, ih meenz dat fers yu need fi laan bowt hihn fahn di Baibl. Az yu du dat, yu wahn noatis dat hihn da wahn lovin Gaad weh waahn di bes fi yu. Hihn invait yu fi pray tu ahn ‘bikaaz hihn kay bowt yu.ʼ (1 Peeta 5:7) Di Baibl pramis dat if yu chrai laan bowt hihn, “hihn wahn jraa kloas tu yu.”—Jaymz 4:8.

DU WEH DI BAIBL SEH EENA YU LAIF: Fi lisn tu Gaad meenz dat yu wahn fala fi hihn waiz gaidans weh deh eena di Baibl. Az yu du dat, “yu wahn ga sokses eena weh yu du.”—Joshua 1:8.