Wi Laan Wahn Lat Fahn Wi Grayt Teecha

MI PAYRENTS MI SET WAHN GUD EGZAMPL

Eena di layt 1950ʼs, mi payrents mi moov fahn Italy tu Kindersley, weh deh eena Saskatchewan, Canada. Lee wail afta dehn mi moov, dehn mi laan di chroot, ahn dat da-mi di moas impoatant ting eena dehn laif. Ah memba wen Ah mi yong, Ah wuda deh owt di preech aal day wid mi famili, soh Ah wuda joak rong ahn seh dat Ah mi staat “agzilari painyaa” fan a ayt.

Mai payrents mi poa, bot dehn mi set wahn gud egzampl ahn mek wahn lata sakrifais fi put Jehoava fers eena dehn laif. Fi egzampl, eena 1963 dehn mi sel som a di tingz weh dehn oan soh dat wi ku goh da wahn intanashanal kanvenshan da Pasadena, California, U.S.A. An eena 1972 wi mi moov bowt 620 mailz fi help preech tu peepl weh taak Italian da Trail, British Columbia, Canada. Mi pa mi geh wahn lata apachooniti fi mek moa moni, bot hihn neva aksep dehn bikaaz ih mi waahn foakos pahn spirichwal tingz.

Ah tankful fi di egzampl weh mi payrents mi set fi mee ahn mi breda ahn sista dehn. Di egzampl weh dehn mi set da-mi di fers paat Ah mai chraynin eena mi servis tu Jehoava. Dehn mi teech mi sohnting weh Ah wahn neva ferget, ahn dat da if Ah mek shoar dat Gaad Kingdom kohn fers eena mi laif, den Jehoava wahn tek kayr a mi.—Mach. 6:33.

WI STAAT FUL-TAIM SERVIS

Eena 1980, Ah mi marid Debbie, wahn byootiful sista weh mi ga spirichwal goalz. Wi mi waahn staat ful-taim servis, soh Debbie mi staat painyaa chree monts afta wi mi geh marid. Wan yaa layta, wi mi moov tu wahn smaal kangrigayshan weh mi need moa help, ahn den Ai staat painyaa tu.

Afta wahn wail, wi mi geh diskorij ahn wi mi waahn moov fahn deh. Bot bifoa dat, wi mi disaid fi taak wid wi serkit oavaseeya. Hihn mi aanis an ih mi tel wi eena wahn kain way: “Da unu di mek tingz haada fi unuself. Unu di foakos moa pahn aal di chalenjiz weh unu di goh chroo. An if unu wuda onli luk fi di pazitiv tingz, unu wahn fain dehn.” Da kongsl da-mi egzakli weh wi mi need fi hyaa. (Saa. 141:5) Wi mi aplai it ahn wi mi riyalaiz dat dehn mi did ga wahn lata pazitiv tingz weh wi kuda foakos pan. Fi egzampl, wahn lata di frenz eena di kangrigayshan mi waahn du moa fi Jehoava. Dat mi inklood som a di yong wanz eena di kangrigayshan ahn sohn sistaz weh mi marid tu sohnbadi weh noh serv Jehoava. Dat da-mi wahn impoatant lesn fi wee. Wi mi laan dat ih impoatant fi foakos pahn di gud ahn fi chros dat Jehoava wahn fiks wateva sichuwayshan wi mait di goh chroo. (Mai. 7:7) Wi mi hapi agen ahn tingz mi geh beta fi wi.

Wi painyaa skool inschroktaz mi serv eena ada konchriz. Dehn mi shoa wi pichaz ahn dehn mi tel wi bowt di blesinz ahn di chalenjiz weh dehn mi gaahn chroo wail dehn mi-di serv da dehndeh konchriz. Ahn dat mi mek wi waahn serv az mishineriz. Soh wi mi mek op wi main fi mek dat bee wi goal.

Fi mek da goal moa reel fi wi, wi mi disaid fi moov tu Quebec eena 1984, weh dehn taak French. Ih mi deh bowt 2,485 mailz fahn British Columbia. Wi mi haftu laan wahn nyoo langwij an adap tu wahn nyoo kolcha. Wahn nada chalenj weh wi gaahn chroo da dat wi neva gat inof moni. Fi wahn wail, aal weh wi mi ga fi eet da-mi lef oava potayto weh wahn faama alow wi fi get fan ih faam. Debbie mi kuk di potayto dehn eena lata difrent way ahn dehn mi onli nais! Eevn doa tingz neva aalwayz eezi, wi mi du wi bes fi bayr op ahn kip wi jai. Ahn wi mi si how Jehoava mi aalwayz di tek kayr a wi.—Saa. 64:10.

Wan day, wi mi geh wahn kaal weh wi neva mi-di ekspek. Da mi wahn invitayshan fi goh serv da Betel eena Canada. Bifoa dat, wi mi aplai fi goh da Gilyad, an eevn doa wi mi hapi fi di invitayshan, wi mi feel disapointid. Bot wi mi stil aksep it. Wen wi mi reech da Betel, wi mi aks Brada Kenneth Little, weh da-mi wahn memba a di Branch Komiti, weh mi wahn hapm if wi mi en op di geh invaitid fi goh da Gilyad. Hihn mi tel wi dat wi mi wahn deel wid dat laytaraan if wi mi en op di geh invaitid.

Wan week layta, mee ahn Debbie mi geh invaitid fi goh da Gilyad Skool. Now wi mi haftu disaid wich wan wi wahn chooz. Brada Little mi tel wi: “Ih noh mata weh yu chooz, dehn wahn ga dayz wen yu wish yu mi chooz di ada opshan. Wan chois noh beta dan di ada wan; Jehoava wahn bles eeda wan.” Wi mi aksep di Gilyad invitayshan, an az taim paas, wi mi geh fi si dat weh Brada Little mi seh da chroo. Wi wuda aalwayz shayr weh hihn tel wi wid adaz weh haftu disaid wich asainment dehn wahn chooz.

WI LAIF AZ MISHINERIZ

Wi mi soh hapi fi bee monks di 24 styoodents weh mi deh eena di 83rd klaas a Gilyad, weh mi hapm eena Aypril 1987 da Brooklyn, New York. Wi mayn inschroktaz da-mi Brada Ulysses Glass ahn Brada Jack Redford. Faiv monts mi gaahn soh faas, ahn wi mi grajuayt pahn Septemba 6, 1987. Wi mi geh asain da Haiti, lang wid John ahn Marie Goode.

Dehn neva ga no mishineriz di serv da Haiti sins 1962 bikaaz dehn mi foas dehn fi kom owta di konchri. Chree weeks afta wi grajuwayshan, wi mi gaahn serv da Haiti eena wahn smaal kangrigayshan eena di mongtinz weh mi gat 35 poblishaz. Wi mi yong ahn wi neva gat wahn lata ekspeeryens, ahn da-mi onli wee di liv eena di mishineri hows. Di peepl eena da ayrya mi reeli poa ahn moas a dehn kudn reed. Wail wi mi-di liv deh, wahn lat mi hapm. Peepl eena da ayrya mi geh vailent bikaaz a palitiks, dehn mi ga peepl weh mi-di chrai geh rid a di govament, dehn mi ga proates, ahn dehn mi ga harikayn tu.

Wi mi laan wahn lat fahn wi bradaz ahn sistaz da Haiti. Eevn doa tingz mi haad fi dehn, dehn mi bayr op ahn dehn mi hapi. Dehn mi lov Jehoava ahn di minischri wahn lat. Dehn mi ga wahn oalda sista weh mi kyaahn reed, bot shee mi memoraiz bowt 150 skripchaz. Di prablemz weh wi mi si di hapm eena da ayrya mi mek wi waahn tel di peepl dehn dat da onli Gaad Kingdom ku fiks di prablemz weh hyoomanz di fays. Ih mek wi soh hapi fi si dat som a wi Baibl styoodents eena da ayrya mi geh fi bee regyula painyaaz, speshal painyaaz, an eldaz.

Wail wi mi deh da Haiti, wi mi geh fi taak tu wahn man weh naym Trevor wahn kopl taimz bowt di Baibl. Hihn da-mi wahn Mormon mishineri deh. Yaaz layta, Ah geh wahn leta fahn ahn. Eena ih leta ih mi tel mi: “Ah di geh baptaiz da di neks asembli! Ah waahn goh bak da Haiti ahn serv az wahn speshal painyaa da di saym ayrya weh Ah mi deh az wahn Mormon mishineri.” Ahn dat da weh hihn an ih waif mi du fi yaaz.

EUROPE—DEN AFRICA

Ih mi-di staat geh eeziya fi preech da Europe, ahn wi mi geh asain fi goh serv deh. Eena 1992 wi mi gaahn da Ljubljana, Slovenia. Ih mi deh kloas tu weh mi payrents groa op bifoa dehn mi moov tu Italy. Dehn mi stil di ga waar eena di ayrya weh yoostu naym Yugoslavia. Di branch da Vienna, Austria, ahn di aafis dehn da Zagreb, Croatia, ahn Belgrade, Serbia, mi stil di aaganaiz di preechin werk eena da ayrya. Now eech wan a dehndeh foa konchriz weh mi mek op di ayrya a Yugoslavia mi wahn gat dehn oan Betel.

Wi mi haftu laan wahn nada nyoo langwij ahn kolcha agen. Di peepl eena da ayrya wuda seh, “Ježik je težik,” weh meenz “Di langwij haad.” An ih mi haad fi chroo! Wi mi apreeshiayt how di bradaz ahn sistaz mi laayal ahn dehn mi aalwayz redi fi aksep eni nyoo chaynj weh di aaganaizayshan mek, ahn wi mi si how Jehoava mi bles dehn far it. Ahn wi mi si agen how Jehoava aalwayz mek tingz rait an ih du it da di rait taim. Wi mi laan wahn lata lesn wail wi mi deh da Slovenia, ahn wahn lata di lesn dehn weh wi mi don laan help wi fi bayr op wen wi mi-di goh chroo haad taimz.

Bot wi laif mi kantinyu chaynj. Eena 2000 wi mi geh asain fi goh da Côte dʼIvoire, West Africa. Den eena Novemba 2002, wi mi haftu moov ahn goh da Sierra Leone bikaaz a di waar weh mi-di goh aan. Wahn waar weh mi laas fi 11 yaaz mi jos en da Sierra Leone. Ih mi haad fi lef Côte dʼIvoire soh kwik. Bot di lesn dehn weh wi mi don laan mi help wi fi kip wi jai.

Wi mi foakos pahn di peepl weh mi waahn laan di chroot da Sierra Leone ahn pahn wi bradaz ahn sistaz weh mi bayr op chroo aal dehndeh yaaz a waar. Dehn neva gat moch. Bot di lee bit weh dehn mi gat, dehn mi waahn shayr wid adaz. Wan taim wahn sista mi-di aafa Debbie sohn kloaz. Debbie neva waahn aksep di kloaz, bot di sista neva mi-di tek no fi wahn ansa. Shee mi seh: “Joorin di waar, bradaz ahn sistaz fahn ada konchri mi sopoat wi. Soh now da fi wee tern fi help owt.” Wi mek it wi goal fi kapi dehndeh bradaz ahn sistaz egzampl.

Afta sohn taim, wi mi did en op di gaahn bak da Côte dʼIvoire, bot politikal prablemz mi mek vailens staat op agen. Soh eena Novemba 2004, wi mi haftu lef fahn deh pahn helikapta wid wan bag eech. Wi mi en op di sleep pahn di floa da wahn French aami bays, ahn den wi mi gaahn da Switzerland di neks day. Wen wi mi reech da di branch aafis rong midnait, di Branch Komitee ahn di Ministeeryal Chraynin Skool inschroktaz tugeda wid dehn waif mi welkom wi wid lata hog, waam food, ahn wahn lata Swiss chaaklit. Wi mi reeli feel di lov.

Wi mi geh asain tu Ghana fi wahn lee wail, ahn den wi gaahn bak da Côte dʼIvoire afta tingz mi kaam dong. Di kainis weh di bradaz mi shoa wi mi help wi fi bayr op wen wi mi haftu moov wahn lat an joorin aal di temporari asainment weh wi mi get. Eevn doa ih naamal fi mek peepl weh serv Jehoava shoa lov tu eech ada, mee ahn Debbie agree dat wi noh waahn tek it fi grantid. Laytaraan, wi mi riyalaiz dat weh wi gaahn chroo da-mi paat a wi chraynin.

WI GAAHN DA DI MIDDLE EAST

Eena 2006 wi mi geh wahn leta fahn di werl hedkwaataz weh mi tel wi dat wi nyoo asainment mi wahn bee eena di Middle East. Dis mi meen dat wi mi gwehn chroo nyoo tingz ahn nyoo chalenjiz, ahn wi mi wahn haftu laan wahn nyoo langwij ahn wahn nyoo kolcha agen. Dehn mi wahn ga wahn lata tingz weh wi mi wahn haftu laan eena dis ayrya weh mi ga wahn lata prablemz bikaaz a palitiks ahn rilijan. Wi mi lov di difrent langwij dehn eena di kangrigayshanz, ahn wi mi si dat wi ku ga yooniti az lang az wi fala dairekshanz fahn di aaganaizayshan. Wi apreeshiayt di korij weh di bradaz ahn sistaz mi shoa wen dehn mi-di goh chroo persikyooshan fahn dehn famili, klaasmayt, werkmayt, ahn dehn naybaz.

Wi mi gaahn da di speshal kanvenshan eena 2012 da Tel Aviv, Israel. Dis da-mi di fers taim sins Pentecost 33 C.E dat wahn big groop a Jehoava peepl mi gyada tugeda eena dis ayrya. Wi wahn aalwayz memba da taim!

Joorin dehndeh yaaz, dehn mi sen wi fi vizit wahn konchri weh wi werk mi deh anda ban. Wi mi kehr sohn lichricha fi dehn, ahn wi mi tek paat eena di minischri ahn gaahn da di meetinz an asembli wid dehn. Dehn mi ga chek point ahn soaljaz wid gon evriway, bot wi mi stil feel sayf ahn wi mi kyaaful wen wi mi-di moov rong wid di bradaz ahn sistaz.

WI GAAHN BAK DA AFRICA

Eena 2013 wi mi geh wahn difrent asainment; fi goh serv da di branch da Kinshasa, Congo. Da konchri mi big ahn byootiful, bot wahn lata peepl deh poa ahn dehn gaahn chroo wahn lata waar. Wen wi mi jos moov deh, wee mi tink, “Wee don noa Africa; soh wi redi fi dis.” Bot dehn mi stil ga wahn lat moa fi laan, espeshali wen wi mi haftu chravl eena ayryaz weh neva ga road er brij. Eevn soh, wi mi fain wahn lata pazitiv tingz fi foakos pan. Dat mi inklood how di bradaz mi bayr op wen dehn mi-di goh chroo prablemz, dehn lov fi di minischri, ahn di sakrifais weh dehn mi mek fi goh da di meetin an asembli dehn. Wi mi geh fi si fi wiself dat moa peepl mi-di laan di chroot, ahn dat mi onli pasabl bikaaz a Jehoava sopoat ahn blesin. Di yaaz weh wi mi spen da Congo mi teech wi wahn lata impoatant lesn, an ih gi wi frenz weh da laik famili tu wi.

Da di en a 2017, wi mi geh asain tu South Africa. Dis da di bigis branch weh wi mi serv eena, ahn di werk weh dehn mi gi wi fi du da Betel da-mi tingz weh wi neva du bifoa. Wi mi ga wahn lat moa fi laan, bot wen wi aplai di tingz weh wi mi don laan, dat mi help wi wahn lat. Wi lov di bradaz ahn sistaz weh di serv Jehoava fi wahn lata yaaz. An ih soh gud fi si dat di Betel famili yoonaitid eevn doa dehn kohn fahn difrent rays ahn kolcha. Ih klyaa fi si dat Jehoava di bles ih peepl wid pees, bikaaz dehn put aan di nyoo persnaliti an aplai weh dehn laan.

Oava di yaaz, mee ahn Debbie mi geh sohn eksaitin asainments. Wi mi haftu geh yoostu difrent kolchaz ahn laan nyoo langwij. Ih neva alwayz eezi, bot wi mi kip di feel Jehoava lov chroo ih aaganaizayshan ahn wi bradaz ahn sistaz. (Saa. 144:2) Evriting weh wi laan wail wi mi-di serv Jehoava ful taim mi mek wi serv ahn beta.

Ah soh tankful fi weh mi payrents dehn teech mi, fi di sopoat fahn mi waif, Debbie, ahn di gud egzampl a mi bradaz ahn sistaz rong di werl. Wen mee ahn mi waif tink bowt di fyoocha, wi mek op wi main fi kantinyu laan nyoo lesnz weh wahn kohn fahn wi Grayt Teecha.