Bee Hombl an Aksep Dat Yu Noh Noa Evriting

1. How Jehoava mek wi, ahn wai?

JEHOAVA mek wi eena wahn wandaful way. Wi ku tink, laan nyoo tingz, an andastan how fi yooz di tingz weh wi laan eena wahn waiz way. Wai hihn mek wi laik dat? Bikaaz hihn waahn wi laan bowt ahn soh dat wi ku serv ahn eena di rait way. Fi help wi du dat, ih teech wi di chroot soh dat wi ku mek waiz disizhanz.—Prav. 2:​1-5; Roam. 12:1.

2. (a) Weh wi need fi andastan bowt wiself? (Joab 37:​23, 24) (Koment pahn di picha.) (b) Wai ih impoatant fi andastan dat wi noh need fi noa evriting?

² Di way Jehoava mek wi, wi ku laan lata nyoo tingz; bot wi kuda neva noa evriting. (Reed Joab 37:​23, 24.) Tink bowt Joab, fi egzampl. Jehoava mi aks ahn wahn hoal pail a kweschan weh mi help ahn fi andastan humoch ih noh noa. Dat mi help Joab fi si dat ih need fi bee hombl ahn fi chaynj di way ih tink. (Joab 42:​3-6) Wee wahn benifit tu if wi hombl an aksep dat wi noh noa evriting. Den wi wahn chros dat Jehoava wahn tel wi weh wi reeli need fi noa soh dat wi ku mek waiz disizhanz.—Prav. 2:6.

3. Weh wi wahn taak bowt eena dis aatikl?

³ Eena dis aatikl, wi wahn taak bowt sohn tingz weh wi noh noa ahn how dat ku mek laif haad fi wi sohntaim. Wi wahn aalso laan wai ih gud dat wi noh noa evriting. Ahn dat wahn help wi fi chros dat “Gaad noa evriting” ahn dat hihn wahn tel wi weh wi reeli need fi noa.—Joab 37:16.

WI NOH NOA WEN DI EN WAHN KOHN

4. Akaadn tu Machyu 24:​36, weh wi noh noa?

⁴ Reed Machyu 24:36. Wi noh noa wen di en wahn kohn. Eevn Jeezas neva noa “di day ner di owa” wen hihn mi deh pahn ert.a Laytaraan, hihn mi tel ih apasl dehn dat onli Jehoava “ga di atariti fi set taimz ahn dayz wen tingz wahn hapm.” (Aks 1:​6, 7) Jehoava don set di taim fi wen ih wahn dischrai dis sistem a tingz, bot wee noh fi noa egzakli wen dat wahn hapm.

5. How wi mait feel bikaaz wi noh noa wen di en wahn kohn?

⁵ Wi noh noa how lang wi haftu wayt fi mek dis sistem kohn tu wahn en. Sayka dat, wi mait geh diskorij. Wi mait feel laik di en di tek tu lang fi kohn, espeshali if wi don di wayt lang taim aredi. Er wi mait geh diskorij bikaaz famili er ada peepl mak wi. (2 Peet. 3:​3, 4) Sohntaim, wi ku feel laik if wi mi onli noa di egzak day wen di en wahn kohn, ih wuda bee eeziya fi wayt ahn fi put op wid peepl weh mak wi.

6. Wai ih gud dat wi noh noa wen di en wahn kohn?

⁶ Da wahn gud ting dat Jehoava noh tel wi di day wen di en wahn kohn, bikaaz dat gi wi di chaans fi shoa dat wi serv ahn bikaaz wi lov an chros ahn. Wi waahn serv Jehoava fareva, noh jos til di en kohn. Soh wi noh waahn tink tu moch bowt wen “di day a Jehoava” wahn kohn. Rada, wi waahn tink bowt weh wahn hapm afta da day kohn. Wen wi du dat, wi wahn kantinyu fi jraa kloasa tu Jehoava, chros ahn moa, ahn du aal weh wi kud fi pleez ahn.—2 Peet. 3:​11, 12.

7. Weh wi doo noa?

⁷ Ih impoatant fi tink bowt weh wi doo noa. Wi noa dat di laas dayz mi staat eena 1914. Jehoava gi wi Baibl prafesi weh proov dat, ahn dehn aalso tel wi how tingz wahn stan joorin di taim a di en. Sayka dat, wi noa dat “di grayt day a Jehoava deh kloas.” (Zeph. 1:14) Ahn wi noa weh Jehoava waahn wi du joorin dis taim. Ih waahn wi tel az moch peepl az wi kud bowt di “gud nyooz bowt di Kingdom.” (Mach. 24:14) Wi di preech dis gud nyooz eena bowt 240 konchri an eena oava 1,000 langwij. Wi noh need fi noa “di day ner di owa” fi mek wi ku preech di gud nyooz.

WI NOH NOA HOW JEHOAVA WAHN HELP WI

8. Wi ku eva andastan evriting “weh di chroo Gaad du”? Pleez eksplayn yu ansa. (Ikleeziyasteez 11:5)

⁸ Wi noh aalwayz andastan evriting “weh di chroo Gaad du.” (Reed Ikleeziyasteez 11:5.) Wi kuda neva noa fi shoar wai Jehoava mait alow sertn tingz fi hapm er weh egzakli ih wahn du fi help wi. (Saa. 37:5) Di Baibl seh dat wi noh andastan evriting weh Gaad du, jos laik how wi noh noa how wahn baybi groa eena ih ma woom. Eevn tudeh, saiyentis stil noh andastan evriting bowt how wahn baybi groa eena ih ma. Saym way soh, wi wahn neva andastan evriting bowt how Jehoava du tingz.

9. Bikaaz wi noh noa egzakli weh Jehoava wahn du fi wi, weh wi mait staat tink?

⁹ Wen wi noh noa weh Jehoava wahn du, wi mait hoal bak fahn mek sertn disizhanz, laik fi mek sakrifais soh dat wi ku du moa eena di minischri er fi goh serv sohnweh weh dehn need moa poblishaz. Wi mait tink dat Jehoava noh hapi wid wi if wi di chrai du moa fi hihn bot wi noh reech wi goalz. Fi egzampl, wi mait werk haad eena di minischri bot wi noh geh no Baibl stodiz, er wi mait werk haad pahn wahn speshal proajek fi di aaganaizayshan bot lata prablemz kom op. Tingz laik dat ku mek wi feel laik Jehoava noh hapi wid weh wi di du far ahn.

10. Wen wi noh noa egzakli weh Jehoava wahn du fi wi, how dat ku help wi fi bee hombl?

¹⁰ Ih gud dat wi noh noa evriting weh Jehoava wahn du fi wi. Dat wahn help wi fi bee hombl. Ih help wi fi andastan dat Jehoava aalwayz noa bes. (Aiz. 55:​8, 9) Wi laan fi chros dat Jehoava wahn tek kayr a evriting eena di bes way pasabl. Wen wi geh gud rizolts eena di minischri er pahn wahn speshal proajek, wi aalwayz waahn gi Jehoava di prayz. (Saa. 127:1; 1 Kor. 3:7) If tingz noh goh di way wi ekspek, wi need fi memba dat Jehoava ga evriting anda kanchroal. (Aiz. 26:12) Wi du weh wee ku du, ahn wi chros dat Jehoava wahn aalwayz help wi. Wi noa dat hihn wahn gaid wi, eevn if ih noh du miraklz fi wi laik weh ih mi du fi ih peepl eena di paas.—Aks 16:​6-10.

11. Weh impoatant tingz wi noa?

¹¹ Wi noa fi shoar dat Jehoava aalwayz lovin, fyaa, ahn waiz. Wi noa dat Jehoava lov wi fi weh wi du fi hihn ahn fi wi bradaz ahn sistaz. Ahn wi noa dat Jehoava aalwayz bles peepl weh laayal tu ahn.—Heeb. 11:6.

WI NOH NOA WEH WAHN HAPM TUMAARO

12. Akaadn tu Jaymz 4:​13, 14, weh wi noh noa?

¹² Reed Jaymz 4:​13, 14. Wi noh noa weh mait hapm tu wi tumaaro. Wahn lata tingz ku hapm weh wi noh ekspek er weh deh owta wi kanchroal. (Ikl. 9:11) Sayka dat, wi noh noa if di planz weh wi mek wahn werk owt er if wi wahn eevn alaiv fi du dehn.

13. Wen wi noh noa weh mait hapm eena di fyoocha, how dat ku mek wi feel?

¹³ Ih ku bee haad fi bayr op wen wi noh noa egzakli weh mait hapm eena di fyoocha. If wi wori tu moch bowt weh mait hapm, wi ku en op di looz wi jai. Wi laif mait chaynj eena wahn way weh wi noh ekspek, ahn dat ku mek wi feel sad er foschraytid. Er wen tingz noh goh di way wi waahn, dat ku mek wi feel diskorij er disapointid.—Prav. 13:12.

14. Weh wi need fi bee hapi? (Koment pahn di picha dehn.)

¹⁴ Wen wi stay faytful tu Jehoava eevn wen wi goh chroo haad taimz, wi shoa Jehoava dat wi serv ahn bikaaz wi lov ahn, noh fi di tingz weh wi ku get fan ahn. Lata Baibl pasij teech wi dat wi noh fi ekspek Jehoava fi protek wi fahn evri prablem weh mait kom op ahn dat Jehoava noh plan owt evriting weh wahn hapm eena wi laif. Hihn noa dat wi ku bee hapi eevn if wi noh noa evriting weh wahn hapm eena di fyoocha. Soh wi wahn bee hapi if wi kantinyu obay ahn an pen pan ahn fi gaidans. (Jer. 10:23) Enitaim wi luk tu Jehoava wen wi di mek disizhanz, da laik wi di seh: “If Jehoava waahn, wi wahn liv ahn du dis er dat.”—Jay. 4:15.

15. Weh wi noa bowt di fyoocha?

¹⁵ Wail wi mait noh aalwayz noa weh wahn hapm eech day, wi doo noa dat Jehoava pramis fi gi wi evalastin laif—eeda da hevn er pahn ert. Wi noa dat Jehoava kyaahn tel lai ahn dat notn ku stap hihn fahn du weh ih pramis fi du. (Tai. 1:2) Onli hihn ku “prafesai di tingz weh noh hapm yet, ahn . . . di tingz weh nobadi du yet.” Evriting weh hihn seh mi wahn hapm joorin Baibl taimz mi did hapm, soh evriting weh ih seh wahn hapm eena di fyoocha wahn hapm tu. (Aiz. 46:10) Wi noa fi shoar dat notn ku stap Jehoava fahn lov wi. (Roam. 8:​35-39) Hihn wahn gi wi di wizdom, komfert, ahn schrent weh wi need fi bayr op noh mata wat. Wi ku bee shoar dat Jehoava wahn help wi ahn bles wi.—Jer. 17:​7, 8.

WI KYAAHN ANDASTAN HOW GUD JEHOAVA NOA WI

16. Akaadn tu Saam 139:​1-6, weh Jehoava noa bowt wi? Ahn how dat mek yoo feel?

¹⁶ Reed Saam 139:​1-6. Wi Kriyayta noa evriting bowt wi. Hihn noa weh wi tink ahn wai wi tink da way. Hihn noa how wi feel ahn wai wi feel soh. Hihn noa evriting weh wi seh ahn weh deh eena wi haat. Hihn noa evriting weh wi du ahn wai wi du it. Laik weh King Dayvid seh, Jehoava aalwayz dehdeh fi wi, an ih redi ahn wilin fi help wi. How yoo feel fi noa dat Jehoava, di Moas Hai Laad ahn Kriyayta, pay atenshan tu yoo? Wi feel laik Dayvid, wen ih seh: “Yu noa mi soh gud, an Ah kyaahn eevn bigin fi andastan how dat pasabl.”—Saa. 139:6.

17. Wai ih mait bee haad fi aksep dat Jehoava noa wi soh gud?

¹⁷ Sohntaim ih mait bee haad fi aksep dat Jehoava ku lov wi ahn bee wi Pa, maybi bikaaz a di way wi groa op, wi kolcha, er weh wi yoostu bileev bifoa wi laan di chroot. Er maybi wi feel laik tingz weh wi du eena di paas mi soh bad dat Jehoava wuda neva eevn waahn noa wi. Wi mait feel laik hihn waahn stay faar fahn wi. Eevn Dayvid mi feel laik dat sohntaim. (Saa. 38:​18, 21) Er sopoaz sohnbadi reeli di chrai haad fi chaynj dehn laif fi pleez Jehoava. Dehn mait wanda, ‘If Gaad reeli andastan mi, wai ih wuda waahn mek Ah stap liv di way weh feel rait fi mee?ʼ

18. How wi benifit wen wi aksep dat Jehoava noa wi beta dan wi noa wiself? (Koment pahn di picha dehn.)

¹⁸ Wi ku laan fi aksep dat Jehoava noa wi beta dan wi noa wiself ahn dat hihn si gud eena wi eevn if wee kyaahn seeʼt. Eevn doa hihn si aala di mistayk dehn weh wi mek, hihn noa di kaina persn wi waahn bee, an ih lov wi. (Roam. 7:15) Wen wi riyalaiz dat Jehoava ku si di kaina persn weh wee ku bee, dat wahn gi wi di schrent weh wi need fi stay faytful tu ahn an bee hapi di serv ahn.

19. Weh wi noa bowt Jehoava?

¹⁹ Wi noa fi shoar dat Jehoava da lov. (1 Jan 4:8) Wi noa dat eniting weh Jehoava aks wi fi du er noh fi du da bikaaz ih lov wi an ih waahn wi liv di bes laif weh wi kud. Wi noa dat Jehoava waahn wi liv fareva. Hihn mi sen Jeezas fi pay di ransom fi wi soh dat wi ku geh evalastin laif. Ahn bikaaz Jeezas ded fi wi, wi ku bee shoar dat eevn doa wi mek mistayks, wi ku stil serv Jehoava eena wahn way weh pleez ahn. (Roam. 7:​24, 25) Wi noa dat “Gaad grayta dan wi haat ahn hihn noa evriting.” (1 Jan 3:​19, 20) Jehoava si evriting bowt wi, an ih noa dat wi ku du wi bes fi obay ahn.

20. Weh wahn help wi fi noh wori tu moch?

²⁰ Jehoava tel wi weh wi need fi noa. Wen wi hombl ahn wi aksep dat, wi wahn ku foakos pahn weh moa impoatant insteda wori bowt tingz weh wi kyaahn kanchroal. Eena da way, wi shoa dat wi chros Jehoava, “di wan weh noa evriting.” (Joab 36:4) Rait now, wi noh noa evriting, bot wi di luk faawod tu wen wi ku liv fareva ahn wen Jehoava wahn kantinyu teech wi nyoo tingz bowt hihn ahn di tingz weh ih du.—Ikl. 3:11.