Inchrodokshan

Di werl ful op a peepl weh hayt eech ada. Peepl shoa dat dehn hayt adaz eena wahn lata difrent wayz. Fi egzampl, dehn mait chreet peepl bad bikaaz dehn difrent, dehn seh tingz weh hert dehn, er dehn eevn beet dehn op. Yu tink peepl wahn eva stap hayt adaz? Di aatikl dehn eena dis kapi a Di Wachtowa wahn shoa wi how di Baibl ku help peepl fi stap hayt eech ada. Wi wahn aalso si di pramis weh Gaad mek fi geh rid a haychrid fareva.