Kapi di Egzampl a di Faytful Aynjelz

1-2. (a) How wee difrent fahn di aynjelz? (b) Weh tingz wee gat in kaman wid di aynjelz?

AZ SERVANTS a Jehoava, wi da paat a wahn lovin famili weh wership ahn. Dis inklood wi bradaz ahn sistaz fahn aal oava di werl ahn di milyanz a aynjelz weh deh da hevn. (Dan. 7:​9, 10) Wen wi tink bowt di aynjelz, wi aalwayz tink bowt how dehn difrent fahn wee. Fi egzampl, di aynjelz egzis langa dan eni wan a wi. (Joab 38:​4, 7) Dehn moa powaful dan wee. Dehn perfek ahn wee noh perfek, soh dehn moa hoali ahn raichos dan wee.—Look 9:26.

² Eevn doa wi difrent fahn di aynjelz, wi ga wahn lata tingz in kaman wid dehn. Fi egzampl, laik di aynjelz, wi ku kapi Jehoava kwalitiz. Ahn wi ga di freedom fi mek wi oan disizhanz. Laik dehn, wi ga wi oan naym ahn wi ga difrent persnaliti ahn difrent rispansabiliti. Wi aalso ga di dizaiya fi wership Jehoava tu.—1 Peet. 1:12.

3. Weh wi ku laan fahn di faytful aynjelz?

³ Sins wi ga lata tingz in kaman wid di aynjelz, fi dehn gud egzampl ku inkorij wi ahn teech wi sohn impoatant lesn. Eena dis aatikl, wi wahn taak bowt how wi ku kapi di aynjelz hombl atichood, dehn lov fi peepl, di way dehn noh giv op, ahn weh dehn du fi kip di kangrigayshan kleen.

DI AYNJELZ REELI HOMBL

4. (a) How di aynjelz shoa dat dehn hombl? (b) Wai di aynjelz hombl? (Saam 89:7)

⁴ Di faytful aynjelz reeli hombl. Dehn ga lata ekspeeryens, dehn reeli powaful, ahn dehn waiz. Bot stilyet, dehn hombl an obay Jehoava. (Saa. 103:20) Wen dehn du dehn asainment, dehn noh boas bowt di tingz weh dehn du er bowt di powa weh dehn gat. Dehn hapi fi du weh Jehoava tel dehn fi du eevn if nobadi noa weh dehn di du. Wi nat eevn noa moas a dehn bai naym.a (Jen. 32:​24, 29; 2 Ki. 19:35) Dehn noh aksep aana weh bilangz tu Jehoava. Dehn hombl bikaaz dehn lov ahn rispek Jehoava.—Reed Saam 89:7.

5. How wahn aynjel mi shoa dat ih hombl wen ih karek di apasl Jan? (Koment pahn di picha.)

⁵ Mek wi luk pahn wahn egzampl weh shoa dat aynjelz hombl. Eena 96 C.E., wahn aynjel mi gi Jan wahn vizhan, ahn wi noh noa da aynjel naym. (Rev. 1:1) Afta Jan mi si aala di amayzin tingz eena di vizhan, ih bow dong tu di aynjel fi prayz ahn. Bot di aynjel stap ahn, an ih tel ahn: “Bee kyaaful! Noh du dat! Ai da wahn slayv jos laik yoo ahn yu bradaz . . . Yu fi wership Gaad!” (Rev. 19:10) Da aynjel mi shoa wahn hombl atichood! Hihn neva waahn no prayz fi weh ih du. Hihn mi kwik fi tel Jan fi wership Jehoava. Wen di aynjel mi-di kongsl Jan, hihn neva chreet Jan laik if ih noh impoatant. Eevn doa hihn mi-di serv Jehoava langa dan Jan ahn hihn mi moa powaful dan Jan, hihn mi hombl an ih mi tel ahn, “Ai da wahn slayv jos laik yoo.” Eevn doa di aynjel mi haftu karek Jan, ih neva skoal ahn er chreet ahn bad. Insteda dat, ih taak tu ahn eena wahn kain way. Hihn mi andastan wai Jan mi bow dong tu ahn—da mi bikaaz di vizhan mi soh amayzin tu ahn.

6. How wee ku kapi di aynjelz hombl atichood?

⁶ How wi ku kapi di aynjelz hombl atichood? Wi waahn bee laik di aynjel dehn ahn du wi asainment widowt di boas er di luk fi geh prayz fahn adaz. (1 Kor. 4:7) Wi aalso noh waahn tink dat wi beta dan adaz jos bikaaz wi di serv Jehoava langa dan dehn er bikaaz wi ga wahn privilij weh dehn noh gat. Di moa rispansabiliti wi gat, di moa hombl wi need fi bee. (Look 9:48) Laik di aynjelz, wi waahn du tingz fi serv adaz ahn wi noh waahn mek peepl tink dat wee moa impoatant dan dehn.

7. How wi ku shoa dat wi hombl wen wi kongsl sohnbadi?

⁷ Wi ku shoa dat wi hombl eevn wen wi haftu karek er kongsl sohnbadi, weda da wahn brada, wahn sista, er wi oan pikni. Wen wi di kongsl sohnbadi, wi mait haftu bee dairek. Bot jos laik how di aynjel mi karek Jan eena wahn kain way, wi ku bee dairek, kain, ahn lovin wid weh wi seh. Wen wi noh tink dat wi beta dan adaz, dat ku help wi gi kongsl fahn di Baibl eena wahn rispekful ahn lovin way.—Kol. 4:6.

DI AYNJELZ LOV PEEPL

8. (a) Akaadn tu Look 15:​10, how di aynjelz shoa dat dehn lov peepl? (b) How di aynjelz help wi wen wi di preech? (Koment pahn di picha.)

⁸ Di aynjel dehn lov peepl. Dehn hapi wen sohnbadi laan bowt Jehoava ahn staat serv ahn. Wen sohnbadi komit wahn seeryos sin er dehn stap serv Jehoava, di aynjelz rijais wen dehn ripent ahn kohn bak tu Jehoava. (Reed Look 15:10.) Di aynjel dehn aalso sopoat wi eena di preechin werk. (Rev. 14:6) Eevn doa dehn noh di preech, dehn help wi fi fain peepl weh waahn noa Jehoava. Wi kuda neva seh fi shoar dat da wahn aynjel dairek wi fi taak tu wahn spesifik persn, bikaaz Jehoava ku yooz ada wayz fi help peepl weh waahn noa bowt hihn. Hihn ku yooz ih hoali spirit fi gaid wi tu peepl laik dat. (Aks 16:​6, 7) Stilyet, ih doo yooz ih aynjelz fi help wi preech. Soh wen wi shayr di gud nyooz, wi ku bee kanfident dat di aynjelz wahn deh rait deh fi help wi wen wi need it.—Reed di baks weh naym “Jehoava Ansa Dehn Pryaaz.”b

9. How wi ku kapi di aynjelz ahn shoa lov fi peepl?

⁹ How wi ku kapi di aynjelz ahn shoa lov fi peepl? Wen wi hyaa wahn anonksment dat wan a wi bradaz er sistaz kohn bak tu Jehoava, wi feel hapi, laik di aynjelz. Wi du aal weh wi kud fi mek dehn feel welkom ahn mek dehn noa dat wi lov dehn ahn dat wi hapi dat dehn di serv Jehoava agen. (Look 15:​4-7; 2 Kor. 2:​6-8) Wi ku aalso kapi di aynjelz egzampl wen wi du aal wi kud fi preech. (Ikl. 11:6) Laik di aynjelz weh help wi wen wi di preech, wee ku help wi bradaz ahn sistaz wen dehn di preech tu. Fi egzampl, wi ku mek planz fi goh owt eena servis wid sohnbadi weh jos di staat tu preech, ahn wi ku help owt wi oalda bradaz ahn sistaz ahn dehn wan weh ga helt prablemz.

10. Weh wi ku laan fahn Sara egzampl?

¹⁰ Wat if wi kyaahn du evriting weh wi wuda waahn du? Wi ku bee shoar dat di aynjelz wahn help wi fi preech. Mek wi luk pahn di egzampl a wahn sista fahn India weh naym Sara.c Afta shee mi-di painyaa fi 20 yaaz, ih mi geh sik an ih kudn waak er eevn get owta bed. Shee mi reeli dipres. Bot bikaaz ih neva stap reed ih Baibl, an bikaaz di bradaz ahn sistaz eena ih kangrigayshan mi sopoat ahn, ih mi aybl fi bee pazitiv agen. Sins ih mi kyaahn eevn sidong op fi rait letaz, ih mi haftu fain wahn difrent way fi preech. Soh ih mi staat tu preech tu peepl pahn di foan. Ih wuda kaal ih ritern vizit dehn, ahn dehn wuda tel ahn bowt adaz weh waahn stodi di Baibl. Bikaaz a dat, kopl monts afta, shee mi ga 70 Baibl stodiz. Shee kudn stodi wid aala dehn, soh ih han oava som a dehn tu di frenz eena di kangrigayshan. Ahn now wahn lata dehndeh Baibl styoodents di goh da meetin. Di aynjelz mosi reeli hapi fi werk lang wid bradaz ahn sistaz laik Sara, weh du aal weh dehn kud fi preech.

DI AYNJELZ NOH GIV OP

11. Weh egzampl di aynjelz set fi wi?

¹¹ Di aynjelz dehn set wahn gud egzampl fi wi. Dehn noh giv op noh mata wat. Fi towznz a yaaz, dehn si aala di injostis ahn wikidnis weh hapm. Dehn mi aalso si how sohn aynjelz mi ton gens Jehoava. (Jen. 3:1; 6:​1, 2; Jood 6) Di Baibl tel wi bowt wahn faytful aynjel weh mi haftu fait gens wahn powaful deemon fi dayz. (Dan. 10:13) Fahn di taim hyoomanz egzis, di aynjelz onli si wahn lee bit a peepl serv Jehoava. Eevn soh, di aynjelz hapi fi kantinyu serv Jehoava. Dehn noa dat wen di rait taim kohn, Jehoava wahn stap aal injostis.

12. Weh ku help wi fi noh giv op?

¹² How wi ku kapi di aynjelz ahn noh giv op? Jos laik di aynjelz, wi mait si injostis er goh chroo persikyooshan. Bot wi ku kapi dehn egzampl ahn ga fayt dat Jehoava wahn geh rid a wikidnis. Soh “noh mek wi giv op di du weh rait.” (Gal. 6:9) Gaad pramis dat hihn wahn help wi bayr op. (1 Kor. 10:13) Wen wi pray fi Jehoava hoali spirit, dat wahn help wi ga payshens ahn jai. (Gal. 5:22; Kol. 1:11) If yu di goh chroo persikyooshan, noh bee frayd, bikaaz Jehoava wahn aalwayz help yu ahn schrentn yu.—Heeb. 13:6.

DI AYNJELZ HELP KIP DI KANGRIGAYSHAN KLEEN

13. Weh werk Jehoava gi di aynjelz fi du joorin di laas dayz? (Machyu 13:​47-49)

¹³ Jehoava gi di aynjelz wahn speshal werk fi du joorin di laas dayz. (Reed Machyu 13:​47-49.) Bikaaz a di preechin werk, milyanz a peepl aal rong di werl wahn geh fi hyaa di gud nyooz. Ahn som a dehnya peepl chaynj dehn laif soh dat dehn ku liv akaadn tu Jehoava standadz ahn serv hihn di way ih waahn. Bot noh evribadi du dat. Jehoava put di aynjelz fi “separayt di wikid fahn monks di raichos wan dehn.” Dat meenz dat di aynjelz dehdeh fi help kip di kangrigayshan kleen. Bot dat noh meenz dat enibadi weh stap serv Jehoava kyaahn kohn bak, an ih aalso noh meenz dat wi wahn neva ga prablemz eena di kangrigayshan. Bot wi ku bee shoar dat di aynjelz di werk haad fi help kip di kangrigayshan dehn kleen.

14-15. How wi ku kapi di aynjelz ahn kip di kangrigayshan kleen? (Koment pahn di picha dehn.)

¹⁴ How wi ku kapi di aynjelz ahn kip di kangrigayshan kleen? Wi ku du dat wen wi werk haad fi kip wi frenship wid Jehoava schrang. Fi mek wi du dat, wi need fi stay weh fahn eniting weh ku damij wi rilayshanship wid hihn ahn wi need fi chooz frenz weh lov hihn. If wi du dehndeh tingz, ih wahn kip di kangrigayshan kleen. (Saa. 101:3) Wi ku aalso help wi bradaz ahn sistaz fi stay faytful tu Jehoava. Weh wi ku du if wi fain owt dat wan a wi brada er sista komit wahn seeryos sin? Bikaaz wi lov dehn, wi wuda tel dehn fi goh taak tu di eldaz. If dehn noh du it, den wi wuda need fi goh tel di eldaz weh hapm. Wi waahn du evriting weh wi kud fi help wi brada er sista fiks ih rilayshanship wid Jehoava az soon az pasabl!—Jay. 5:​14, 15.

¹⁵ Sohntaim, doh, wahn brada er sista mait komit wahn seeryos sin, ahn di eldaz mait haftu tek dehn owt fahn di kangrigayshan. Wen dat hapm, wi need fi “stap spen taim” wid dehn.d (1 Kor. 5:​9-13) Dis araynjment help di kangrigayshan fi stay kleen. Wen wi noh spen taim wid dehn wan weh dehn tek owt fahn di kangrigayshan, wi akchwali shoa dat wi lov dehn, ahn dat mait help dehn fi riyalaiz dat dehn need fi kohn bak tu Jehoava. If dehn kohn bak, wi wahn rijais lang wid Jehoava an ih aynjelz.—Look 15:7.

16. Eena weh wayz wi ku kapi di aynjelz?

¹⁶ Jehoava gi wi di privilij fi laan bowt di aynjelz ahn fi werk lang wid dehn. Mek wi kapi dehn egzampl ahn bee hombl, lov peepl, noh giv op, ahn werk haad fi kip di kangrigayshan kleen. If wi du dat, wi ku bee paat a Jehoava famili weh wership ahn fareva.