Help Yu Baibl Styoodent fi Serv Jehoava

1-2. (a) Wai sohn Baibl styoodent wuda hoal bak fahn di stan op fi di chroot? (b) Weh wi wahn taak bowt eena dis aatikl?

WEN yu mi-di stodi, yu praabli neva shoar if yu mi waahn bee wan a Jehoava Witnisiz. Dat kuda bee bikaaz yu mi frayd dat yu werkmayt, yu frenz, er yu famili wuda geh beks wid yu. Er maybi yu mi feel dat ih mi wahn tu haad fi obay Jehoava eena evriting. If yoo mi feel laik dat, den yu ku andastan how sohn Baibl styoodent feel ahn wai ih ku bee haad fi mek dehn disaid if dehn waahn bee wan a Jehoava Witnisiz.

² Jeezas mi noa dat dehndeh tingz kuda bee di reezn wai sohnbadi wuda hoal bak fahn serv Jehoava. (Mach. 13:​20-22) Bot Jeezas neva giv op pahn dehn. Insted, ih mi kantinyu help dehn. Hihn mi du dat wen ih mi help ih disaiplz fi si wai ih ku bee haad fi mek dehn serv Jehoava, an ih mi help dehn fi schrentn dehn lov fi Jehoava. Hihn mi aalso help dehn fi put Jehoava fers eena dehn laif, an ih mi teech dehn weh dehn ku du wen adaz persikyoot dehn. How wi ku kapi di way Jeezas mi teech wen wi di yooz di Injai Laif Fareva! buk fi help wi Baibl styoodent stan op fi di chroot?

HELP YU BAIBL STYOODENT FI SI WEH DI HOAL AHN BAK FAHN SERV JEHOAVA

3. Weh praabli mi-di hoal bak Nikodeemos fahn di bee wan a Jeezas disaipl?

³ Nikodeemos da-mi wahn impoatant roola fi di Jooz. Jeezas mi don di preech fi siks monts wen Nikodeemos mi riyalaiz dat hihn da-mi di Mesaiya. (Jan 3:​1, 2) Bot sohnting mi-di hoal ahn bak fahn fala Jeezas. Hihn mi onli taak tu Jeezas wen ih mi daak, bikaaz ih mi frayd fi weh di Jooz wuda du tu ahn if dehn mi fain owt dat ih mi bileev eena Jeezas. (Jan 7:13; 12:42) Ih mi praabli frayd fi looz ih pozishan ahn som a ih richiz if ih mi chooz fi bee wan a Jeezas disaipl.a

4. How Jeezas mi help Nikodeemos andastan weh Gaad mi waahn ih du?

⁴ Nikodeemos mi noa di Laa weh Jehoava mi gi di Izrelaits, bot ih mi need help fi andastan weh Jehoava mi waahn ih du. How Jeezas mi help ahn? Jeezas mi wilin fi tek owt di taim ahn taak tu Nikodeemos eevn eena di nait. Jeezas mi tel Nikodeemos egzakli weh ih mi need fi du soh dat ih kuda bee wan a ih disaipl. Hihn mi tel ahn dat ih mi need fi ripent, geh baptaiz, ahn shoa fayt eena Gaad Son.—Jan 3:​5, 14-21.

5. How wi ku help wi Baibl styoodent noa weh di stap ahn fahn serv Jehoava?

⁵ Wi Baibl styoodent ku noa di Baibl reeli gud, bot ih mait stil need help fi andastan weh di hoal ahn bak fahn serv Jehoava. Fi egzampl, di jab weh ih gat mait di tek op tu moch a ih taim, er ih ku bee dat ih famili noh waahn ih bee wan a Jehoava Witnisiz. Fala Jeezas egzampl ahn mek taim fi help yu styoodent. Yu ku invait ahn fi goh get wahn kop a kaafi er fi tek wahn lee waak wid yu. Dat mait mek ih feel komfatabl inof fi tel yu weh di goh aan eena ih laif, ahn da way yu wahn ku fain owt weh chalenjiz ih di goh chroo. Den yu ku help ahn fi si how ih ku mek chaynjiz. Ahn noh ferget fi rimain ahn dat di reezn wai ih di mek dehndeh chaynjiz da noh fi mek yoo hapi, bot da fi pleez Jehoava.

6. How yu ku help wahn Baibl styoodent fi ga di korij fi aplai weh ih di laan? (1 Korintyanz 16:13)

⁶ Wen yu Baibl styoodent shoar dat Jehoava wahn help ahn fi du weh rait, ih wahn ga di korij fi aplai weh ih di laan. (Reed 1 Korintyanz 16:13.) Yu ku kompyaa wahn Baibl teecha tu wahn skool teecha. Yoo memba hoo da-mi yu fayvrit teecha eena skool? Da mi praabli di wan weh mi payshent wid yu ahn weh mi help yu fi si dat yu kuda du yu skool werk. Saym way soh, wahn gud Baibl teecha noh onli wahn teech ih styoodent weh Gaad waahn ih du, bot ih help ahn noa fi shoar dat ih ku du it bikaaz Jehoava wahn help ahn. How yoo ku bee wahn gud Baibl teecha laik dat?

HELP YU BAIBL STYOODENT SCHRENTN DEHN LOV FI JEHOAVA

7. How Jeezas mi help peepl fi schrentn dehn lov fi Jehoava?

⁷ Jeezas mi noa dat wen sohnbadi lov Gaad, dehn wahn waahn aplai weh dehn di laan. Hihn mi teech ih disaipl dehn tingz weh wuda schrentn dehn lov fi ih Pa. Fi egzampl, ih shoa dehn dat Jehoava da laik wahn pa weh gi gud tingz tu ih chiljren. (Mach. 7:​9-11) Som a dehn wan weh mi-di lisn tu Jeezas praabli neva ga wahn lovin pa. Imajin how dehn mosi mi feel wen Jeezas mi tel dehn di stoari bowt wahn lovin pa weh welkom bak ih son afta ih du wahn lata bad tingz. Jeezas mi help peepl fi si dat Jehoava reeli lov dehn an ih waahn help dehn.—Look 15:​20-24.

8. How yu ku help yu Baibl styoodent schrentn ih lov fi Jehoava?

⁸ Yu ku help yu Baibl styoodent fi schrentn ih lov fi Jehoava wen yu teech ahn bowt Jehoava byootiful kwalitiz. Evri taim yu stodi wid yu styoodent, help ahn fi andastan dat weh ih di laan shoa dat Jehoava lov aala wi. Wen yu di taak bowt di ransom, help yu styoodent fi andastan dat Jehoava neva onli du it bikaaz ih lov aal hyoomanz bot bikaaz ih lov dehn persnali. (Roam. 5:8; 1 Jan 4:10) Wen wahn Baibl styoodent andastan humoch Jehoava lov ahn persnali, dat wahn help ahn lov Jehoava eevn moa.—Gal. 2:20.

9. Weh mi help Michael fi staat serv Jehoava?

⁹ Michael, weh da fahn Indonesia, mi laan di chroot wen ih mi di groa op, bot ih neva geh baptaiz. Wen ih mi 18 yaaz oal, hihn mi gaahn werk da wahn nada konchri az wahn chrok jraiva. Laytaraan ih mi geh marid, bot ih mi stil gaahn bak fi werk eena wahn nada konchri fi tek kayr a ih famili da Indonesia. Meenwail, ih waif an ih daata mi staat stodi ahn dehn mi-di aplai weh dehn laan. Afta ih ma mi ded, Michael mi kohn bak hoam fi tek kayr a ih pa an ih mi aksep wahn Baibl stodi. Di “Saach Fi Moa” sekshan eena lesn 27 a di Injai Laif Fareva! buk, mi reeli toch Michael haat. Wen hihn mi tink bowt how sad Jehoava mi feel di wach Ih Son sofa, Michael mi staat krai anaal. Ahn wen hihn mi andastan humoch Jehoava ahn Jeezas lov ahn, hihn mi shoa dat ih tankful wen ih mi mek chaynjiz ahn geh baptaiz.

HELP YU BAIBL STYOODENT FI PUT JEHOAVA FERS EENA DEHN LAIF

10. Weh Jeezas mi du soh dat ih kuda help ih disaipl dehn fi mek chaynjiz ahn serv Jehoava? (Look 5:​5-11) (Koment pahn di picha.)

¹⁰ Som a dehn wan weh Jeezas mi preech tu mi noa dat hihn da di Mesaiya. Bot dehn mi need help fi andastan dat fi serv Jehoava dehn mi need fi mek shoar dat di minischri kohn fers eena dehn laif. Peeta ahn Anjru da-mi don Jeezas disaipl fi wahn wail bifoa ih mi aks dehn fi fala ahn ful-taim. (Mach. 4:​18, 19) Dehn mi werk lang wid Jaymz ahn Jan az fishaman, ahn dehn mi ga wahn gud bizniz. (Maak 1:​16-20) Bot Peeta an Anjru mi stap werk az fishaman soh dat dehn ku fala Jeezas ful-taim. Eevn doa dehn mi mek da disizhan, dehn mi stil mek shoar dat dehn ku provaid fi dehn famili. Wai dehn mi wilin fi lef dehn fishin bizniz ahn fala Jeezas? Jeezas mi du wahn mirakl fi shoa dehn dat Jehoava mi wahn ku provaid fi dehn noh mata weh hapm. Dat mi help dehn fi si dat Jehoava wahn aalwayz gi dehn weh dehn need if dehn put ahn fers.—Reed Look 5:​5-11.

11. How yu ku help wahn Baibl styoodent fi mek ih fayt geh schranga?

¹¹ Wi kyaahn perfaam miraklz laik Jeezas, bot wi ku shayr sohn ekspeeryens a how Jehoava mi sopoat dehn wan weh put ahn fers eena dehn laif. Fi egzampl, yu memba how Jehoava mi help yoo wen yu mi jos staat goh da di meetin dehn? Yu mi praabli haftu taak tu yu baas ahn tel ahn dat yu kyaahn werk oava taim bikaaz yu noh waahn mis yu meetin. Tel yu styoodent how yu fayt mi geh schranga wen yu mi si how Jehoava mi help yu bikaaz yu mi put ahn fers eena yu laif.

12. (a) Wai wi shuda invait ada bradaz ahn sistaz pahn wahn stodi? (b) Wat els yu ku du fi help yu Baibl styoodent put Jehoava fers eena dehn laif? Yooz di egzampl eena di paragraaf.

¹² Ih gud wen ada bradaz ahn sistaz ku tel yu Baibl styoodent how dehn mi mek chaynjiz eena dehn laif fi serv Jehoava. Soh invait ada bradaz ahn sistaz fi goh pahn wahn stodi wid yu. Yu ku aks dehn fi eksplayn how dehn mi kom eena di chroot ahn weh dehn mi du fi put Jehoava fers eena dehn laif. Tek di taim fi wach di veedyo eena di “Saach Fi Moa” sekshan er di “Fain Owt Moa” sekshan eena di Injai Laif Fareva! buk. Fi egzampl, wen yu stodi lesn 37 ahn yu wach di veedyo weh naym Jehoava Wahn Gi Wi Weh Wi Need, taak tu yu styoodent bowt di veedyo ahn help ahn si how ih ku put Jehoava fers eena ih laif.

TEECH YU BAIBL STYOODENT WEH FI DU WEN ADAZ PERSIKYOOT DEHN

13. Weh Jeezas mi teech ih disaipl dehn fi du wen adaz persikyoot dehn?

¹³ Jeezas mi kip di tel ih falowaz dat peepl wuda persikyoot dehn, an dat mi inklood fi dehn oan famili tu. (Mach. 5:11; 10:​22, 36) Bifoa Jeezas mi ded, ih mi tel ih disaipl dehn dat dehn kuda mi ded bikaaz dehn wership Jehoava. (Mach. 24:9; Jan 15:20; 16:2) Soh ih mi tel dehn fi bee kyaaful wen dehn di preech. Fi egzampl, ih mi tel dehn fi noh aagyu wid sohnbadi weh noh agree wid weh dehn bileev eena, an ih mi tel dehn fi bee kyaaful wid weh dehn seh ahn du.

14. How wi ku help wi Baibl styoodent fi bee redi wen adaz persikyoot dehn? (2 Timoti 3:12)

¹⁴ Laik Jeezas, wee tu ku tel wi Baibl styoodent weh ih werkmayt, ih frenz, er ih famili mait seh er du tu ahn bikaaz ih di stodi di Baibl. (Reed 2 Timoti 3:12.) Som a ih werkmayt mait teez ahn bikaaz ih di chrai aplai weh ih di laan. Ih famili er adaz mait noh agree wid weh ih di laan. Ih beta fi taak bowt persikyooshan wid wi Baibl styoodent az soon az pasabl. Dat wahn help ahn fi bee redi wen ih doo hapm, an ih wahn noa weh fi seh ahn du.

15. Weh ku help wi Baibl styoodent fi deel wid persikyooshan?

¹⁵ If yu styoodent di goh chroo persikyooshan, help ahn fi chrai andastan wai ih famili mait beks dat ih di stodi di Baibl wid Jehoava Witnisiz. Maybi dehn tink dat weh Jehoava Witnisiz teech da loan lai er dat dehn da bad peepl. Eevn som a Jeezas famili mi tink dat ih mi krayzi. (Maak 3:21; Jan 7:5) Teech yu Baibl styoodent fi bee payshent ahn fi taak tu ih famili ahn adaz eena wahn kain way.

16. How wi ku help wi Baibl styoodent fi taak bowt weh ih di laan eena wahn kain ahn reeznabl way?

¹⁶ Teech yu Baibl styoodent dat wen wahn famili memba waahn noa moa bowt weh ih di laan, ih gud fi noh chrai eksplayn evriting wan lik. If ih du dat, ih ku mek ih famili feel wahn kaina way ahn dehn mait noh waahn taak tu ahn bowt weh ih bileev eena agen. Help yu Baibl styoodent fi noh gi dehn tu moch infamayshan. Dat wahn mek it eeziya fi mek dehn waahn lisn neks taim. (Kol. 4:6) Maybi ih ku tel ih famili fi vizit wi websait, jw.org. Da way, dehn ku laan moa bowt Jehoava Witnisiz ahn reed az moch az dehn waahn.

17. How yu ku help yu Baibl styoodent fi ansa kweschanz weh adaz aks bowt Jehoava Witnisiz? (Koment pahn di picha.)

¹⁷ Yu ku yooz di seeriz weh naym “Frequently Asked Questions” pahn jw.org fi help yu styoodent pripyaa shaat ansaz tu kweschanz weh ih famili er werkmayt mait aks. (2 Tim. 2:​24, 25) Noh ferget fi yooz di “Weh Yu Wuda Seh If Sohnbadi Tel Yu” sekshan eena di Injai Laif Fareva! buk. Inkorij yu styoodent fi praktis weh ih wahn tel sohnbadi. Noh frayd fi help ahn fain eeziya wayz fi eksplayn sohnting. Wen yu tek taim fi praktis wid ahn, dat wahn help ahn noa weh fi seh bowt weh ih bileev er weh ih noh bileev eena.

18. How yu ku inkorij yu Baibl styoodent fi preech wid di kangrigayshan? (Machyu 10:27)

¹⁸ Jeezas mi koman ih disaipl dehn fi preech bowt di gud nyooz tu peepl. (Reed Machyu 10:27.) Wen wahn Baibl styoodent staat preech wid di kangrigayshan, ih wahn si how Jehoava help ahn, an ih wahn laan fi chros Jehoava eevn moa. How yoo ku help ahn fi mek dat bee ih goal? Wen wahn preechin kampayn di kom op, help yu styoodent si weh ih need fi du soh dat ih ku kwalifai fi bee wahn poblisha. Yu ku tel ahn dat ih wuda eeziya fi preech joorin wahn kampayn. Wahn nada goal weh ih ku werk pahn da fi jain di skool ahn gi taak. Wen ih giv ih paat da di meetin dehn, dat wahn help ahn fi eksplayn weh ih bileev eena.

SHOA YU BAIBL STYOODENT DAT YU BILEEV IH WAAHN MEK JEHOAVA HAPI

19. How Jeezas mi shoa dat ih bileev ih disaipl dehn waahn mek Jehoava hapi, ahn how wee ku fala fi hihn egzampl?

¹⁹ Bifoa Jeezas gaahn da hevn ih mi tel ih disaipl dehn dat wan day dehn wahn deh tugeda agen. Dehn neva andastan dat Jeezas mi meen dat dehn gwehn da hevn. Eevn doa Jeezas disaipl dehn neva andastan evriting, hihn mi shoar dat dehn mi waahn mek Jehoava hapi. (Jan 14:​1-5, 8) Hihn mi noa dat ih mi wahn tek taim fi mek dehn andastan sertn tingz, fi egzampl, dat dehn wuda goh liv da hevn. (Jan 16:12) Laik Jeezas, wee ku shoa dat wi bileev wi Baibl styoodent waahn mek Jehoava hapi.

20. How wahn sista mi shoa dat ih bileev dat ih Baibl styoodent waahn du weh rait?

²⁰ Wi waahn bileev dat wi Baibl styoodent waahn du di rait ting. Wahn sista fahn Malawi weh naym Chifundo mi staat wahn Baibl stodi eena di Injai Laif Fareva! buk wid wahn Kyaatlik wuman weh naym Alinafe. Afta dehn finish diskos lesn 14, Chifundo mi aks ahn weh ih mi tink bowt aidol. Alinafe mi geh beks an ih tel ahn, “Ai ku chooz fi yooz aidol if Ai waahnt!” Afta dat Chifundo mi tink dat Alinafe mi wahn stap stodi. Bot Chifundo mi kip di stodi wid ahn, an ih mi hoap dat wan day shee wuda andastan dat fi yooz aidol rang. Kopl monts afta dat, wen dehn mi-di stodi lesn 34, Chifundo mi aks ahn di laas kweschan eena da lesn: “How yu don benifit fahn yu Baibl stodi ahn fahn weh yu laan bowt di chroo Gaad, Jehoava?” Chifundo tel wi weh Alinafe ansa ahn, “Shee menshan sohn gud points, ahn wan a dehn da-mi dat di Witnisiz noh du notn weh di Baibl seh rang.” Afta dat, Alinafe mi stap yooz aidol ahn ih mi geh baptaiz.

21. How wi ku help wi Baibl styoodent fi serv Jehoava?

²¹ Eevn doa Jehoava “da di wan weh mek ih groa,” wee ku help wi Baibl styoodent mek proagres. (1 Kor. 3:7) Wi waahn du moa dan jos teech ahn weh Jehoava waahn ih du, wi waahn mek ih ga schrang lov fi Jehoava. Wi ku aalso inkorij ahn fi put Jehoava fers eena ih laif. Ahn wi teech ahn how fi pen pahn Jehoava wen ih di goh chroo persikyooshan. Wen wi shoa wi Baibl styoodent dat wi bileev dat ih waahn pleez Jehoava, wi help ahn ga di korij weh ih need fi serv Jehoava.