How Jehoava Ansa Wi Pryaaz

1-2. How som a wi mait feel wen wi pray?

YOO eva wanda if Jehoava di ansa yu pryaaz? If dat da di kays, yoo da noh di onli wan weh feel soh. Wahn lata bradaz ahn sistaz feel laik dis, espeshali wen dehn di goh chroo wahn rof taim. If wi di goh chroo haad taimz, dat ku mek it haad fi mek wi si dat Jehoava di ansa wi pryaaz.

² Eena dis aatikl, wi wahn diskos how wi ku bee shoar dat Jehoava ansa di pryaaz a ih faytful servants. (1 Jan 5:15) Wi wahn aalso ansa dehnya kweschanz: Wai wi mait tink sohntaim dat Jehoava noh di ansa wi pryaaz? How Jehoava di ansa fi wee pryaaz tudeh?

JEHOAVA MAIT NOH ANSA WI PRYAAZ DI WAY WI EKSPEK

3. Wai Jehoava waahn wi pray tu ahn?

³ Eena di Baibl, Jehoava tel wi dat hihn lov wi wahn lat ahn dat wi preshos tu ahn. (Hag. 2:7; 1 Jan 4:10) Soh dat da wai hihn waahn wi aks ahn fi help. (1 Peet. 5:6, 7) Jehoava waahn help wi fi stay kloas tu ahn, an fi stay faytful wen wi di goh chroo wahn tof sichuwayshan.

4. How wee noa dat Jehoava ansa di pryaaz a ih faytful servants? (Koment pahn di picha.)

⁴ Wen wi reed di Baibl, wi laan dat Jehoava ansa di pryaaz a ih faytful servants. Yoo ku tink bowt wahn egzampl? Tink bowt King Dayvid. Aal chroo Dayvid laif, ih mi haftu fait gens sohn enimiz weh mi waahn kil ahn, an ih mi bayg Jehoava fi help ahn. Wan taim, hihn mi poar owt ih haat tu Jehoava ahn seh: “Oa Jehoava, pleez lisn tu mi pryaaz; Ah bayg yu, pleez help mi. Laik how yoo faytful ahn yu aalwayz du weh rait, pleez ansa mi.” (Ps. 143:1) Jehoava mi ansa Dayvid pryaa an ih mi sayv ahn. (1 Sam. 19:10, 18-20; 2 Sam. 5:17-25) Dayvid mi shoar dat “Jehoava noh deh faar fahn di wan dehn weh di kaal pahn hihn.” Jos laik Dayvid, wi ku bee shoar dat Jehoava wahn ansa wi pryaaz tu.—Ps. 145:18.

5. Gi wahn egzampl weh shoa dat Jehoava neva aalwayz ansa ih faytful servant pryaaz eena di paas di way dehn mi ekspek. (Koment pahn di picha.)

⁵ Jehoava mait noh ansa wi pryaaz di way wi wuda waahn. Dat da weh mi hapm tu Paal. Hihn mi aks Gaad fi geh rid a ‘wahn prikl eena ih badiʼ chree taimz. Yu tink Jehoava mi ansa fi hihn pryaaz? Yes, bot noh di way Paal mi ekspek. Jehoava neva tek weh ih prablem. Insted, ih giv ahn di schrent weh ih mi need fi bee faytful eena ih servis tu Hihn.—2 Kor. 12:7-10.

6. Sohntaim, wai ih mait luk laik if Jehoava noh di ansa wi pryaaz?

⁶ Sohntaim Jehoava noh ansa wi pryaaz di way wi ekspek. Bot wi ku bee shoar dat Jehoava noa weh wi need. Hihn ku du “way moa dan weh wi ku aks fa er weh wi kuda eva imajin.” (Ifee. 3:20) Dat da wai sohntaim Jehoava ansa wi pryaaz eena wayz er da wahn taim weh wi noh ekspek.

7. Wai wi mait need fi chaynj weh wi pray fa? Yooz di egzampl eena di paragraaf.

⁷ Sohntaim, az wi geh fi andastan Jehoava wil beta, wi mait riyalaiz dat wi need fi chaynj weh wi di pray fa. Mek wi luk pahn Brada Martin Poetzinger egzampl. Lee wail afta ih geh marid, dehn mi ares ahn an put ahn eena wahn Nazi kansenchrayshan kyamp. Wen hihn doz pray, hihn wuda aks Jehoava fi mek dehn let ahn goh soh dat ih ku tek kayr a ih waif ahn goh preech. Bot afta too weeks hihn mi riyalaiz dat Jehoava neva mi wahn mek dehn let ahn goh fahn di kyamp. Soh hihn staat pray: “Jehoava, pleez shoa mi weh yu waahn mek Ah du.” Den ih staat tu tink bowt weh di ada bradaz eena di kansenchrayshan kyamp mi-di goh chroo. Moas a dehn mi-di wori bowt dehn waif ahn pikni. Afta dat Brada Poetzinger chaynj ih pryaa ahn seh: “Tank yu, Jehoava, fi mi nyoo asainment. Help mi fi schrentn an inkorij mi bradaz.” Soh fi di neks nain yaaz dat da weh hihn mi du!

8. Weh wi haftu memba wen wi di pray?

⁸ Wi haftu memba dat Jehoava ga wahn perpos, ahn dat hihn wahn mek ih hapm pahn di taim weh hihn don set. Paat a da perpos da fi geh rid a aal di prablemz weh mek wi sofa, laik nachral dizaasta, siknis, ahn det. Jehoava wahn yooz ih Kingdom fi mek ih perpos kohn chroo. (Dan. 2:44; Rev. 21:3, 4) Bot eena di meentaim, Jehoava di alow Saytan fi rool di werl.b (Jan 12:31; Rev. 12:9) If Jehoava wuda geh rid a aal di prablemz eena di werl rait now, den ih mait luk laik Saytan di du wahn gud jab az roola. Bot dat noh meen dat wi noh ga no help. Jehoava di help wi wail wi di wayt fi mek ih pramis dehn kohn chroo. Mek wi si how hihn di du dat.

HOW JEHOAVA ANSA WI PRYAAZ TUDEH

9. How Jehoava help wi wen wi need fi mek disizhanz? Yooz di egzampl eena di paragraaf.

⁹ Jehoava gi wi wizdom. Hihn pramis fi gi wi di wizdom weh wi need soh dat wi ku mek gud disizhanz. Wi need Jehoava fi help wi bee waiz, espeshali wen wi di mek wahn disizhan weh ku chaynj wi hoal laif. Fi egzampl, maybi wi haftu disaid if wi wahn stay singl er geh marid. (Jay. 1:5) Mek wi luk pahn di egzampl a wahn singl sista weh naym Maria.c Shee mi hapi di serv az wahn regyula painyaa wen shee mi meet wahn brada. Shee seh: “Di moa wi mi geh fi bee frenz, di moa wi mi laik eech ada. Ai mi noa dat Ah mi haftu mek wahn disizhan, soh Ah mi pray wahn lat bowt di sichuwayshan. Ah mi need Jehoava fi gaid mi, bot Ai mi noa, tu, dat Jehoava neva mi wahn mek di disizhan fi mi.” Maria mi feel laik Jehoava mi giv ahn di wizdom weh shee mi pray fa. How? Shee mi du sohn risaach eena di poblikayshanz weh mi help ahn fain ansaz tu ih kweschanz. Shee mi aalso lisn tu di waiz advais weh ih ma giv ahn. Ih ma advais mi help ahn fi reeli tink bowt how ih mi feel. Eena di en, shee mi mek wahn waiz disizhan.

10. Akaadn tu Filipiyanz 4:13, weh Jehoava du fi help ih faytful servants? Yooz di egzampl eena di paragraaf. (Koment pahn di picha.)

¹⁰ Jehoava gi wi di powa fi bayr op. Jehoava wahn help wi fi bayr op eena eni sichuwayshan, jos laik how ih mi help di apasl Paal. (Reed Filipiyanz 4:13.) Luk pahn how Jehoava mi help wahn brada weh naym Benjamin fi bayr op. Wen hihn mi yong, hihn an ih famili mi liv eena wahn refyujee kyamp. Benjamin seh: “Ah mi pray tu Jehoava aal di taim mek ih gi mi di powa fi du weh rait. Jehoava mi ansa aala mi pryaaz. Hihn mi gi mi pees a main, di korij fi kantinyu preech, ahn di poblikayshanz fi help mi stay spirichwali schrang. Wen Ah mi reed sohn ekspeeryens bowt how Jehoava help sohn ada Witnisiz fi bayr op, dat mi schrentn mi ahn help mi mek op mi main fi kantinyu stay faytful tu Jehoava.”

11-12. How Jehoava yooz wi bradaz ahn sistaz fi ansa wi pryaaz? (Koment pahn di picha.)

¹¹ Jehoava yooz wi spirichwal famili. Pahn di nait bifoa ih mi sakrifais ih laif, Jeezas mi pray haad ahn bayg Jehoava fi help ahn. Jeezas mi-di wori dat adaz mi wahn tink dat hihn di disrispek Gaad. Fi hihn dat mi wahn bee shaymin, bikaaz hihn wuda neva du dat. Jehoava mi help ih Son wen ih sen wahn aynjel fi schrentn ahn. (Look 22:42, 43) Saym way soh, Jehoava mait yooz wan a wi bradaz ahn sistaz fi gi wi wahn inkorijin kaal er vizit. Aala wi ku chrai fain wahn apachooniti fi gi “wahn gud werd” tu wi bradaz ahn sistaz.—Prov. 12:25.

¹² Mek wi kansida di egzampl a wahn sista weh naym Miriam. Wahn fyoo weeks afta ih hozban mi ded, shee mi deh hoam bai ihself. Shee mi feel dipres ahn neva noa weh fi du. Shee kudn stap krai. Shee seh: “Ah neva ga di schrent fi kaal enibadi, soh Ah mi pray tu Jehoava. Wail Ah stil mi-di krai ahn pray, di foan mi ring; da mi wahn elda hoo da wahn gud fren.” Miriam mi geh komfert fahn da elda an ih waif, an afta dat shee mi noa fi shoar dat da Jehoava mi moov dehn fi kaal ahn.

13. Gi wahn egzampl weh shoa how Jehoava yooz peepl weh noh wership ahn fi help ih servants.

¹³ Jehoava mait yooz peepl weh noh wership ahn. (Prov. 21:1) Sohntaim, Jehoava mait moov peepl weh noh wership ahn fi help ih servants. Fi egzampl, hihn mi mek King Artaxerxes gi Nehimaiya permishan fi goh bak da Jeroosalem soh dat ih kuda mi help bil bak di siti. (Neh. 2:3-6) Saym way soh, tudeh Jehoava ku yooz peepl weh noh wership ahn fi help wi wen wi need it.

14. Weh yoo laik bowt Soo Hing ekspeeryens? (Koment pahn di picha.)

¹⁴ Wahn sista weh naym Soo Hing mi feel laik Jehoava mi yooz fi shee dakta fi help ahn. Fi shee son sofa fahn difrent mental helt prablemz. Wen hihn mi get eena wahn bad aksident, shee an ih hozban disaid fi lef dehn jab fi tek kayr a dehn son. Bikaaz a dat, dehn mi staat ga moni prablemz. Soo Hing mi seh dat shee mi feel laik wahn raba ban weh geh schrech owt til ih soon bos. Shee mi poar owt ih haat tu Jehoava an aks ahn fi help. Di dakta weh dehn mi-di si mi chrai fain wahn way fi help dehn. Bikaaz a dat, dehn mi en op di geh help fahn di govament ahn wahn cheep hows fi rent. Soo Hing seh: “Wi mi si how Jehoava help wi. Hihn da reeli ‘di Wan weh hyaa wi pryaaz.ʼ”—Ps. 65:2.

IH TEK FAYT FI SI AHN FI AKSEP HOW JEHOAVA ANSA WI PRYAAZ

15. Weh wahn sista mi du fi si dat Jehoava mi-di ansa ih pryaaz?

¹⁵ Jehoava noh aalwayz ansa wi pryaaz eena wahn amayzin way. Bot di ansa weh wi get da egzakli weh wi need fi help wi stay faytful tu Jehoava. Soh aalwayz luk owt fi si how Jehoava ansa yu pryaaz. Wahn sista weh naym Yoko mi feel laik Jehoava neva mi-di ansa ih pryaaz. Soh ih staat rait dong weh shee mi-di pray fa. Afta sohn taim mi paas, shee gaan oava di tingz weh ih mi rait dong an ih mi noatis dat Jehoava mi ansa aala ih pryaaz, eevn di wan dehn weh shee mi ferget bowt. Evri now an agen, wi need fi stap ahn tink bowt how Jehoava di ansa fi wee pryaaz.—Ps. 66:19, 20.

16. How wi ku shoa fayt wen wi pray? (Heebrooz 11:6)

¹⁶ Wi shoa dat wi ga fayt noh onli wen wi pray tu Jehoava bot wen wi aksep ih ansa noh mata how ih wuda ansa wi. (Reed Heebrooz 11:6.) Tink bowt di egzampl a Mike an ih waif, Chrissy. Dehn mi aalwayz waahn goh serv da Betel. Mike seh: “Fi yaaz wi mi-di aplai fi goh da Betel ahn wi mi kip di pray bowt it, bot wi neva geh invaitid.” Mike ahn Chrissy mi kip wahn pazitiv atichood bikaaz dehn mi kanfident dat Jehoava noa di bes way fi mek dehn serv ahn. Dehn mi kantinyu du dehn bes fi Jehoava. Dehn mi serv wehpaat dehn mi need moa help az regyula painyaaz, ahn dehn mi sopoat sohn kanschrokshan proajek. Tudeh dehn di serv eena di serkit werk. Mike seh: “Jehoava noh aalwayz ansa wi pryaaz how wi wuda waahn, bot ih doo ansa dehn eena wayz weh eevn beta dan weh wi ekspek.”

17-18. Bays pahn Psalm 86:6, 7, weh wi ku bee shoar bowt wen wi pray?

¹⁷ Reed Psalm 86:6, 7.d Dayvid mi shoar dat Jehoava mi hyaa an ansa ih pryaaz. Yoo tu ku bee shoar dat Jehoava wahn hyaa an ansa yu pryaaz. Di egzampl dehn weh wi mi kansida eena dis aatikl shoa wi dat Jehoava wahn gi wi di wizdom ahn di powa weh wi need fi bayr op. Tudeh, Jehoava mait yooz wi bradaz ahn sistaz an ih mait eevn yooz peepl weh noh wership ahn fi help wi.

¹⁸ Eevn doa Jehoava mait noh ansa wi pryaaz di way how wi ekspek, wi noa fi shoar dat hihn wahn ansa dehn. Hihn wahn gi wi egzakli weh wi need rait wen wi need it. Soh ga fayt ahn kantinyu pray. Yu ku bee shoar dat Jehoava wahn tek kayr a yu now an eena di fyoocha wen ih ‘gi yu evriting weh yu waahn.ʼ—Ps. 145:16.