Aal Bikaaz a Wahn Smail!

TOO yong laydi mi-di waak tugeda dongtong Banguio City, Philippines. Dehn mi si wahn sista di du kyaat werk, bot dehn neva stap. Helen, di sista weh mi-di stan op deh wid di kyaat, mi smail wid dehn. Di too yong laydi mi kantinyu pahn dehn way, bot dehn neva ferget Helen frenli smail.

Laytaraan, di too yong laydi mi-di goh hoam pahn bos, ahn dehn si wahn big jw.org sain pahn wahn Kingdom Haal. Dehn memba dat dehn mi si di saym sain pahn di kyaat erliya. Di too a dehn get aafa di bos fi luk pahn di sain da di gayt a di Kingdom Haal fi si weh taim di difrent kangrigayshan mi ga meetin.

Di too yong laydi gaahn da wan a di neks meetin. Ges hoo dehn si wen dehn waak eena di Kingdom Haal? Helen! Az soon az dehn si ahn, dehn mi noa dat shee da di laydi wid di big smail. Helen seh: “Ah mi kaina nervos wen dehn waak op tu mi. Ah mi tink dat maybi Ah mi du sohnting rang.” Bot di yong laydi dehn tel Helen weh mi hapm.

Di yong laydi dehn mi injai di meetin, ahn dehn mi injai di taim weh dehn spen wid di bradaz ahn sistaz. Wen dehn mi si di bradaz ahn sistaz di kleen di haal afta di meetin, dehn aks if dehn ku help. Wan a di yong laydi mi en op di lef di konchri, bot di ada wan staat goh da meetin an ih staat stodi di Baibl—aal bikaaz a wahn smail!