How fi Giv Advais

1. Hoo need fi giv advais, ahn wai?

YOO laik giv advais tu adaz? Sohn peepl mait noh main, an adaz mait noh feel komfatabl fi giv advais. Bot aala wi need fi giv advais sohntaim. Wai? Jeezas mi seh dat evribadi wahn noa dat wee da fi hihn falowaz if wi lov wan anada. (Jan 13:35) Ahn wan way how wi shoa wi lov tu wan anada da wen wi gi wi bradaz ahn sistaz di kongsl weh dehn need. Di Baibl seh dat “kongsl fahn wahn kloas fren mek yu haat hapi,” ahn dat mek yu frenship schranga.—Prav. 27:9.

2. Weh eldaz need fi du, ahn wai? (Koment pahn di baks weh naym “Di Kongsl Weh Wi Get Da di Midweek Meetin.”)

² Eldaz need fi noa how fi gi gud advais tu adaz. Jehoava ahn Jeezas gi dehndeh bradaz di rispansabiliti fi tek kayr a di kangrigayshan. (1 Peet. 5:​2, 3) Wan way how di eldaz tek kayr a di kangrigayshan da wen dehn yooz di Baibl eena dehn taak fi gi wi kongsl da di meetin. Dehn kongsl wi persnali wen wi need it tu. Ahn dehn aalso help dehn wan weh lef Jehoava fi kohn bak tu di kangrigayshan. How di eldaz an aala wi ku gi gud advais?

3. (a) How wi ku laan fi gi gud kongsl? (Aizaiya 9:6; koment pahn di baks weh naym “Kapi di Way Jeezas Giv Advais.”) (b) Weh wi wahn taak bowt eena dis aatikl?

³ Wi ku laan fi gi gud kongsl wen wi stodi di way how peepl eena di Baibl mi gi kongsl. Jeezas da di bes egzampl fi laan fram. Di Baibl eevn kaal ahn di “Grayt Kongsla.” (Reed Aizaiya 9:6.) Sohntaim sohnbadi mait aks wi fi advais, ahn sohntaim wi si dat sohnbadi need kongsl bot dehn noh aks far it. Eena dis aatikl, wi wahn taak bowt weh wi ku du eena dehndeh sichuwayshanz ahn wai ih impoatant fi giv advais eena di rait way ahn da di rait taim.

WEN SOHNBADI AKS WI FI ADVAIS

4-5. Wen sohnbadi aks yu fi advais, weh yu shuda tink bowt fers? Yooz di egzampl eena di paragraaf.

⁴ Wen sohnbadi aks yu fi advais, yu mait feel gud dat yu fren chros yu, ahn yu mait waahn tel ahn weh fi du rait away. Bot fers, yu need fi tink bowt weda er nat yu kwalifai fi giv advais eena da sichuwayshan. Sohntaim di bes way fi help yu fren da fi fain sohnbadi weh ga ekspeeryens eena da sichuwayshan.

⁵ Tink bowt dis egzampl. Lesgoh seh yu ga wahn fren weh sik bad. Ih tel yu dat ih du sohn risaach pahn di difrent chreetment weh ih ku get, an ih aks yu wich wan yu tink wuda bee di bes wan. Yu mait tink dat wan a di chreetment da di bes wan, bot yu da noh wahn dakta ahn yu noh gat no chraynin pahn how fi deel wid yu fren siknis. Eena da kays, di bes ting weh yu ku du fi help yu fren da fi help ahn fain sohnbadi weh kwalifai fi chreet ih kandishan.

6. Wai ih gud fi wayt bifoa wi giv advais?

⁶ Sohntaim, wi mait feel dat wi kwalifai fi giv advais. Bot di bes ting fi du da fi noh hori giv advais. Praverbz 15:28 seh dat “wahn raichos persn tink gud bifoa ih ansa.” Soh eevn if wi tink wi noa weh fi seh, ih wuda bee gud fi du risaach, pray, ahn tink bowt weh advais wi wahn giv bifoa wi giv it. Wen wi du dat, wi wahn tel dehn weh Jehoava wuda waahn wi seh. Mek wi luk pahn di prafit Naytan egzampl.

7. Weh yu laan fahn weh hapm tu Naytan?

⁷ Wan taim, King Dayvid mi tel Naytan dat ih mi waahn bil wahn templ fi Jehoava. Ahn Naytan tel ahn fi goh chroo. Bot weh Naytan shuda mi du da chek wid Jehoava fers. Wai? Bikaaz Jehoava neva waahn Dayvid bil di templ. (1 Kran. 17:​1-4) Dis teech wi dat wen sohnbadi aks wi fi advais, wi fi ‘tek wi taim bifoa wi taak.ʼ—Jay. 1:19.

8. Wat da wahn nada reezn wai wi shuda tink bifoa wi giv eni advais?

⁸ Wahn nada reezn wai wi shuda tink bifoa wi giv advais da bikaaz if tingz ton owt bad dehn ku blaym wee. Soh ih impoatant fi tink bifoa wi giv eni advais.

WEN DEHN NOH AKS WI FI ADVAIS

9. Bifoa di eldaz gi kongsl weh dehn haftu fain owt? (Galayshanz 6:1)

⁹ Sohntaim, di eldaz wuda haftu gi kongsl if dehn si sohnbadi “di goh di rang way.” (Reed Galayshanz 6:1.) Dehn noa dat di persn mait di du tingz weh ku mek ih en op di komit wahn seeryos sin, ahn dehn waahn help di persn fi kantinyu serv Jehoava ahn liv fareva. (Jay. 5:​19, 20) Bot bifoa di eldaz gi kongsl, dehn haftu mek shoar dat di persn akchwali need di kongsl. Eena sertn sichuwayshanz, evribadi mek dehn oan disizhanz bays pahn dehn oan kanshans, az lang az dehn noh goh gens Baibl prinsiplz. Soh di eldaz haftu riyalaiz dat jos bikaaz wahn persn du sohnting difrent fahn weh dehn wuda du, noh meen dat di persn du sohnting weh brok Jehoava standadz. (Roam. 14:​1-4) Bot wat if di brada mi did du sohnting weh ku damij ih rilayshanship wid Jehoava ahn di eldaz disaid dat dehn haftu seh sohnting?

10-12. Weh eldaz need fi du wen dehn haftu gi kongsl tu sohnbadi weh neva aks far it? Yooz di egzampl eena di paragraaf. (Koment pahn di picha dehn.)

¹⁰ Eldaz mait fain it haad fi kongsl sohnbadi weh neva aks fi advais. Wai? Paal seh dat wahn persn mait noh eevn kanshos dat ih need kongsl. Soh bifoa dehn gi kongsl, dehn need fi fain wayz fi mek it eeziya fi mek di persn aksep it.

¹¹ Imajin wahn faama di chrai groa plaants eena haad grong. Bifoa ih staat plaant, ih haftu pripyaa di grong. Den ih wahn plaant di seed, ahn den ih wahn waata it. Jos laik dat, bifoa wahn elda gi kongsl, ih haftu mek it eeziya fi mek di persn aksep di kongsl. Fi egzampl, ih wayt fi di rait taim, ahn den ih mek di persn noa dat ih kay bowt ahn an dat ih waahn taak tu ahn bowt sohnting. If peepl eena di kangrigayshan noa dat di elda lovin ahn kain, den ih wahn bee eeziya fi mek dehn aksep ih advais.

¹² Di elda kantinyu “pripyaa di grong” wen ih rimain di persn dat evribadi mek mistayk ahn dat aala wi need kongsl sohntaim. (Roam. 3:23) Dat wahn mek it eeziya fi mek da persn aksep di kongsl. How di elda ku “plaant di seed”? Eena wahn kaam ahn rispekful way, di elda yooz skripchaz fi shoa ahn dat ih di goh di rang way. Wen di persn aksep dat ih mek wahn mistayk, di elda wahn eksplayn tu ahn weh ih need fi du fi goh di rait way. Ahn di elda “waata di seed” wen ih komen di persn ahn pray wid ahn.—Jay. 5:15.

13. How wahn elda ku mek shoar dat di persn andastan di kongsl?

¹³ Sohntaim, wahn elda gi kongsl ahn di persn geh di sens, ahn sohntaim dehn noh geh di sens. Weh wahn elda ku du fi mek shoar dat di persn andastan di kongsl weh ih gi dehn? Eena wahn kain ahn rispekful way, di elda ku aks kweschanz fi si if di persn andastan di kongsl an if ih andastan weh ih ku du fi mek chaynjiz.—Ikl. 12:11

GIV ADVAIS EENA DI RAIT WAY AHN DA DI RAIT TAIM

14. Wai wi noh fi giv advais wen wi beks?

¹⁴ Non a wi noh perfek, soh sohntaim wi seh er du tingz weh hert adaz. (Kol. 3:13) Di Baibl seh dat sohntaim ada peepl mait seh er du tingz weh hert wi ahn mek wi geh beks. (Ifee. 4:26) Wi noh waahn giv advais wen wi beks. Wai? Bikaaz “wen sombadi geh beks, ih noh du weh rait eena Gaad sait.” (Jay. 1:20) An if wi giv advais wen wi beks, wi ku mek di sichuwayshan wers. Dat noh meen dat wi noh wahn taak tu di persn weh hert wi bowt weh wi tink ahn how wi feel. Bot di kanvasayshan praabli gwehn beta wen wi kaam dong. Wi ku laan fahn di way how Ilaihoo mi kongsl Joab.

15. Weh wi laan fahn Ilaihoo egzampl? (Koment pahn di picha.)

¹⁵ Fi dayz, Joab soa-kaal fren dehn mi-di tel ahn dat evriting weh mi-di hapm tu ahn da-mi fi hihn faalt, ahn Joab mi-di difen ihself. Aal di wail Ilaihoo mi-di lisn tu weh dehn mi-di seh. Ahn wen Joab chrai proov dat hihn mi inosent, ih mi seh tingz bowt Jehoava weh da neva chroo. Ilaihoo mi geh chap op wen hihn hyaa dat. Bot Ilaihoo mi feel fi Joab, an ih mi wayt bifoa ih taak op. Wen ih mi did kongsl Joab, ih mi du it eena wahn kaam ahn rispekful way. (Joab 32:2; 33:​1-7) Wi laan wahn impoatant lesn fahn Ilaihoo. Wen wi need fi giv advais, ih gud fi du it da di rait taim eena wahn kaam, lovin, ahn rispekful way.—Ikl. 3:​1, 7.

KIP AAN DI GIV AN AKSEP ADVAIS

16. Weh wi laan fahn Saam 32:8?

¹⁶ Di teem skripcha fi dis aatikl seh dat ‘Jehoava wach oava wi ahn gi wi advais.ʼ (Reed Saam 32:8.) Dat meen dat hihn wahn kantinyu teech wi, an ih pramis fi help wi yooz di advais weh ih gi wi eena wi laif. Wen wi geh di privilij fi giv advais tu adaz, wi ku kapi Jehoava egzampl. Wi ku luk owt fi dehn ahn help dehn eena eni way wi kud fi fala di advais weh dehn get.

17. How di eldaz mek wi feel wen dehn gi wi advais weh bays pahn di Baibl? (Aizaiya 32:​1, 2)

¹⁷ Nowadayz, ih soh impoatant fi giv an aksep gud advais ahn kongsl. (2 Tim. 3:1) Eldaz weh giv gud advais weh bays pahn di Baibl da laik “wahn krik eena wahn lan weh noh ga no waata.” (Reed Aizaiya 32:​1, 2.) Frenz weh noa weh wi waahn hyaa bot stil tel wi weh wi need fi hyaa gi wi wahn preshos gif. (Prav. 25:11) Mek aala wi kantinyu laan how fi giv an aksep gud advais ahn kongsl.